Álemdik BAQ-taǵy Qazaqstan:Apple-daǵy qazaq, satylǵan azamattyq jáne tólem toqtamy
Bul aptada álemdik basylymdar Qazaqstan jaıly birshama jańalyq jarııalady. Apple kompanııasynda qazaq jigitiniń basshylyq qyzmetke taǵaıyndalǵany, Reseımen shekarada ótkizý pýnktiniń ýaqytsha toqtatylǵany qyzý talqylandy. Oǵan qosa zańsyz berilgen Qazaqstan azamattyǵy, bank sektoryndaǵy sheteldikterge arnalǵan saıasat pen Ázerbaıjanmen jasalǵan qarjy aýdarymy sóz bolypty. Tolyǵyraq Kazinform tilshisiniń sholýynan oqyńyz.
TACC: Qazaqstan sheteldikterge bank kartasyn jasatýdyń merzimin shektedi
Qazaqstan bıligi sheteldikterge 12 aıdan uzaq merzimge bank kartalaryn berýdi toqtatty. Qarjy naryǵyn retteý jáne damytý agenttigi habarlaǵandaı, bul qadam «nashaqorlyq pen tsıfrlyq aktıvterdi zańsyz aınalymǵa salý salasyndaǵy qaýipterdi azaıtý» maqsatynda qabyldanǵan. Málimetti reseılik TACC bólisti.
Ár sheteldik azamatqa bir ǵana karta beriledi. Qarjy naryǵyn retteý jáne damytý agenttiginiń málimetinshe, mundaı shekteý sharalary bank salasyndaǵy zańsyz áreketterdiń aldyn alýǵa baǵyttalǵan. Biraq jańa ereje ınvestorlarǵa, kásipkerlerge jáne dıplomattarǵa qatysty emes jáne buryn shyǵarylǵan kartalarǵa da áser etpeıdi.
Sonymen qatar ótken jyly jeltoqsan aıynda Qazaqstannyń Reseıdegi elshiliginiń saıtynda aqparat jarııalandy. Onda Qazaqstan tarapy 2025 jylǵy 1 qańtardan bastap sheteldik azamattarǵa sheteldik mekemeler arqyly jeke sáıkestendirý nómirin (JSN) berýdi toqtatatyny habarlaǵan. Mundaı nómir Qazaqstan bankinde shot ashý úshin qajet edi. Endi ony Qazaqstan aýmaǵyndaǵy Halyqqa qyzmet kórsetý ortalyǵy arqyly ǵana alýǵa bolady.
Aıta keteıik, 2022 jyldan 2024 jylǵa deıin 695 myńǵa jýyq reseılik jergilikti bank kartalaryn jasatqan, al Qazaqstannyń ishki ister mınıstrliginiń málimeti boıynsha, ótken jyly 233 myń reseılik Qazaqstannyń memlekettik ıdentıfıkatsııalaý nómirin alǵan.
Report: Zańsyz azamattyq alyp bergender ustaldy
Astananyń eki turǵyny Qyrǵyzstan, Tájikstan, Ázerbaıjan jáne Reseı Federatsııasynan kelgen 49 sheteldikke zańsyz QR-nyń azamattyǵyn jáne ýaqytsha turýǵa arnalǵan ruqsat alyp bergen. Olardyń biri jalǵan neke kýáligin, medıtsınalyq anyqtamasyn jáne basqa da qujatty jasap, ekinshisi klıentterdi taýyp, birinshisimen baılanystyrǵan. Aqparatty Report taratty.
Qylmystyq is-árekettiń nátıjesinde ár sheteldikten 80 myńnan 1 mln teńgege deıin tabys tapqan. Sotta memlekettik aıyptaýshy sottalýshylardyń kinásin dáleldep, olarǵa 1 jyl 6 aı jáne 2 jylǵa bas bostandyǵynan aıyrý jazasy taǵaıyndaldy.
Qylmyskerlerden zańsyz alynǵan 107 myń AQSh dollary, 2,5 mln teńge jáne 200 myń rýbl somasynda aqshalaı qarajat tárkilengen. Qazirgi tańda sot úkimi zańdy kúshine endi.
Daryo:Qazaqstan azamaty Apple-de basshy bolyp taǵaıyndaldy
29 jastaǵy qazaqstandyq Ádilhan Qopabaev álemge áıgili Apple kompanııasynyń Ortalyq Azııa men Armenııa aımaǵyndaǵy qyzmetin qadaǵalaıtyn basshy retinde taǵaıyndaldy. Ol qyzmetin Dýbaıdaǵy keńseden atqaratyn bolady. Súıinshi jańalyqty Daryo jetkizdi.
Qyzmeti týraly aqparatty Ádilhan óziniń áleýmettik jelidegi paraqshasynda bólisti: «Men Apple Inc. kompanııasyna Ortalyq Azııa men Armenııadaǵy memlekettik saıasat jáne úkimettik baılanystar bóliminiń basshysy retinde qosylǵanymdy qýana habarlaımyn», – dedi ol.
Jańa basshy Qazaqstannyń Aqtóbe qalasynda dúnıege kelgen. 2017 jyly Ońtústik Koreıadaǵy Ýlsan Ulttyq Ǵylym jáne Tehnologııa Instıtýtyn (UNIST) «ýrbanıst-ınjener jáne tehnologııalyq menedjment» mamandyǵy boıynsha bitirgen. Keıin bedeldi UNIST Global Uni-Star stıpendııasynyń ıegeri atandy. 2021 jyly Qopabaev AQSh-tyń Provıdens qalasyndaǵy Braýn ýnıversıtetinde memlekettik basqarý boıynsha magıstratýrany aıaqtap, Rokfeller qorynyń stıpendııasyn ıelendi.
Apple kompanııasyna deıin Ádilhan halyqaralyq konsaltıngtik jáne IT kompanııalarda qyzmet atqarǵan. 2023 jyldan bastap QR Energetıka mınıstrligine qarasty «Munaı jáne gaz aqparattyq-taldaý ortalyǵyn» basqardy jáne Qazaqstannyń munaı-gaz salasynyń «Jaǵdaılyq-taldaý ortalyǵy» basqarmasynyń tóraǵasy boldy. Ótken jyly Qazaqstan Respýblıkasy Prezıdentiniń janyndaǵy Jastar saıasaty keńesiniń quramyna endi.
Anadolu: Qazaqstan-Reseı shekarasyndaǵy 2 ótkizý pýnkti ýaqytsha toqtatylady
Bıyl 1 aqpannan bastap Orynbor oblysyndaǵy Orsk jáne Mashtakovo avtokólik ótkizý pýnktteri arqyly kólik pen júk tasymalynyń ýaqytsha toqtatylatyny belgili boldy. Reseı Federatsııasynyń memlekettik shekara qyzmetiniń resmı aqparatyn túrkııalyq Anadolu habarlady.
Belgili bolǵandaı, pýnkterdiń jumysyn toqtatý Qazaqstannyń «Alımbet» (Aqtóbe oblysy) jáne «Syrym» (Batys Qazaqstan oblysy) ótkizý pýnktteriniń josparly jóndeýge jabylýyna baılanysty qabyldanǵan. Qazaqstan tarapynan alynǵan málimetke sáıkes, qaıta jańartý jumystary 16 aıǵa deıin jalǵasýy múmkin.
Eki ótkizý pýnktinde memlekettik baqylaý protsedýralarynyń qashan qaıta bastalatyny týraly aqparat aldaǵy ýaqytta habarlanatyny aıtylǵan. Qos tarap reseı-qazaq shekarasyn kesip ótý kezinde osy aqparatty eskerýdi nemese basqa marshrýttar arqyly ótýdi usynýda. Mysaly, Ilek (tek Reseı men Qazaqstan azamattary úshin), Teploe (tek Reseı men Qazaqstan azamattary úshin), Svetlyı jáne Sagarchın ótkizý pýnktteri arqyly ótýge bolady.
Trend: Ázerbaıjan men Qazaqstan arasynda aqsha aýdarymy artty
2024 jyldyń 9 aıynda Ázerbaıjannan Qazaqstanǵa 7,23 mln dollar aýdarylǵan. Bul aldyńǵy jyldyń kórsetkishimen salystyrǵanda 51,87%-ǵa artyq degen sóz. Derekti Trend aqparat agenttigi Ázerbaıjan ortalyq bankine silteme jasap jazdy.
Ázerbaıjan Ortalyq bankiniń málimetterine sáıkes, bul kórsetkish ótken jyldyń sáıkes kezeńimen salystyrǵanda 51,87 paıyzǵa nemese 2,5 mıllıon dollarǵa ulǵaıdy. Qazaqstanǵa aýdarymdardyń jalpy kólemindegi úlesi 1,8 paıyzdy quraǵan.
2023 jyldyń qorytyndysy boıynsha jeke tulǵalardyń Ázerbaıjannan Qazaqstanǵa aqsha aýdarymdarynyń kólemi 7,476 mıllıon AQSh dollaryna jetken edi. Eske salaıyq, 2023 jyldyń qorytyndysy boıynsha jeke tulǵalardyń shet elderden Ázirbaıjanǵa aqsha aýdarymdarynyń kólemi 1,654 mıllıard AQSh dollaryn qurady.