Álemdik BAQ-taǵy Qazaqstan: Jańa Premer-Mınıstr jáne EýroOdaqpen yntymaqtastyq
Osy aptada birqatar dúnıejúzilik baspasóz betterinde Úkimettiń otstavkaǵa ketip, jańa premer-mınıstrdiń taǵaıyndalýy jáne Eýropalyq odaqpen qarym-qatynas týraly maqalalar jarııalandy. Tolyǵyraq Kazinform sarapshysynyń sholýynda.
The time of Central Asia: Qazaqstandaǵy túbegeıli reformalar kezeńinde Úkimet otstavkaǵa ketti
The time of Central Asia jańalyqtar agenttigi Qazaqstan úkimetiniń otstavkaǵa ketkeni týraly maqala jarııalady.
«Otstavkanyń naqty sebebi ashylmasa da, ol Qazaqstandaǵy saıasattyń serpindi sıpatyn kórsetedi», - delingen The time of Central Asia maqalasynda.
Maqalada «Eýrazııalyq monıtorıng» saraptamalyq zertteýler ortalyǵynyń dırektory Álibek Tájibaevtyń pikiri berilgen.
«Qazaqstanda jáne tutastaı alǵanda bıliktiń ózgerýi daǵdarystyq qubylys retinde qabyldanady, biraq bul jerde eshqandaı daǵdarys emes. Ekonomıkalyq jáne saıası jaǵdaı ózgerip jatyr. Sondyqtan Álıhan Smaıylovtyń basshylyǵymen eki jyldan astam ýaqyt jumys istegen bul Úkimet óziniń negizgi mindetterin oryndady dep aıtýǵa bolady. Olardyń basty maqsaty tereń reformalar júrgizý, referendým ótkizý, demokratııalandyrý tetigin iske qosý jáne «halyq únine qulaq asatyn memleket» tujyrymdamasyn iske asyrý boldy», - dedi Álibek Tájibaev The time of Central Asia agenttigine bergen suhbatynda.
Deutsche Welle (DW): Qazaqstan úkimeti otstavkaǵa ketti
Germanııanyń Deutsche Welle aqparat agenttigi de Prezıdent Qasym-Jomart Toqaevtyń Úkimet otstavkasyn qabyldaǵanyn habarlady.
«Premer-mınıstr Álıhan Smaıylovtyń jetekshiligimen Qazaqstan úkimeti otstavkaǵa ketti», - delingen DW maqalasynda.
Agenttik prezıdent Qasym-Jomart Toqaevtyń osyndaı sheshim qabyldap, premer-mınıstrdiń orynbasary Roman Sklıardy Úkimet basshysy mindetin ýaqytsha atqarýshy etip taǵaıyndaǵanyn jazdy.
«Qazaqstan Respýblıkasy Úkimetiniń músheleri Úkimettiń jańa quramy bekitilgenge deıin óz mindetterin atqarýdy jalǵastyra beredi», - dep jazdy Deutsche Welle aqparat agenttigi Qazaqstan Prezıdentiniń jarlyǵyna silteme jasaı otyryp.
Agenttiktiń habarlaýynsha, Qasym-Jomart Toqaev buǵan deıin sheteldik ınvestıtsııalardy tartý boıynsha reformalar júrgizýge shaqyrǵan.
Bloomberg: Qasym-Jomart Toqaev Prezıdent Ákimshiliginiń basshysyn jańa premer-mınıstr etip taǵaıyndady
Bloomberg agenttiginiń habarlaýynsha, Qazaqstan prezıdenti burynǵy mınıstrler kabıneti otstavkaǵa ketkennen keıin premer-mınıstr qyzmetine Prezıdent Ákimshiliginiń basshysy Oljas Bektenovti taǵaıyndady.
«Prezıdent Qasym-Jomart Toqaev Parlamenttiń qoldaýyna ıe bolyp, Premer-Mınıstrdi taǵaıyndaý týraly jarlyqqa qol qoıdy», - delingen Bloomberg maqalasynda.
Eureporter: Qazaqstan men Eýropalyq Odaq dıplomatııalyq qarym-qatynastyń ornaǵanyna 31 jyl tolǵanyn atap ótýde
Eureporter agenttigi Qazaqstan men Eýropalyq Odaq dıplomatııalyq qarym-qatynastardyń ornaǵanyna 31 jyl tolǵanyn habarlady.
«Tarıhı turǵydan, osy qysqa ýaqyt ishinde taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardy qosa alǵanda, strategııalyq áriptestik salasyn edáýir keńeıtti, sondaı-aq «Ortalyq Azııa-Eýropalyq Odaq» óńiraralyq dıalogy sheńberindegi ózara is-qımyldy tereńdete tústi», - delingen Eureporter maqalasynda.
Basylymda Qazaqstan Respýblıkasynyń Prezıdenti Qasym-Jomart Toqaev pen Eýropalyq keńestiń Prezıdenti Sharl Mısheldiń Ortalyq Azııa elderi kóshbasshylary men Eýrokeńes Prezıdentiniń II kezdesýine jáne BUU-nyń Klımattyń ózgerýi týraly negizdemelik konventsııasy taraptarynyń 28-shi konferentsııasyna birge qatysýy sheńberindegi kezdesýleri Astana jáne Brıýssel arasyndaǵy saıası dıalogty edáýir kúsheıtkeni jaıly jazylǵan.
Eurasianet: Qytaı Ortalyq Azııa elderimen saýda turaqty ósim kórsetip jatqanyn habarlady
Eurasianet aqparat agenttigi Qytaıdyń keden agenttigi (GACC) jarııalaǵan málimetterge sáıkes, QHR men Ortalyq Azııa memleketteri arasyndaǵy saýda 2023 jyly kúrt óskenin jazdy.
«GACC málimetteri boıynsha aımaqtyń jyldyq taýar aınalymy 2023 jyly 89,4 mlrd dollardy qurady, bul ótken jylǵy 70,2 mlrd dollardan 27%-ǵa kóp.Alaıda saýda balansy birkelki emes: Ortalyq Azııa elderine eksporttalǵan taýarlar men qyzmetter 61,4 mlrd dollarǵa jetse, Beıjińniń aımaqtan ımporty 28 mlrd dollardy qurady»,- dep habarlaıdy Eurasianet.
Sonymen birge, agenttik atap ótkendeı, 2023 jyly Qazaqstan Qytaıdyń eń iri saýda seriktesi boldy. Ekijaqty taýar aınalymy 41 mıllıard dollarǵa jetken, bul ótken jylmen salystyrǵanda 32 %-ǵa artyq.
