Álemdik BAQ-taǵy Qazaqstan: jańa munaı óńdeý zaýyty, aımaqtyq seriktestik jáne dron jarylysy
ASTANA. KAZINFORM – Apta Qazaqstan úshin mańyzdy jańalyqtarǵa toly boldy. Ázerbaıjan prezıdentiniń Astanaǵa sapary eki el arasyndaǵy strategııalyq áriptestikti jańa deńgeıge kóterdi. Úkimet Kaspıı jaǵalaýynda jańa munaı óńdeý zaýytyn salý josparyn jarııalap, energetıkalyq qaýipsizdikti kúsheıtýdi kózdep otyr.
Al Batys Qazaqstanda tirkelgen belgisiz dron jarylysy qaýipsizdik máselesine nazar aýdartty. Euronews arnasy Qorǵaljyn qoryǵyn tanystyryp, eldiń ekotýrıstik áleýetin kórsetti. Tolyǵyraq Kazinform sholýynan oqyńyz.
Anadolu: Qazaqstan men Ázerbaıjan prezıdentteri strategııalyq áriptestikti nyǵaıtýda
Qazaqstanǵa Ázerbaıjan prezıdentiniń memlekettik sapary aıasynda eki el basshysynyń qatysýymen Joǵary memlekettik keńestiń ekinshi otyrysy ótti. Kezdesý qorytyndysynda 15 yntymaqtastyq qujatyna qol qoıyldy. Bul týraly túrkııalyq Anadolu agenttigi habarlady.
Kún tártibinde kólik, logıstıka, tsıfrlandyrý, otyn-energetıka, mádenı-gýmanıtarlyq yntymaqtastyq máseleleri qaraldy. Qasym-Jomart Toqaev ekijaqty qarym-qatynastyń qazirgi deńgeıine Ázerbaıjan prezıdenti Ilham Alıevtiń úlesi zor ekenin atap ótti. Sondaı-aq, Transkaspıı halyqaralyq kólik marshrýty men birlesken óndiris jobalary talqylandy.
Prezıdentter jýrnalısterge brıfıng ótkizip, sapardy strategııalyq áriptestikti nyǵaıtýdaǵy mańyzdy qadam dep baǵalady. Q. Toqaevtyń aıtýynsha, aýyl sharýashylyǵy, energetıka, óńdeý ónerkásibi, qurylys jáne tsıfrlandyrý salalarynda birlesken jobalar iske qosylady. Mysaly, transformatorlar óndirisi men turǵyn úı ınfraqurylymdyq nysandary salynady.
Ótken jyly Transkaspıı arqyly júk tasymaly 62%-ǵa ósip, 4,5 mln tonnaǵa jetken, tranzıttik munaı kólemi shamamen 1,5 mln tonnany qurady.
Sonymen qatar, eki prezıdent strategııalyq áriptestik pen odaqtas qarym-qatynastyń 20 jyldyǵyna arnalǵan birlesken málimdemege qol qoıdy.
Report: Qazaqstan Kaspıı jaǵalaýynda jańa munaı óńdeý zaýytyn salýdy josparlap otyr
Qazaqstan Úkimeti jańa munaı óńdeý zaýytyn salýǵa arnalǵan tórt yqtımal oryndy qarastyryp jatyr. Solardyń biri – Kaspıı teńizi jaǵalaýyndaǵy Mańǵystaý oblysy. Bul týraly Report agenttigi habarlady.
Premer-Mınıstr Oljas Bektenovtiń aıtýynsha, jylyna 5 mln tonna munaı óńdeıtin zaýyt salý jobasy aldyn ala ınvestıtsııalyq zertteýdi qajet etedi. Joba tereń óńdeý tehnologııasyna negizdelip, jylyna shamamen 300 myń tonna TS-1/Jet A-1 markaly avıatsııalyq kerosın óndirýdi kózdeıdi. Bul – qazir ımport esebinen qamtamasyz etilip otyrǵan tranzıttik áýe tasymaldarynyń suranysyn tómendetýge múmkindik beredi.
Tujyrymdamaǵa sáıkes, 2028–2030 jyldary jobanyń aldyn ala tehnıkalyq-ekonomıkalyq negizdemesi (pre-FEED) ázirlenedi. 2030–2032 jyldary jobalaý-smetalyq qujattama daıyndalyp, 2032–2040 jyldary zaýyt qurylysy júrgiziledi.
Qazirgi tańda Qazaqstanda úsh iri munaı óńdeý zaýyty jumys isteıdi – Atyraý, Pavlodar jáne Shymkent MÓZ-deri. Jańa zaýyt iske qosylǵan jaǵdaıda, eldiń munaı óńdeý qýaty aıtarlyqtaı artyp, avıaotyn men janarmaı ımportyna táýeldilik azaıady.
TASS: Qazaqstan áýe keńistigine baqylaýdy kúsheıtti
Batys Qazaqstan oblysynyń Bórli aýdanynda belgisiz ushqyshsyz ushý apparaty jaryldy. Bul aqparatty reseılik TASS agenttigi jazdy.
QR Qorǵanys mınıstrliginiń málimetinshe, jarylys eldi mekennen alys, adam turmaıtyn aýmaqta bolǵan. Zardap shekkender men materıaldyq shyǵyn tirkelgen joq.
- Qazirgi ýaqytta oqıǵanyń mán-jaıy men ushý apparatynyń shyǵý tegi anyqtalyp jatyr. Áýe keńistigine baqylaý kúsheıtilip, memlekettik shekaradan ruqsatsyz ushý apparattarynyń ótýin boldyrmaý sharalary qabyldandy, – delingen mınıstrlik habarlamasynda.
Qazaqstan tarapy bul ushqyshsyz apparat tıesili bolýy múmkin eldermen keńes júrgizip jatyr. Buǵan deıin polıtsııa oqıǵa ornynan ushqyshsyz ushý apparatynyń bólshekteri tabylǵanyn habarlaǵan. Qazir arnaıy qyzmetter oqıǵa ornynda zertteý júrgizip, qaýipsizdik sharalaryn kúsheıtti.
Euronews: Qorǵaljyn – myńdaǵan qoqıqazdyń mekeni
Euronews telearnasynyń Modern Nomads baǵdarlamasy Qazaqstannyń tabıǵı baılyǵyn keńinen tanystyrýdy jalǵastyrýda. Bul joly sheteldik túsirilim toby elordadan nebári eki saǵattyq jerde ornalasqan Qorǵaljyn memlekettik tabıǵı qoryǵynyń sulýlyǵyn kórsetti.
Qazaqstandaǵy eń iri qorǵalatyn aýmaq sanalatyn bul qoryq 543 myń gektardan astam sýly-batpaqty alqapty qamtıdy. Ol – ıÝNESKO-nyń Búkilálemdik tabıǵı muralar tizimine engen erekshe aımaq ári júzdegen qus pen ósimdik túriniń tabıǵı mekeni.
Qoryqtyń eń tartymdy ereksheligi – myńdaǵan qoqıqazdyń kóktem saıyn osynda uıa salýy. Teńiz kóli men oǵan jalǵasqan tuzdy kólder ekojúıesi bul sırek qustarǵa qolaıly orta qalyptastyrady. Munda olar balapandaryn ósirip, tuzdy shaıan men baldyrmen qorektenedi. Sol sebepti olardyń qaýyrsyndary birtindep ashyq qyzǵylt túske enedi.
Qorǵaljyn – Eýropa men Azııadan keletin eko-týrısterdiń súıikti baǵyty. Munda qoqıqazdardan bólek, aqqýlardy, sý quzǵyndaryn jáne joıylyp bara jatqan kıik popýlıatsııasyn kórýge bolady.