Álemdik BAQ-taǵy Qazaqstan: Jańa ken oryndary, Kaspııdegi jolaýshylar paromyn iske qosý jáne Elena Rybakına
ASTANA. KAZINFORM – Ádettegideı jahandaǵy aqparat taratýshy ınternet-basylymdar eldegi kóp jaıǵa úńildi. Olardyń arasynda 54 jańa ken ornynyń ashylýy, qarjy sektoryn tsıfrlandyrýǵa arnalǵan jobalar aıtylǵan. Ázerbaıjan men Qazaqstandy baılanystyratyn Kaspııdegi paromdy qaıta jandandyrý jaıy jáne álemniń birinshi raketkasy atanǵan Elena Rybakınanyń jeńisti joly jazylypty. Tolyǵyraq Kazinform tilshisiniń sholýynan oqyńyz.
Reuters: Elena Rybakına tarıhqa endi
Qazaqstandyq tennısshi Elena Rybakına mansabynda alǵash ret WTA reıtınginiń kóshin bastaıdy. Ol US Open týrnıri aıaqtalǵannan keıin resmı túrde álemniń birinshi raketkasy atanbaq. Jańalyqty Reuters taratty.
US Open týrnıriniń shırek fınalynda Rybakına qytaılyq Chjen Tsınvendi 3:6, 6:1, 6:4 esebimen jeńip, jartylaı fınalǵa joldama aldy. Osy nátıjesiniń arqasynda qazaqstandyq sportshy WTA reıtınginde keminde 8681 upaı jınaıdy.
WTA reıtıngi US Open aıaqtalǵan soń jańartylady. Sondyqtan týrnırdiń qalǵan bóliginde Rybakına ázirge álemniń ekinshi raketkasy mártebesinde óner kórsetedi.
– Osy týrnırge qandaı nátıjemen kelgenimdi – jaraqatym men jattyǵýdyń joqtyǵyn eskersek, biz aıtarlyqtaı uzaq joldan óttik dep oılaımyn, – dedi Elena Rybakına.
Caspianpost: Qazaqstan men Ázerbaıjan Kaspııde jolaýshylar tasymalyn jandandyrmaq
Qazaqstan men Ázerbaıjan Kaspıı teńizi arqyly Quryq - Baký - Quryq parom jelisi boıynsha jolaýshylar tasymalyn qaıta jandandyrýǵa kiristi. Bul týraly Qazaqstannyń Ázerbaıjandaǵy Elshisi Álim Baıel málimdegen. Elshi sózin Caspianpost bólisti.
Bul baǵyttaǵy tasymal 2020 jylǵa deıin júzege asyrylyp, COVID-19 pandemııasyna baılanysty toqtaǵan edi. Oǵan deıin parommen Kaspıı teńizi arqyly jylyna 1500-ge jýyq jolaýshy júrgen. Álim Baıeldiń aıtýynsha, aldaǵy ýaqytta osy baǵyt boıynsha saıahattaýǵa nıet bildirgen jolaýshylardyń sany artpaq.
Ázerbaıjan jolaýshylar paromyn jandandyrýdy qoldaǵan. Qazir eki eldiń kólik salasyndaǵy ýákiletti organdary jolaýshylar tasymalyn tezirek qalpyna keltirý jumysyna kirisip ketti.
The Times of Central Asia: 54 ken orny memlekettik reestrge engizildi
2024–2025 jyldary memlekettik reestrge 54 jańa ken orny qosyldy. Jańalyqty The Times of Central Asia habarlady.
2024 jyly tizimge alǵash ret 35 jańa ken orny engizildi, al bir jyldan keıin taǵy 19-y qosyldy. Osy eki jylda geologııalyq barlaý jumystary men qorlardy qaıta baǵalaý nátıjesinde tirkelgen resýrs bazasy jańardy.
Qor 262,2 mln tonna temir, 199 mln tonna munaı, 157,2 tonna altyn jáne 22 mlrd tekshe metr gazben tolyqty. Qazirgi ýaqytta tizimde 10 000-ǵa jýyq ken orny bar. Sondaı-aq tirkelgen resýrs bazasyna kúmis, mys, myrysh, qorǵasyn, hrom, marganets jáne fosforıt óndiretin ken oryndary engizilgen.
Jiji Press: Qarjy sektoryn tsıfrlandyrý qolǵa alyndy
Qazaqstan qarjy sektoryn tsıfrlandyrý boıynsha 1200 is-shara josparlap, 94 qarjy uıymy úshin jeke damý josparyn ázirledi. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova habarlaǵan. Tóraǵa sózin japondyq Jiji Press jetkizdi.
Ábilqasymovanyń aıtýynsha, qazirgi ýaqytta agenttik qarjy sektoryn aýqymdy tsıfrlandyrý jáne jasandy ıntellektini engizý boıynsha jańa strategııa ázirlep jatyr.
Joba aıasynda 23 bank, 25 saqtandyrý uıymy, baǵaly qaǵazdar naryǵynyń 31 qatysýshysy men 15 mıkroqarjy uıym qamtylatyn bolady.
Negizgi baǵyttarǵa ishki protsesterdi tsıfrlandyrý, IT-ınfraqurylymdy damytý, derekter sapasyn arttyrý, kıberqaýipsizdik, jasandy ıntellektini engizý jáne qyzmetkerlerdiń tsıfrlyq daǵdysyn nyǵaıtý kiredi.
– 1 200 naqty sharany aıqyndadyq jáne 94 uıymnyń árqaısysy úshin jeke damý jospary daıyndaldy. Osy jeke josparǵa súıene otyryp, alǵa jyljımyz, – dedi Mádına Ábilqasymova.
Josparlanǵan sharalardyń iske asyrylýyn baqylaý úshin Agenttik tsıfrlyq transformatsııa keńsesin qurýdy kózdep otyr.
