Álemdik BAQ-taǵy Qazaqstan: Jańa ken oryndary, Baıqońyrdaǵy joba jáne quryqtalǵan ınternet alaıaqtar
ASTANA. KAZINFORM – Bul aptada Qazaqstanǵa qatysty jańalyq tolastamady. Álemdik ınternet basylymdar Baıqońyrdan ushatyn «Soıýz-5» zymyrany týraly jarysa jazdy. Geologııalyq barlaý nátıjesinde tabylǵan munaı ken oryndary, fıshıngpen aınalysqan qylmystyq toptyń qolǵa túsýi, memlekettiń áleýmettik salaǵa bólgen qarajaty nazardan tys qalmaǵan. Tolyǵyraq Kazinform tilshisiniń sholýynan oqyńyz.
Caspianpost: Alty jańa munaı ken orny anyqtaldy
2025 jyly Qazaqstanda qory 127 mıllıon tonnadan asatyn jańa munaı ken oryndary resmı túrde tirkeldi. Bul týraly Energetıka vıtse-mınıstri Erlan Aqbarov Májilis kýlýarynda málimdegen. Aqparatty Caspianpost taratty.
Erlan Aqbarovtyń aıtýynsha, Qazaqstanda 15 shógindi basseın bar, onyń beseýi ıgerilip jatyr jáne sol jerlerde munaı óndiriledi.
- Ótken jyly bizde jalpy qory 127 mln tonnadan asatyn alty ken orny balansqa qoıyldy. Olar negizinen Mańǵystaý jáne Atyraý oblystarynda ornalasqan. Bul ken oryndaryn negizinen ózimizdiń jergilikti, shaǵyn kompanııalar ıgeredi, – dedi vıtse-mınıstr.
Bıyl 31 naýryzda «QazMunaıGaz» UK AQ basqarma tóraǵasy Ashat Hasenov 2025 jyly Tehnologııalyq syn-qaterler baǵdarlamasy aıasynda qosymsha 434 myń tonna munaı óndirilgenin aıtqan. Onyń sózinshe, 2040 jylǵa deıin qosymsha shamamen 54 mln tonna munaı óndirý josparlanyp otyr.
TASS: «Báıterek» jobasy aıasynda alǵashqy zymyran ushyrylady
Qazaqstan Reseımen birlesip «Báıterek» jobasyn júzege asyrýda. Osy oraıda Baıqońyr ǵarysh aılaǵynan «Soıýz-5» zymyranyn ushyrý jýyrda ótpek. Atalǵan aqparatty Jasandy ıntellekt jáne tsıfrlyq damý mınıstrliginiń Aeroǵarysh komıteti tóraǵasy Baýbek Oralmaǵambetov jetkizgen. Jańalyqty reseılik TASS aqparat agenttigi jarııalady.
- Joba sońǵy satyda. Alǵashqy ushyrý synaǵyn jaqyn kúnderi ótkizemiz. Birneshe kúnnen keıin jaqsy jańalyq estımiz dep senemin, – dedi komıtet tóraǵasy.
Onyń aıtýynsha, «Báıterek» jobasy uzaq ýaqyt boıy birneshe kezeńmen júzege asyrylǵan.
- Bir kezde jobany toqtatý týraly oı bolǵan. Ártúrli jaǵdaı kezdesti. Sebebi eki el qatysatyn mundaı aýqymdy jobada qarjylandyrýdy úılestirý, mamandardy tartý, quzyretterdi bir arnaǵa toǵystyrý – munyń bári senimge negizdeledi.Biraq bul joba – bizdiń ózara qarym-qatynasymyzdyń kórinisi ispetti. Reseı Federatsııasymen aradaǵy senim barǵan saıyn nyǵaıa tústi, – dedi ol.
Reseı men Qazaqstan «Báıterek» jobasyn 2004 jylǵy kelisim negizinde júzege asyryp keledi. Joba Baıqońyrda jańa ǵaryshtyq zymyran keshenin qurýdy kózdeıdi. Osy keshennen reseılik «Soıýz-5» zymyran-tasyǵyshyn ushyrý josparlanǵan.
«Roskosmos» basshysy Dmıtrıı Bakanov 7 sáýir kúni zymyrannyń ǵarysh aılaǵynda tik kúıde ornatylǵanyn jáne ushyrý jaqyn ýaqytta júzege asatynyn habarlaǵan bolatyn.
The Times of Central Asia: Uıaly baılanys jelisindegi jalǵan bazalyq stantsııalarmen kúres bastaldy
Qarjylyq monıtorıng agenttigi jalǵan habarlamalar taratyp, fıshıngpen aınalysqan qylmystyq topty ustady. Osyndaı shemanyń jolyn kesý TMD elderi aýmaǵynda alǵash ret bolyp otyr. The Times of Central Asia-nyń habarlaýynsha, qazirgi ýaqytta tórt kúdikti quryqtalyp, qamaýǵa alynǵan.
Ustalǵandar SMS-blasterdi paıdalanyp, azammattardyń jeke deregin ıemdenip, aqshasyn urlaǵan. Atalǵan qurylǵy 300 metr radıýsta kúshti sıgnal taratyp, telefondardyń avtomatty túrde soǵan qosylyp, qorǵanysyn álsiretken. Nátıjesinde abonentterge birden jalǵan SMS-habarlamalar kelip otyrǵan. Bul qurylǵy baılanys operatorlarynyń qorǵanysyn aınalyp ótip, saǵatyna 100 myńǵa deıin habarlama taratýǵa múmkindik bergen.
Sonymen qatar qaskóıler taratqan silteme arqyly kópshilik fıshıngtik veb-saıttarǵa kirgen. Veb-saıttar paıdalanýshylardan telefon nómirin, tolyq aty-jónin, bank deregin, CVV kody men SMS rastaý kodyn engizýdi suraǵan. Bul qylmyskerlerge qupııa aqparat pen qarajatqa qol jetkizýge múmkindik berip keldi.
Qylmystyq topty qolǵa túsirýge Qarjylyq monıtorıng agenttigi, Bas prokýratýra jáne «TELE2» uıaly baılanys operatory birlese áreket etken.
Euronews: Halyqty áleýmettik qorǵaý kúsheıýde
Qazaqstan Ortalyq Azııadaǵy eń keshendi áleýmettik qoldaý júıesin qalyptastyryp keledi. Osy aptada Euronews arnasy taqyrypqa oraı arnaıy baǵdarlama ázirlegen.
Qazaqstanda memlekettik qoldaý bala dúnıege kelgen sátten bastalady. Sábı dúnıege kelgennen otbasy qarjylaı kómek alady. Aldymen birjolǵy járdemaqy tólenedi, keıin bala bir jarym jasqa tolǵanǵa deıin aı saıyn kútim boıynsha tólemder beriledi. Sonymen qatar árbir kelesi balaǵa tólenetin kómek mólsheri artyp otyrady.
Kópbalaly otbasylarǵa arnalǵan járdemaqy engizilgeli beri kómek alýshylar sany 2,5 esege artty. 2020 jyly áleýmettik tólemdi 252 myń otbasy alsa, búginde járdem 630 myńnan astam otbasyǵa jetti.
Qazaqstan balalardyń sapaly bilim alýyna múmkindik jasaý úshin, ásirese aýyldyq jerlerde mektepter salýǵa belsendi túrde ınvestıtsııa salýda. Keıingi bes jylda elde 1100-den astam mektep boı kóterdi, onyń júzdegeni aýyldyq aımaqtarda ornalasqan. Sonymen qatar 2023–2025 jyldary shamamen 3000 aýyl mektebi jóndelgen.
Sondaı-aq halyqtyń 90%-dan astamy saqtandyrylǵan jáne medıtsınalyq qyzmetterge qol jetkize alady. Búginde kepildendirilgen medıtsınalyq kómek paketi aıtarlyqtaı aýqymdy, al saqtandyrý paketi birtindep keńeıip keledi.
Qazaqstannyń áleýmettik júıesiniń basty erekshelikteriniń biri – salanyń tsıfrlandyrylýy. Járdemaqylardyń basym bóligin eGov portaly arqyly onlaın rásimdeýge bolady. Kóp jaǵdaıda júıe otbasynyń kómek alýǵa quqyǵy bar-joǵyn avtomatty túrde anyqtaıdy.
