Álemdik BAQ-taǵy Qazaqstan: Volfram jobasy, Túrkııa faktory jáne Máskeýdegi sherý
ASTANA. KAZINFORM – Túrkııamen strategııalyq seriktestik, Qytaı baǵyty jáne sırek metaldarǵa qatysty jobalar osy aptada álemdik BAQ nazarynda boldy.
Bloomberg: Qazaqstan munaıy Eýropa úshin barǵan saıyn mańyzdy bolyp barady
Bloomberg materıalynda Qazaqstannyń Kaspıı qubyr konsortsıýmy (CPC) arqyly munaı eksportyn qysqartýy Eýropa naryǵyna qysym túsirip otyrǵanyn jazdy.
- Qazaqstan kelesi aıda Reseıdiń Qara teńizdegi negizgi porty arqyly munaı eksportyn qysqartpaq. Bul Taıaý Shyǵystaǵy daǵdarys saldarynan onsyz da qıyn jaǵdaıǵa tap bolǵan Eýropa munaı óńdeý zaýyttaryna qosymsha qysym túsiredi, - dep jazady basylym.
Maqalada Qazaqstan Eýropaǵa munaı jetkizetin ekinshi iri memleketke aınalǵany da aıtylǵan.
- Eýropalyq zaýyttar Parsy shyǵanaǵynan keletin tasymal azaıǵannan keıin balama kóz izdeýge májbúr boldy, - deıdi Bloomberg.
Materıalda Qazaqstan munaıynyń Eýropa úshin strategııalyq mańyzy artyp kele jatqany aıtylǵan.
Financial Times: Tramptyń uldarymen baılanysty top Qazaqstandaǵy volfram jobasyna taǵy $400 mln surap otyr
Financial Times Qazaqstandaǵy volfram kenishin ıgerip jatqan amerıkalyq ınvestıtsııalyq top AQSh-tan qosymsha 400 mln dollar qarjy surap otyrǵanyn jazdy. Áńgime Qaraǵandy oblysyndaǵy Soltústik Qatpar jáne Joǵary Qaıraqty ken oryndary týraly bolyp otyr.
- Tramptyń uldarymen baılanysty top Qazaqstandaǵy volfram kenishine qosymsha 400 mıllıon dollar surap otyr. Joba boıynsha buǵan deıin amerıkalyq memlekettik qarjy ınstıtýttary men damý qorlary tarapynan 1,6 mıllıard dollarǵa deıin qoldaý máselesi talqylanǵan, - dep jazady Financial Times.
FT málimetinshe, Qazaqstandaǵy bul ken oryndary Batys úshin strategııalyq mańyzǵa ıe. Sebebi volfram áskerı ónerkásipte, elektronıkada jáne aerokosmostyq tehnologııalarda keń qoldanylady. Al álemdik naryqta bul metaldyń negizgi jetkizýshisi –Qytaı. Basylym Vashıngton Qytaıǵa táýeldilikti azaıtý úshin Qazaqstandaǵy strategııalyq mıneral jobalaryna qyzyǵýshylyq tanytyp otyrǵanyn atap ótedi.
Xinhua: Qazaqstan shıkizattyq emes eksportty ulǵaıtýdy kózdeıdi
Qytaıdyń Xinhua agenttigi Qazaqstannyń shıkizattyq emes eksportty 2030 jylǵa qaraı 52 mlrd dollarǵa jetkizý josparyna nazar aýdardy.
- Qazaqstan 2030 jylǵa deıin shıkizattyq emes eksport kólemin 52 mıllıard dollarǵa jetkizýdi josparlap otyr. Qazir Qazaqstannyń shamamen tórt myń ónimi álemniń 127 eline eksporttalady, - dep habarlaıdy Xinhua.
Qytaılyq agenttik Qazaqstandy halyqaralyq saýda men logıstıkadaǵy mańyzdy óńirlik hab retinde kórsetedi.
Anadolu: Túrkııa men Qazaqstan Orta dálizge basymdyq berip otyr
Anadolu Agency men Daily Sabah Rejep Taııp Erdoǵannyń Qazaqstanǵa saparyn Túrki ıntegratsııasy jáne Orta dáliz jobasy aıasyndaǵy strategııalyq seriktestik retinde sıpattady. Basylymdar Astana men Ankaranyń energetıka, logıstıka jáne qorǵanys salalaryndaǵy baılanysy kúsheıip jatqanyn erekshe atap ótken.
- Biz Qazaqstan munaıyn Túrkııa arqyly álemdik naryqqa kóbirek shyǵarýdy maqsat etip otyrmyz. Transkaspıı baǵytyndaǵy Orta dálizdiń strategııalyq mańyzy artyp keledi. Biz Qazaqstanmen birge energııa resýrstaryn Batysqa jetkizýdi kúsheıtýge nıettimiz, - dep Túrkııa prezıdenti Rejep Taııp Erdoǵan sózin keltiredi basylymdar.
Materıaldarda Qazaqstan men Túrkııanyń munaı, logıstıka, qorǵanys ónerkásibi jáne ınfraqurylym salalarynda 13 kelisimge qol qoıǵany aıtylǵan. Sonymen qatar taraptar Anka drondaryn birlesip óndirý jobasyn talqylaǵan.
DW: Qazaqstan Túrkııamen qarym-qatynasty erekshe deńgeıge shyǵaryp jatyr
Deutsche Welle Qazaqstannyń Erdoǵandy erekshe deńgeıde qarsy alýyna nazar aýdardy. Basylym muny Túrkııanyń Ortalyq Azııadaǵy yqpalynyń artýymen baılanystyrady.
- Túrik serıaldary, bilim berý júıesi, túrki birligi ıdeıasy jáne mádenı jobalar Qazaqstan qoǵamynda, ásirese jastar arasynda óte jaqsy qabyldanady, - deıdi saıasattanýshy Bórihan Nurmuhamedov DW-ge bergen suhbatynda.
Basylym Reseı Qazaqstan úshin burynǵydaı basty júıelik seriktes bolyp qala beretinin atap ketken.
- Buǵan ortaq shekara, ekonomıkalyq baılanystar, energetıka jáne qaýipsizdik salalary áser etedi, - dep jazady DW.
Sondaı-aq, Qazaqstannyń Túrkııa, Reseı, Qytaı jáne Batys arasynda kópvektorly tepe-teńdikti saqtaýǵa tyrysyp otyrǵany aıtylǵan.
Eurasianet: Toqaev pen Mırzıeev Máskeýde boı kórsetti
Eurasianet Qazaqstan men Ózbekstan prezıdentteri 9 mamyrda «Máskeýge kútpegen jerden» bardy dep jazdy. Basylym muny Ortalyq Azııa kóshbasshylarynyń Kremlmen erekshe qatynasymen baılanystyrǵan.
- Qazaqstan Prezıdent Qasym-Jomart Toqaev pen onyń ózbek áriptesi Shavkat Mırzıeev áýelde is-sharaǵa qatysýdan bas tartqandardyń tiziminde bolǵan. Olar Kremldiń 7 mamyrdaǵy resmı tiziminde joq edi. ...Qazaqstan men Ózbekstan prezıdentteriniń sońǵy sátte josparlaryn ózgertýine ne sebep bolǵany áli de túrli boljam týdyryp otyr, - dep jazady Eurasianet.
Materıalda Toqaev pen Mırzıeevtiń Máskeýge barýy aımaqtaǵy tepe-teńdikti saqtaýǵa baǵyttalǵan pragmatıkalyq qadam retinde sıpattalǵan.
