Álemdik BAQ-taǵy Qazaqstan: Ýran rezervin qurý, QR-kod tólemi jáne bazalyq mólsherleme
ASTANA. KAZINFORM – Qazan aıynyń sońǵy aptasynda álemdik ınternet-basylymdar Qazaqstan jaıly habaryn údetti. Sonyń ishinde Prezıdenttiń Joldaýda aıtqan usynystary men Túrkııaǵa sapary erekshe nazarda bolǵan. Ózge memlekettermen ortaq QR-kod tólemi, ýran rezervin qurý ıdeıasy, TMU quramyndaǵy keńeske tóraǵalyq etý taqyryptary da kóp jazyldy. Tolyǵyraq Kazinform tilshisiniń sholýynan oqyńyz.
Anadolu: Toqaev pen Erdogan memleketaralyq qarym-qatynas jaıyn talqylady
Qasym-Jomart Toqaev pen Rejep Taııp Erdoǵan kelissóz júrgizdi. Jańalyqty túrkııalyq Anadolu aqparat agenttigi jazdy.
Qazaqstan Prezıdenti qonaqjaılyq tanytqany úshin Túrkııa kóshbasshysyna alǵys aıtyp, túrik halqyn ulttyq mereke – Respýblıka kúnimen quttyqtady. Al Rejep Taııp Erdoǵan eki el arasyndaǵy san qyrly yntymaqtastyqty odan ári tereńdete túsýge nıetti ekenin rastaǵan.
Memleketter basshylary máńgi dostyq pen keńeıtilgen strategııalyq seriktestik rýhyndaǵy ekijaqty qarym-qatynastyń qarqyndy damyp kele jatqanyn atap ótti.
Jiji Press: QR-kod arqyly tólem jasaý múmkindigi qarastyrylýda
22-23 qazanda Tájikstanda tólem júıelerin damytý máseleleri boıynsha Qazaqstan, Qyrǵyzstan, Tájikstan, Ózbekstan jáne Ázerbaıjan ortalyq (ulttyq) bankteri ókilderiniń tórtinshi óńirlik kezdesýi ótti. Іs-sharada ulttyq tólem platformalary men lezdik tólem júıelerin damytý, QR-kod standarttaryn engizý máselesi qozǵalǵan.
Japondyq Jiji Press-tiń jazýynsha, Qazaqstan, Qyrǵyzstan, Tájikstan, Ózbekstan jáne Ázerbaıjan azamattary atalǵan elderge sapar shekkende óz bankteriniń mobıldi qosymshalary arqyly QR-kodpen tólem jasap, naqty ýaqyt rejıminde bir-birine aqsha aýdara alady.
TASS: Strategııalyq ýran rezervi qurylýy múmkin
Qasym-Jomart Tokaev kezekti Joldaýynda eldegi atom elektrostantsııalaryn ýran shıkizatymen qamtamasyz etý úshin memlekettik strategııalyq ýran rezervin qurýdy usyndy. Jańalyqty reseılik TASS agenttigi taratqan.
Onyń aıtýynsha, Qazaqstandaǵy AES qurylysymen aınalysatyn sheteldik seriktesterdi joǵary tehnologııalyq óndiris qurýǵa, sondaı-aq ıadrolyq energetıka salasyn damytýǵa yntalandyrý qajet.
– Bul stantsııalardy elý jyldan keıin, tipti, odan arǵy ýaqytta ýran shıkizatymen qalaı qamtamasyz etetinimizdi qazirden bastap oılastyrýymyz kerek. Qazaqstandaǵy atom elektr stantsııalarynyń qajettiligin óteý úshin ýrannyń aldaǵy júz jylǵa jetetin memlekettik strategııalyq qoryn qurý jónindegi usynys óte oryndy. Bul bastamany jan-jaqty pysyqtaý qajet dep sanaımyn, – dedi Qasym-Jomart Toqaev.
The Times of Central Asia: Ulttyq bank bazalyq mólsherlemeni 15,75%-ǵa deıin túsirdi
Qazaqstan Ulttyq banki 23 qazanda bazalyq paıyzdyq mólsherlemeni 16,25%-dan 15,75%-ǵa deıin tómendetti, bul – 2026 jyldyń maýsymynan beri tórtinshi márte tómendetý qadamy. Aqparatty The Times of Central Asia bólisti.
Jyldyq ınflıatsııa tamyzda 9,8% bolsa, qyrkúıekte 9,3%-ǵa deıin tómendedi. Azyq-túlik ınflıatsııasy 8,5%-ǵa, al azyq-túlikke jatpaıtyn taýarlar ınflıatsııasy 11%-ǵa deıin azaıdy. Ulttyq banktiń dereginshe, myǵym teńge men qatań aqsha-nesıe saıasaty baǵa ósimin baıaýlatýǵa kómektesken.
Aıta ketıik, bazalyq mólsherleme ótken jyldyń qazanynan bastap 18% deńgeıinde qalǵan bolatyn. 2026 jyldyń maýsymynda 17%-ǵa, shildede – 16,75%-ǵa, al qyrkúıekte – 16,25%-ǵa túsirildi.
Report: Qazaqstan Antımonopolııalyq saıasat jónindegi memleketaralyq keńeske tóraǵalyq etedi
Qazaqstan TMD Monopolııaǵa qarsy saıasat jónindegi memleketaralyq keńesiniń jańa tóraǵasy bolyp saılandy.
Report agentttiginiń habarlaýynsha, bul sheshim TMD Monopolııaǵa qarsy saıasat jónindegi memleketaralyq keńesiniń 61-shi otyrysynda qabyldanǵan. Memleketaralyq keńestiń tóraǵasy laýazymyna Marat Omarov saılandy.
