Álemdik BAQ-taǵy Qazaqstan: Túrki elderiniń alǵashqy jerserigi, «Bolashaq oıyndary» men Dastan Sátpaevtyń goly
ASTANA. KAZINFORM – Osy aptada álemdik basylymda Qazaqstan jaıly aqparat jıi ushyrasty. Sonyń ishinde «Bolashaq oıyndary – 2026» halyqaralyq mýltısport týrnıri, Túrki memleketteri uıymynyń jerserik ushyrý ıdeıasy erekshe atalǵan. Jahandyq medıa Qazaqstanda Reseı munaıyn óńdeý máselesi jáne Dastan Sátpaevtyń «Chelsı» fýtbol klýbyndaǵy sátti qadamyna qatysty taqyrypty qalys jibermedi. Tolyǵyraq Kazinform tilshisiniń sholýynan oqyńyz.
Report: Túrki elderi alǵash ret jerserik ushyrady
Túrki memleketteri uıymy alǵash ret nanoserik ázirlep, ǵaryshqa ushyratyn boldy. Ortaq ǵarysh apparaty «OTS-SAT» dep ataý alyp, ushyrý merzimi 2027 jylǵa josparlanǵan. Jańalyqty Report agenttiginiń Qazaqstandaǵy bıýrosy jarııalady.
Jýyrda Jasandy ıntellekt jáne tsıfrlyq damý mınıstri Jasulan Mádıev pen TMU bas hatshysy Qýbanychbek Ómiralıev jobany talqylaǵan. Taraptar joba aıasynda kelisimderdi ázirleý, jobany qarjylandyrý jáne ushyrý protsesine qatysty máselelerdi pysyqtady.
– Spýtnıktiń ınjenerlik modeli tolyq qurastyryldy, jumystar bekitilgen kestege saı júrgizilip jatyr, – dedi mınıstrlik.
Belgili bolǵandaı, ǵarysh apparaty qazaqstandyq ınjenerler men mamandar Astanadaǵy Ǵarysh apparattaryn qurastyrý-synaý kesheninde ázirleýde.
Jasulan Mádıevtiń aıtýynsha, OTS-SAT jobasy TMU-ǵa múshe elderdiń tehnologııalyq yntymaqtastyǵyn nyǵaıtyp, ǵarysh salasyndaǵy birlesken jobalarǵa jol ashady.
Reuters: Reseı munaıyn óńdeý boıynsha kelissóz júrip jatyr
Qazaqstan zaýyttarynda Reseı munaıyn óńdeý boıynsha kelissóz júrgizip jatyr. Boljam boıynsha, munaı ónimderi Qazaqstannyń ishki naryǵyna satylady jáne Reseıge tasymaldanýy múmkin. Energetıka mınıstrliginiń aqparatyn Reuters agenttigi taratty.
– Reseı munaıyn óńdeý, odan alynǵan ónimdi keıin Qazaqstan naryǵyna satý jáne ónimniń bir bóligin Reseı Federatsııasyna eksporttaý týraly kelissóz júrgizilýde, – delingen mınıstrlik aqparatynda.
Vedomstvo deregine sáıkes, atalǵan qadam otandyq munaı óńdeý zaýyttaryn shıkizatpen qamtý ári ishki naryqtaǵy janar-jaǵarmaı tapshylyǵynyń aldyn alý úshin qolǵa alynǵan.
Lenta: «Bolashaq oıyndary 2026» halyqaralyq týrnıri bastaldy
Astanada «Bolashaq oıyndary – 2026» halyqaralyq mýltısport týrnıri bastaldy. Týrnır fızıkalyq jáne tsıfrlyq formatyn qamtıtyn fıdjıtal-baǵyttar boıynsha ótpek. Saıys týraly reseılik Lenta.ru ınternet basylymy jazdy.
Saıysta 34 eldiń 800-den astam ókili baq synaıdy. Týrnırde sportshylar fıdjıtal-fýtbol, fıdjıtal-basketbol, fıdjıtal-jekpe-jek, fıdjıtal-shýter, fıdjıtal-bı, Dota 2, Mobile Legends: Bang Bang jáne PUBG: Battlegrounds sekildi 8 baǵyt boıynsha kúsh synasady.
Týrnırdiń ashylý saltanaty 29 shildede «Barys Arena» kesheninde ótti. Oıyn 9 tamyzǵa deıin jalǵasady.
The Chelsea Chronicle: Sátpaevtyń maýsymaldy joly
Brıtandyq «The Chelsea Chronicle» basylymy Dastan Sátpaevty «Chelsı» – «Ýestern Sıdneı Ýonderers» matchynyń basty juldyzynyń biri dep baǵalady.
Basylym tilshisi Djek Drıýrı Sátbaevtyń kásibı deńgeıine joǵary baǵa bergen. Qazaqstandyq fýtbolshynyń alǵashqy mınýttardan-aq qarsylastyń qaqpasyna dop soqqanyn aıta kele, sportyq mansabyna úmit artty.
– Buǵan deıin Dastannyń «Chelsı» fýtbol klýbyna aýysýy kóptiń nazarynda boldy. Jankúıerleri jas oıynshyǵa zor qyzyǵýshylyq tanytqanyn baıqadyq. Dastan «Chelsı» sapyndaǵy alǵashqy golyn oıynnyń nebári 10 mınýty ótpeı soqty. «Chelsı» shabýylshysynyń jasy 16-da, ol bolashaq juldyz ekenin dáleldedi. Ony bul erliginen keıin bas bapker Habı Alonso azýly qarsylastarǵa qarsy oıyndarda nazardan tys qaldyrmasy anyq, – dep jazdy avtor.
