Álemdik BAQ-taǵy Qazaqstan: Toqaevtyń málimdemesi, Kaspıı kabeli, jańa kólik toraby
Mamyrdyń alǵashqy aptasynda sheteldik basylymdar Qazaqstan týraly túrli aqparat jazdy. Onyń ishinde Memleket basshysynyń Ázerbaıjan men Armenııa kelisimine qatysty málimdemesi, Qazaqstan, Reseı jáne Qytaı jańa kólik toraby salynatyny týraly jáne basqa da jańalyqtar taratty. Álemdik BAQ Qazaqstan jóninde taǵy ne jazdy – tolyǵyraq Kazinform tilshisiniń sholýynan oqyńyz.
Anadolu Agency: Qazaqstan Prezıdenti Almatyda ótetin Ázerbaıjan men Armenııa kelissózderin quptaıdy
Sársenbide Qazaqstan Prezıdenti Qasym-Jomart Toqaev Ázerbaıjan men Armenııanyń Almatyda syrtqy ister mınıstrleri deńgeıinde kelissózder ótkizý týraly kelisimin quptady. Bul týraly túrkııalyq Anadolu Agency Aqordanyń baspasóz qyzmetine silteme jasap habarlady.
Aldaǵy kezdesý ázerbaıjan-armıan ýaǵdalastyǵynyń naqty júzege asýyna jol ashyp, jýyq arada Ońtústik Kavkazda turaqty ári uzaqmerzimdi beıbitshiliktiń ornaýyna yqpal etedi, – dep keltirdi Prezıdenttiń sózin Anadolu agenttigi.
Aıta keteıik, Qazaqstan Prezıdenti Erevanǵa jasaǵan saparynda Armenııa men Ázerbaıjan arasyndaǵy kelissózder úshin óz alańyn usynýǵa daıyn ekenin málimdegen bolatyn. Sondaı-aq, Qazaqstan Syrtqy ister mınıstrliginiń resmı ókili Aıbek Smadııarovtyń aıtýynsha, Baký men Erevan kezdesýge qatysatynyn rastady.
The Times of Central Asia: Qazaqstan, Reseı jáne Qytaı jańa kólik torabyn qurady
Qazaqstannyń «Qazaqstan temir joly» ulttyq temir jol kompanııasy (QTJ), reseılik «Slavtrans-servıs» AQ jáne Qytaıdyń Sıan erkin saýda portyn salý jáne paıdalaný jónindegi kompanııasy Máskeý oblysynyń Selıatıno stantsııasynda «CRK Terminal» jańa kólik-logıstıkalyq ortalyǵynyń qurylysyn bastady. Bul týraly halyqaralyq The Times of Central Asia habarlady.
Jańa logıstıkalyq hab Sıan (Qytaı), Reseı jáne basqa elder arasyndaǵy Qazaqstan-Qytaı termınalyndaǵy tikeleı kólik baılanysyn damytýǵa arnalǵan, – dep jazdy basylym.
Sondaı-aq, The Times of Central Asia málimetinshe, 2023 jyly Qytaı men Reseı arasyndaǵy Qazaqstan arqyly temirjol arqyly júk tasymaldaý kólemi 3,8 mln tonnany qurady, bul 2022 jylmen salystyrǵanda 35%-ǵa artyq. 2024 jyldyń birinshi toqsanynda Qytaı-Reseı-Qytaı baǵyty boıynsha tranzıttik tasymal 0,9 mıllıon tonna bolyp, turaqty deńgeıde qaldy.
Deutsche Welle: Baký, Tashkent jáne Astana energetıkalyq júıelerin biriktiredi
Úsh eldiń bıligi ekonomıka jáne energetıka salasyndaǵy yntymaqtastyq týraly memorandýmǵa qol qoıdy. Kabel Kaspıı teńiziniń túbimen tartylady. Mundaı aqparatty germanııalyq Deutsche Welle basylymy jazdy.
Ázerbaıjan, Ózbekstan jáne Qazaqstan úsh eldiń energetıkalyq júıelerin biriktirý boıynsha yntymaqtastyq týraly memorandýmǵa qol qoıdy. Qujatqa 1 mamyr sársenbide, Tashkentte úsh eldiń ekonomıka jáne energetıka mınıstrleriniń kezdesýiniń qorytyndysy boıynsha qol qoıyldy. Bul týraly áleýmettik jelide Ázerbaıjannyń ekonomıka mınıstri Mıkaıl Chıngız ogly Djabbarov málimdedi, – dep habarlady Deutsche Welle.
Sondaı-aq, basylym Djabbarovqa silteme jasap, bul qujatty júzege asyrý úsh tarapqa «jasyl» energııany óndirý jáne ony Ázerbaıjan arqyly Eýropaǵa eksporttaýdy uıymdastyrýda ózara is-qımyl jasaýǵa múmkindik beretinin jazdy.
TASS: Qazaqstanda sý tasqynynan zardap shekkenderge kommýnaldyq tólemderdi tóleý shegeriledi
Qazaqstan bıligi aýqymdy sý tasqynynan zardap shekken el turǵyndaryna kommýnaldyq tólemderdi tóleýdi keıinge qaldyrady. Bul týraly Ulttyq ekonomıka mınıstrligi Tabıǵı monopolııalardy retteý komıtetiniń baspasóz qyzmetine silteme jasap reseılik TASS agenttigi habarlady.
Eldiń birqatar óńirinde sý tasqyny saldarynan zardap shekken qazaqstandyqtarǵa keshendi kómek kórsetilip jatyr. Keıinge qaldyrý Naýryz jáne sáýir aılaryndaǵy kommýnaldyq tólemderdi tóleý keıinge qaldyryldy, ıaǵnı osy aılar úshin keshigip tólegenderge ósimpul qosylmaıdy. Jergilikti atqarýshy organdar sý tasqynynan zardap shekkenderdiń tizimin jasaýǵa kirisedi. Bul tizimder kommýnaldyq kásiporyndarǵa jiberiledi, olar óz kezeginde kommýnaldyq tólemderdi keıinge qaldyrý boıynsha tıisti sharalardy qabyldaıdy, – dep jazdy basylym.
Daryo: Qazaqstandaǵy saýda ortalyqtarynda Wi-Fi sapasy jaqsarady
2 mamyrda QR tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek eldegi saýda ortalyqtaryn joǵary sapaly Wi-Fi jelilerimen qamtamasyz etý jospary týraly málimdedi. Bul týraly ózbekstandyq Daryo ınternet basylymy habarlady.
Basylymnyń málimetinshe, Ashat Orazbek qoǵamdyq tamaqtaný oryndary men saýda úılerindegi ınternettiń nashar isteıtinin, ózgeler sekildi ózi de problemaǵa tap bolǵanyn atap ótken.
Zań jobasy aıasynda iri bıznes ortalyqtaryn Wi-Fi jelisin ornatýǵa mindetteımiz. Al biz sapasyn qadaǵalaımyz. Bul barshaǵa jaıly bolady dep oılaımyn. Dámhanaǵa nemese saýda ortalyǵyna kirgende sapaly ınternet bolýy kerek, – dep keltirdi vıtse-mınıstrdiń sózin Daryo.