Álemdik BAQ-taǵy Qazaqstan: Toqaev zańǵa qol qoıdy, Japarov Astanaǵa keldi, Reseı JES salady

Osy aptada halyqaralyq buqaralyq aqparat quraldary Qazaqstan týraly kóp materıal jazdy. Sheteldik basylymdar el prezıdentiniń Armenııaǵa sapary, turmystyq zorlyq-zombylyq týraly zańǵa qol qoıǵany jáne resmı saparmen kelgen Qyrǵyzstan prezıdentin qarsy alýyna qatysty maqalalar jarııalady. Budan bólek eldegi sý tasqyny men halyqaralyq forýmdy ótkizý keıinge shegerilgenin habarlady. Halyqaralyq basylymdar elimiz týraly taǵy ne jazdy – tolyǵyraq Kazinform tilshisiniń sholýynan oqyńyz.

Trend: Qazaqstan Prezıdenti resmı saparmen Armenııaǵa bardy

Ázerbaıjannyń Trend aqparat agenttigi Qazaqstan Prezıdenti Qasym-Jomart Toqaevtyń Erevanǵa resmı saparmen barǵanyn habarlady. Osy jyldyń 15 sáýirinde Armenııanyń memlekettik rezıdentsııasynda qarsy alý rásimi ótti.

Qurmetti qaraýyl bastyǵy eki el basshylaryna resmı raport berdi. Qazaqstan men Armenııanyń memlekettik ánurandary oryndalǵannan keıin Prezıdent Toqaev pen Armenııa premer-mınıstri Nıkol Pashınıan resmı delegatsııa múshelerin bir-birimen tanystyrýǵa kiristi. Rásimnen keıin Toqaev pen Pashınıan kelissózder zalyna bet aldy, – delingen maqalada.

News.am: Qasym-Jomart Toqaev: Qazaqstan Armenııaǵa eksportty $350 mln deıin ulǵaıtýǵa daıyn

Armenııanyń News.am aqparat agenttigi Qazaqstan Armenııamen saýda-ekonomıkalyq yntymaqtastyǵyn nyǵaıtýǵa daıyn ekenin habarlady. Basylymnyń málimetinshe, bul týraly Qazaqstan Prezıdenti Qasym-Jomart Toqaev Erevanǵa resmı sapary kezinde – 2024 jyly 15 sáýirde Armenııanyń premer-mınıstri Nıkol Pashınıanmen birlesip ótkizgen brıfıngte aıtty.

Agenttiktiń málimetinshe, Qasym-Jomart Toqaev Armenııanyń baı tarıhy men mádenıetine erekshe qurmetpen qaraı otyryp, Armenııa Qazaqstannyń Ońtústik Kavkazdaǵy mańyzdy jáne senimdi seriktesi ekenin atap ótti.

Ekijaqty baılanystardy jandandyrý – ortaq maqsat, – dep keltiredi Qasym-Jomart Toqaevtyń sózin News.am.

Basylymnyń habarlaýynsha, kelissózder barysynda saýda-ekonomıkalyq jáne ınvestıtsııalyq yntymaqtastyqty damytýǵa erekshe nazar aýdaryldy. Qazaqstan Prezıdenti sońǵy bes jylda bul saladaǵy yntymaqtastyq keńeıgenimen, áleýet tolyq paıdalanylmaǵanyn atap ótken. Sonymen qatar, Qazaqstan basshysy óńirlik jáne halyqaralyq beıbitshilik pen turaqtylyq máselelerinde eki memlekettiń maqsattary sáıkes keletinin aıtqan.

The Times of Central Asia: Qazaqstan prezıdenti turmystyq zorlyq-zombylyq týraly mańyzdy zańǵa qol qoıdy

The Times of Central Asia jańalyqtar portaly Prezıdent Qasym-Jomart Toqaev osy jyldyń 11 sáýirinde QR Parlamenti qabyldaǵan «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgertýler men tolyqtyrýlar engizý týraly» jáne «Qazaqstan Respýblıkasy Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zańdarynaqol qoıǵanyn habarlady. Portaldyń habarlaýynsha, bul – áıelder men balalardy qorǵaýdy qamtamasyz etý turǵysynan TMD elderindegi birinshi zań.

...Jańa zańnama boıynsha, turmystyq zorlyq-zombylyq qylmys dep tanylady, kinálilerge jaza qatańdatylady jáne jazalaý sharalarymen qatar birqatar aldyn alý sharasy qarastyrylady. Sondaı-aq endi balalarǵa qatysty zorlyq-zombylyqtyń barlyq túri úshin jaza kúsheıtiledi. Tutas alǵanda, bul memlekettik saıasattyń quqyqtyq, ekonomıkalyq jáne áleýmettik negizderin jetildirý, áıelder men balalarǵa qatysty zorlyq-zombylyqqa múldem tózbeýshilik pen áleýmettik teńdik qaǵıdatyn nyǵaıtýdaǵy mańyzdy qadam, – dep jazylǵan The Times of Central Asia maqalasynda.

Portaldyń habarlaýynsha, halyqaralyq uıymdar zańnamalyq ózgeristerdi joǵary baǵalap, olardy «turaqty, gúldengen qoǵamnyń negizin qalaıtyn» «barlyq azamat úshin teńdik, ádildik jáne qaýipsizdik jolyndaǵy mańyzdy qadam» dep atady.

Daryo: Qazaqstan-Qyrǵyz bıznes forýmy ekonomıkalyq yntymaqtastyqty yntalandyratyn 300 mıllıon dollarlyq kelisimder ákeldi

Ózbekstannyń Daryo jańalyqtar agenttigi 17 sáýirde Astanada ótken Qazaqstan-Qyrǵyzstan bıznes-forýmy aıasynda mańyzdy oqıǵa bolǵanyn habarlady. Eki eldiń kásipkerleri jalpy somasy 300 mıllıon dollar bolatyn kommertsııalyq kelisimderge qol qoıdy. Shara Ortalyq Azııadaǵy kórshi elder arasyndaǵy ekonomıkalyq yntymaqtastyqty damytý jáne ekijaqty baılanystardy nyǵaıtý úshin taptyrmas alań boldy.

Qol qoıylǵan negizgi kelisimderdiń qatarynda ártúrli sektordaǵy jobalardy júzege asyrýǵa baǵyttalǵan venchýrlyq jobalar, sonyń ishinde kún elektr stantsııalarynyń qurylysy, ferroqorytpa zaýytyn salý, Qyrǵyz Respýblıkasynda dıstrıbıýtorlyq ortalyqty damytý, sondaı-aq aýyl sharýashylyǵy ónimderin jetkizýdi jeńildetý bar. Bul bastamalar aıtarlyqtaı ekonomıkalyq ósim ákelip qana qoımaıdy, sonymen qatar turaqty damý men energııany ártaraptandyrýǵa degen ózara mindettemeni kórsetedi, – delingen Daryo maqalasynda.

Agenttiktiń habarlaýynsha, mashına jasaý, ónerkásip, metallýrgııa, qurylys, logıstıka, aýyl sharýashylyǵy, farmatsevtıka, ınvestıtsııa jáne qyzmet kórsetý sııaqty túrli saladaǵy kórnekti kompanııalardyń qatysýy ekijaqty yntymaqtastyqtyń keń aýqymdy múmkindikterin taǵy bir ret pash etti. 2023 jyldyń sońynda eki el arasyndaǵy saýda aldyńǵy jylmen salystyrǵanda 26 paıyzǵa ósip, 1,6 mıllıard dollarǵa jetti. Qazaqstannyń eksporty jalpy saýdanyń 69%-ǵa jýyǵyn qurap, 1,1 mlrd dollar boldy jáne 35,8%-ǵa ósti. Qyrǵyzstannan ımport 495,2 mln dollardy qurady (ósim 9%).

Interfax: Máskeý men Astana Qazaqstanda úsh jylý elektr stantsııasyn salý týraly kelisimge qol qoıdy

Interfax agenttiginiń habarlaýynsha, Qazaqstan men Reseıdiń Energetıka mınıstrlikteri Kókshetaý, Semeı jáne Óskemen qalalarynda jylý elektr stantsııalaryn salý jobalary boıynsha yntymaqtastyq týraly kelisimge qol qoıdy.

Kómirdiń mol qoryn eskere otyryp, úsh oblys ortalyǵynda úsh jańa JES salý olardyń odan ári damýyna serpin beredi, – dep keltirdi Interfax QR Energetıka mınıstri Almasadam Sátqalıevtiń sózin.

Basylymnyń málimetinshe, nysandar ınvestorlar esebinen salynady. Stantsııalar Kókshetaý (qýaty 240 MVt), Semeı (360 MVt) jáne Óskemen (360 MVt) qalalarynda ornalasady. Olar kómirmen jumys isteıtin bolady.

EFE Comunica: Qazaqstan joıqyn sý tasqynyna baılanysty Astana halyqaralyq forýmynan bas tartty

Ispanııanyń EFE Comunica agenttigi Qazaqstan úkimeti eldegi sońǵy onjyldyqtardaǵy eń joıqyn sý tasqynyna baılanysty Astanada bıyl maýsymǵa josparlanǵan halyqaralyq forýmnan bas tartqanyn habarlady.

Joıqyn sý tasqynynyń saldaryn joıý jáne zardap shekken azamattarǵa kómektesý úshin basqa sharalarǵa jumsalatyn qarjyny barynsha únemdeý qajet ekenin eskere otyryp, bıylǵy 13-14 maýsymǵa josparlanǵan Astana halyqaralyq forýmyn ótkizbeý týraly sheshim qabyldadym,– dep keltirdi Qasym-Jomart Toqaevtyń sózin EFE Comunica.

Basylymnyń habarlaýynsha, Prezıdent forýmǵa shaqyrylǵan qonaqtar bul sheshimge túsinistikpen qaraıdy dep senetinin jetkizdi.

EFE Comunica málimetinshe, sý tasqynynan 102 myńnan astam adam, onyń ishinde 34 myń bala qutqaryldy, sý tasqynynan zardap shekken aımaqtarda jurt baspanasyn tastap ketýge májbúr boldy.

24.kg: Prezıdent Sadyr Japarov Astanaǵa resmı saparmen keldi

Qyrǵyzstannyń 24.kg aqparat agenttigi Astana halyqaralyq áýejaıynda Sadyr Japarovty Qazaqstan Prezıdenti Qasym-Jomart Toqaev qarsy alǵanyn habarlady.

Basylymnyń málimetinshe, halyqaralyq áýejaıdyń flagshtoktaryna Qyrǵyzstan men Qazaqstannyń memlekettik týy ilinip, kilem tóselip, qurmetti qaraýyl rotasy tizildi.

Prezıdenttiń Qazaqstanǵa resmı sapary aıasynda Astana qalasynda Qasym-Jomart Toqaevpen ekijaqty kelissózderi, Qyrǵyzstan men Qazaqstan Joǵary memleketaralyq keńesiniń altynshy otyrysyna qatysýy jáne qyrǵyz eposynyń batyry «Manas» eskertkishiniń ashylý saltanatyna qatysýy josparlanǵan, – dep habarlady agenttik.

Sonymen qatar, basylym Qazaqstanda «Qyrǵyzstan – Qazaqstan» bıznes-forýmy, aqsaqaldar men shyǵarmashyl zııaly qaýymnyń dóńgelek ústeli, qyrǵyz-qazaq jastar forýmy, ǵalymdar forýmy sııaqty birqatar is-sharalar ótetinin jazdy.