Álemdik BAQ-taǵy Qazaqstan: Teńiz jobasy, «jańa mıllıarder», Semeı polıgony, «Qaztsınktegi» apat
ASTANA. KAZINFORM – Qazaqstandaǵy munaı óndirisiniń OPEC+ kvotasynan asýy, Semeı ıadrolyq polıgonynyń saldary, Qytaımen logıstıkalyq baılanystar, astyq eksporty men tsıfrlandyrý máseleleri osy aptada álemdik BAQ nazarynda boldy.
Reuters: Qazaqstan munaı óndirisiniń qarqynyn qalpyna keltirdi
Reuters agenttiginiń habarlaýynsha, sáýir aıynda Qazaqstandaǵy munaı jáne gaz kondensatyn óndirý kólemi naýryzben salystyrǵanda 16%-ǵa artqan.
Agenttik dereginshe, óndiris kólemi táýligine 2,17 mln barrelge jetken. Ósim negizinen Teńiz ken ornyndaǵy óndiristiń qalpyna kelýimen baılanysty.
- Ósim negizinen eldegi eń iri munaı ken orny – Teńizdegi óndiristiń artýymen baılanysty boldy. Sáýirde bul ken ornyndaǵy óndiris kólemi táýligine 973 myń barrelge jetti. Teńiz qańtar aıynda Kaspıı mańyndaǵy ken ornynda bolǵan iri elektr qýaty úzilisinen keıin óndiristi qaıta qalpyna keltirdi, - dep jazady Reuters.
Materıalda Qazaqstannyń qazirgi óndiris kólemi OPEC+ kvotasynan edáýir joǵary ekeni de aıtylǵan.
Bloomberg: Qazaqstannyń jańa mıllıarderi eńbek jolyn kólik satýdan bastaǵan
Bloomberg Qazaqstandaǵy «jańa mıllıarder» Nurlan Smaǵulov týraly kólemdi maqala jarııalady. Basylym onyń kásipkerlik jolyn kólik satýdan bastap, iri saýda ortalyqtary men avtomobıl óndirisine deıin qalaı keńeıgenin sıpattaıdy.
Materıalda Almatynyń postkeńestik kezeńnen qazirgi iri kommertsııalyq ortalyqqa aınalǵany sóz bolady.
- Smaǵulov Keńes odaǵy ydyraǵannan keıin Lada satýdan bastap, keıin Qazaqstandaǵy eń iri bıznes ımperııalardyń birin qurdy. Qazir oǵan tıesili kompanııalar Qazaqstanda óndiriletin ár bes kóliktiń ekeýin shyǵarady. Onyń bıznes joly postkeńestik saýdadan bastap, eldiń avtoónerkásibindegi eń yqpaldy oıynshylardyń birine aınalǵan tarıh retinde sıpattalady, - dep jazylǵan materıalda.
Bloomberg kásipkerdiń baılyǵy shamamen 1,5 mlrd dollar ekenin jazady.
Al Jazeera: Keńes dáýirindegi ıadrolyq synaqtar Qazaqstanǵa aýyr zardap qaldyrdy
Al Jazeera Qazaqstandaǵy Semeı ıadrolyq polıgonynyń saldary týraly arnaıy reportaj jarııalady. Materıalda Keńes Odaǵy Qazaqstan aýmaǵynda júzdegen ıadrolyq synaq júrgizgeni aıtylǵan.
Reportajda radıatsııa áserinen týyndaǵan densaýlyq máseleleri men ekologııalyq zardaptar sóz bolady.
- 1960-jyldary Keńes Odaǵy Qazaqstanda júzdegen ıadrolyq synaq júrgizdi. Sonyń saldarynan lastanǵan jerler, radıoaktıvti kólder paıda bolyp, birneshe urpaq qaterli isik pen týa bitken kemistikterdiń zardabyn tartyp keledi. Semeı polıgony mańyndaǵy aımaqtarda qaterli isik deńgeıi eldiń ózge óńirlerimen salystyrǵanda shamamen 30% joǵary, - dep baıandaıdy Al Jazeera.
Materıalda shamamen 1,5 mln adamnyń radıatsııa áserine ushyraǵany da aıtylǵan.
Reuters: Qazaqstandaǵy eń iri myrysh zaýytyndaǵy jarylystan eki adam qaza tapty
Reuters Shyǵys Qazaqstandaǵy Kazzinc kásipornyndaǵy jarylys týraly habarlady. Agenttik málimetinshe, apat tútin sorǵysh júıesin tazalaý kezinde bolǵan. Materıalda Kazzinc Qazaqstandaǵy eń iri myrysh óndirýshisi ekeni aıtylǵan.
Bloomberg te Kazzinc kásipornyndaǵy jarylys týraly jazdy. Basylym kásiporynnyń Glencore kompanııasyna tıesili ekenin atap ótken.
- Shyǵys Qazaqstandaǵy iri myrysh zaýytyndaǵy jarylys pen órt saldarynan eki adam qaza taýyp, bes adam jaralandy. Tozań jınaý qurylǵysy jarylyp, keıin órt shyqqan. Qazir órt tolyq sóndirilip, qutqarý toptary qosymsha zardap shekkenderdi izdestirý jumystaryn júrgizip jatyr, - dep habarlaıdy Bloomberg.
Xinhua: Qazaqstan astyq eksportyn 13% arttyrdy
Xinhua agenttiginiń habarlaýynsha, Qazaqstan 2025 jyldyń qyrkúıeginen beri 11,1 mln tonna astyq eksporttaǵan.
Negizgi eksport baǵyttarynyń qatarynda Ózbekstan, Aýǵanstan, Qyrǵyzstan jáne Túrikmenstan bar.
- Qazaqstannyń negizgi eksport naryǵy – Ózbekstanǵa jetkizilim 13,8%-ǵa ósip, 9,3 mln tonnaǵa jetti. Aýǵanstanǵa eksport kólemi 51%-ǵa artty. Sonymen qatar Qyrǵyzstan men Túrikmenstanǵa jetkizilim de aıtarlyqtaı ulǵaıǵan, - dep habarlaıdy Xinhua.
Eurasianet: Qazaqstan arqyly ótetin Orta dálizdiń júk tasymaly jedeldeıdi
Eurasianet jarııalaǵan China – Central Asia Monitor sholýynda Qazaqstan arqyly ótetin Orta dáliz baǵytyna qatysty jańa kelisimder sóz bolǵan.
Materıalda Qazaqstan, Qytaı, Túrkııa jáne Eýropa elderiniń logıstıkalyq kompanııalary Kaspıı arqyly tasymal ýaqytyn qysqartý jóninde keliskeni aıtylǵan.
- Taraptar júk tasymalyn qaǵaz qujattarsyz baqylaýǵa kóshýge ýaǵdalasty. Bıyl Qytaıdan Qazaqstan arqyly 600 konteınerlik poıyz ótkizý josparlanyp otyr. Bul Kaspıı arqyly ótetin Orta dáliz baǵytynyń ótkizý qabiletin arttyrýǵa múmkindik beredi, - dep jazady basylym.
Sholýda Qorǵas qurǵaq porty arqyly kólik eksportynyń da óskeni kórsetilgen.
Podrobno.uz: Ózbekstan men Qazaqstan TMD boıynsha ardagerlerge eń kóp tólem beredi
Podrobno.uz TMD elderindegi Ekinshi dúnıejúzilik soǵys ardagerlerine tólenetin áleýmettik kómekti salystyrǵan materıal jarııalady.
Basylym Qazaqstandaǵy tólem kólemi óńirdegi eń joǵary kórsetkishterdiń biri ekenin atap ótken.
- Qazaqstanda maıdangerlerdiń árqaısysyna turǵylyqty óńirine qaramastan 5 mln teńgeden tólendi. Ardagerlerdi, tyl eńbekkerlerin jáne qaza tapqandardyń jesirlerin qoldaýǵa jalpy kólemi 3,3 mlrd teńgeden astam qarajat bólindi. Bul TMD keńistigindegi eń joǵary tólemderdiń biri sanalady, - dep jazady Podrobno.uz.
Telecom Review Asia: Qazaqstanda memlekettik qyzmetterdiń 90%-y onlaın formatqa kóshti
International Business Magazine Qazaqstannyń tsıfrlandyrý salasyndaǵy jetistikteri týraly materıal jarııalady. Basylym málimetinshe, memlekettik qyzmetterdiń 90%-dan astamy onlaın formatqa kóshken.
- Qazaqstan elektrondy úkimet pen tsıfrlyq memlekettik qyzmetter boıynsha óńirlik kóshbasshy retinde tanylyp otyr. Eldegi memlekettik qyzmetterdiń 90%-dan astamy onlaın kórsetiledi. Sonymen qatar Qazaqstan Azııa men Eýropa arasyndaǵy óńirlik data-ortalyq habyna aınalýǵa umtylyp jatyr, - dep jazady basylym.
