Álemdik BAQ-taǵy Qazaqstan: Tashkentpen sý kelisimi, Qytaı kapıtaly jáne Iran daǵdarysyna reaktsııa
ASTANA. KAZINFORM – Bul aptada da álemdik BAQ Qazaqstan tóńiregindegi birneshe mańyzdy taqyrypqa nazar aýdardy. Basylymdar Ózbekstanmen jasalǵan sý resýrstary jónindegi kelisim, Qytaı kapıtalynyń ıýan oblıgatsııalary arqyly artýy jáne Iran tóńiregindegi jaǵdaı jaıly Astananyń ustanymy týraly jazdy. Tolyǵyraq Kazinform tilshisiniń sholýynan oqyńyz.
Reuters: Qazaqstannyń Ulttyq banki krıptoaktıvterge 350 mln dollar salýy múmkin
Ulttyq bank krıptovalıýtaǵa, tsıfrlyq aktıvtermen baılanysty qarjy quraldaryna ınvestıtsııa salý múmkindigin qarastyryp jatyr. Bul týraly Reuters jazdy.
- Qazaqstannyń ortalyq banki krıptoaktıvterge ınvestıtsııalaý úshin 350 mln dollarǵa deıingi portfel qalyptastyrdy, – dep jazady Reuters.
Basylym dereginshe, ınvestıtsııalar tek krıptovalıýta satyp alýmen shektelmeıdi. Qarajat krıptoınfraqurylymmen baılanysty tehnologııalyq kompanııalardyń aktsııalaryna, ındeks qorlaryna jáne tsıfrlyq aktıvter dınamıkasymen baılanysty basqa qarjy quraldaryna baǵyttalýy múmkin.
Materıalda Qazaqstannyń altyn-valıýta rezervteri 69,4 mlrd dollar bolǵany da aıtylǵan.
Bloomberg: Qazaqstan ıýanmen oblıgatsııa shyǵarmaqshy
Qazaqstan alǵash ret ıýanmen nomınatsııalanǵan oblıgatsııalar shyǵarýdy josparlap otyr. Mundaı málimetti Bloomberg keltiredi.
- Qazaqstan alǵashqy ıýan oblıgatsııalaryn kelesi aıdyń ózinde satýdy josparlap otyr, – dep jazady Bloomberg.
Agenttik málimetine qaraǵanda, alǵashqy oblıgatsııalar shamamen 500 mln dollar tartýǵa múmkindik berýi múmkin. Bul bastama Qazaqstan men Qytaı arasyndaǵy qarjylyq baılanystardyń kúsheıip kele jatqanyn kórsetedi.
Avtorlar keıingi on jylda Qytaıdyń Ortalyq Azııaǵa salǵan tikeleı ınvestıtsııasy 36 mlrd dollarǵa jetkenin, onyń 11,4 mlrd dollary Qazaqstanǵa baǵyttalǵanyn atap ótedi.
The Diplomat: Qazaqstannyń pragmatıkalyq syrtqy saıasaty jáne Taıaý Shyǵystaǵy shıelenis
Qazaqstannyń kópvektorly syrtqy saıasaty qazirgi geosaıası jaǵdaıda jańa synaqtarǵa tap bolýy múmkin. The Diplomat jýrnalynda jaryq kórgen saraptamada osyndaı aıtylady.
- Taıaý Shyǵystaǵy shabýyldar aıasynda Qazaqstannyń pragmatıkalyq syrtqy saıasaty belgisizdikke tap bolyp otyr, – dep jazady The Diplomat.
Materıalda Qazaqstan Reseımen, Qytaımen jáne Batys elderimen qarym-qatynasty teńgerýge tyrysqanymen, sońǵy kúnderi oryn aalǵan halyqaralyq shıelenister mundaı saıasat júrgizýdiń múmkindigin taryltýy múmkin ekeni aıtylǵn.
The Times of Central Asia: Qazaqstan munaı óndirý josparyn qaıta qaraýy múmkin
Qazaqstan 2026 jyly josparlanǵan munaı óndirý kólemine jete almaýy yqtımal. The Times of Central Asia osyndaı boljam keltirgen.
- Qazaqstan ınfraqurylymdaǵy irkilisterdiń saldarynan 2026 jylǵy munaı óndirý josparyn oryndaı almaýy múmkin, – dep jazady resýrs.
The Times of Central Asia 2025 jyly Qazaqstan 99,5 mln tonna munaı óndirgenin, al 2026 jylǵa arnalǵan bastapqy jospar 100,5 mln tonna bolǵanyn eske salady. Basylymnyń boljaýynsha, Kaspıı qubyr ınfraqurylymyna jasalǵan shabýyldar men Teńiz ken ornyndaǵy órtter óndiris kólemine áser etýi múmkin.
The Moscow Times: Qazaqstan Reseıdiń ýtılalym saıasatyna qarymta qaıtarmaqshy
Qazaqstan Reseı aýmaǵynan kiretin avtokólikterge arnalǵan ýtılızatsııa alymyn kóterýdi josparlap otyr. Qazaqstan segmentinde kóp talqylanǵan osy jańalyqqa Máskeýdegi basylym da nazar aýdarǵan.
- Qazaqstan Reseıdiń tásilin ustanyp, avtokólik ýtılalymyn kóterýdi josparlap otyr, – dep jazylǵan The Moscow Times aqparatynda.
Basylym málimetinshe, qazir Qazaqstanda ımporttalǵan jeńil avtokóliktiń ýtılalymy shamamen 1500 dollardaı. Al Reseıde mundaı alym qozǵaltqysh kólemine baılanysty 800 myń rýblge deıin jetedi. Avtor Qazaqstannyń bul sheshimi Reseıden ımporttalǵan kólikterdiń baǵasyn shamamen 3,7 paıyzǵa qymbattatatynyn aıtyp otyr.
AZERTAC: Ortalyq Azııa Eýropaǵa Kaspıı tabanymen jasyl energııa jetkizedi
AZERTAC materıalynda Qazaqstan parlamenti Qazaqstan, Ózbekstan jáne Ázerbaıjan arasyndaǵy jasyl energııa óndirý jáne tasymaldaý týraly strategııalyq seriktestik kelisimin ratıfıkatsııalaǵany baıandalǵan.
- Joba Ortalyq Azııany Eýropamen baılanystyratyn jasyl energetıkalyq dáliz qurýdy kózdeıdi, – dep jazady AZERTAC.
Joba aıasynda Kaspıı teńiziniń tabanymen joǵary kerneýli elektr kabelin tartý josparlanyp otyr. Bul júıe bolashaqta Ortalyq Azııadaǵy jańartylatyn energııa resýrstaryn Eýropa naryǵyna jetkizýge múmkindik berýi múmkin.
Caspian Post: Qazaqstan men Ózbekstan sý resýrstaryn birlesip basqarýdy kúsheıtpek
Qazaqstan men Ózbekstan transshekaralyq sý resýrstaryn basqarý salasyndaǵy yntymaqtastyqty tereńdetýge kiristi. Bul jóninde The Caspian Post jazdy.
- Bul qadam eki kórshi memleket arasyndaǵy yntymaqtastyqtyń jańa kezeńine jol ashady, – dep jazady Caspian Post.
Maqalada kelisim sý resýrstaryn tıimdi paıdalaný, memlekettik organdar arasyndaǵy úılestirýdi kúsheıtip. óńirdiń turaqty damýyn qamtamasyz etetini aıtylǵan.
