Álemdik BAQ-taǵy Qazaqstan: Slovenııamen baılanys, eksport kelisimi men Jeńis sherýi

ASTANA. KAZINFORM – Ádettegideı jahandaǵy aqparat taratýshy ınternet-basylymdar eldegi kóp jaıǵa úńildi. Apta ishindegi Slovenııa prezıdentiniń sapary, QHR-men jasalǵan ekonomıkalyq kelisim aıtylypty. Jeńistiń 80 jyldyǵyna arnalǵan áskerı sherýden ne kútetini, elde Naýryz merekesi qalaı toılanǵany habarlanǵan. Tolyǵyraq Kazinform tilshisiniń sholýynan oqyńyz.

БАҚ
Коллаж: Kazinform / Akorda.kz / Freepik / 7kun.kz

Anadolu: Qazaqstan men Slovenııa jan-jaqty seriktestikke bet aldy

Slovenııa – Qazaqstannyń Eýropalyq Odaqtaǵy mańyzdy seriktesi. Elder arasyndaǵy qarym-qatynas qarqyndy damyp jatyr. Bul oıdy Slovenııa prezıdentiniń Qazaqstanǵa resmı sapary kezinde Qasym-Jomart Toqaev ta qaıtalaǵan bolatyn. Aıtýynsha, byltyr Lıýblıana qalasynda Qazaqstan Elshiliginiń ashylýy – berik dostyqtyń dáleli. Prezıdent sózin Anadolu aqparat agenttigi taratty.

Prezıdentter ekijaqty saýda-ekonomıkalyq jáne ınvestıtsııalyq baılanystardy arttyrýǵa kelisti. Qazir qos memleket farmatsevtıka, jańartylatyn energııa, ınjenerııa, telekommýnıkatsııa baǵyttarynda mańyzdy jobalardy júzege asyryp jatyr. Qasym-Jomart Toqaev Qazaqstanda osy salalarda 20-ǵa jýyq sloven kompanııasy tabysty jumys istep jatqanyna toqtalyp, ekonomıkalyq baılanystardyń aýqymyn odan ári keńeıtýdiń mańyzyn atap ótti.

– Taý-ken, jasyl energetıka, atom ónerkásibi, tsıfrlandyrý jáne ınnovatsııa, densaýlyq saqtaý, týrızm salalarynda tyń jobalardy júzege asyrýǵa kelistik. Qolda bar múmkindikti tıimdi paıdalaný úshin Úkimetaralyq komıssııanyń jumysyn jandandyryp, onyń qyzmetin jańa deńgeıge kóterýge shaqyrdym. Eki el bıznes ókilderiniń baılanysyn tereńdetý – mańyzdy mindettiń biri. Osyǵan oraı, «Qazaqstan – Slovenııa» iskerlik keńesin qurý máselesin talqyladyq. Elimizge Slovenııanyń iri kásipkerleri de keldi, – dedi Qasym-Jomart Toqaev.

Taraptar halyqaralyq jáne aımaqtyq ózekti máselelerdi talqylap, ustanymdarynyń ortaq ekenin jetkizdi. Budan bólek, mádenı-gýmanıtarlyq yqpaldastyq jaıynda da pikir almasty.

– Búgingi kezdesýler, jalpy bul sapar Slovenııa men Qazaqstan arasyndaǵy qarym-qatynastyń jańa paraǵyn ashady dep oılaımyn. Eki el de ózara túsinistik pen qurmetke negizdelgen halyqaralyq quqyq, ornyqty damý men seriktestik qaǵıdattaryn qoldaıdy. Men buǵan rızamyn. Keleshekte de osy baǵytta jumys isteı beretinimizge senimdimin, – dedi Slovenııa Prezıdenti Natasha Pırts-Mýsar.

Report: 100 mln dollarǵa jýyq eksport kelisimi jasaldy

Sáýirde QR Saýda jáne ıntegratsııa mınıstri Arman Shaqqalıev Shensı provıntsııasynyń ákimshilik ortalyǵy Sıan qalasyna bıznes-delegatsııany bastap bardy. Nátıjesinde, qazaqstandyq kásipkerler Sıan qalasynda ótken saýda ekonomıkalyq mıssııa qorytyndysy boıynsha $98 mln-ǵa kelisimshart jasasqan. Aqparatty Report bólisti.

Qazir memleketter arasynda yntymaqtastyq birqatar baǵyttarda órbýde. Ótken jyldyń qorytyndysyn qarasaq, Qazaqstan men Qytaı arasyndaǵy taýar aınalymy 6,8%-ǵa artyp, $43,8 mlrd-qa jetti. Ótken jyly ShYU sammıtinde eki el basshylary kórsetkishti $80 mlrd-qa jetkizý mindetin qoıǵan bolatyn. 2024 jyly Qazaqstan arqyly Qytaıdan Eýropaǵa shamamen 300 poıyz jóneltilse, bıyl alǵashqy eki aıynda 111-den astam poıyz jiberilgen.

Aıta keteıik, 2 sáýirde Sıan qalasynda Qazaqstannyń saýda-ekonomıkalyq mıssııasy kezinde B2B-kezdesýler jemisti aıaqtaldy. Nátıjesinde qazaqstandyq kompanııalar $98 mln somasyna eksporttyq kelisimsharttarǵa qol jetkizdi. Sondaı-aq QazTrade saýda-ekonomıkalyq mıssııa aıasynda arnaıy kórme uıymdastyryp, azyq-túlik salasyndaǵy 50-ge jýyq qazaqstandyq kompanııa ónimin tanystyrdy.

TASS: Jeńis sherýine 300 tehnıka shyǵarylady

Bıyl Qazaqstanda ótetin Uly Otan soǵysyndaǵy Jeńistiń 80 jyldyǵyna arnalǵan áskerı paradqa 300 áskerı tehnıkany shyǵarý josparlanǵan. Qazir daıyndyq jumystary bastalyp, shara barysy pysyqtalýda. Jańalyqty reseılik TASS aqparat agenttigi jarııalady.

Belgili bolǵandaı, sherýge 24 paradtyq eseptop qatyspaq. Qatysýshylardyń jalpy sany 4 myńnan asady, onyń 200-den astamy – áskerı qyzmettegi qyz-kelinshekter. Mehanıkalandyrylǵan lekte 300-diń ústinde jaýyngerlik jáne arnaıy tehnıka júriziledi. Olardyń qatarynda tarıhı kezeńdi kórsetetin tehnıka úlgileri de bar. Áýe sherýine ár túrli tıptegi 66 ushý apparaty kórsetiletin boldy.

Uly Otan soǵysy jyldarynda maıdanǵa 1,3 mıllıonnan astam qazaqstandyq maıdanǵa attandy, jartysy urys dalasynda qaza tapqan. Sonymen qatar 500-den astam qazaqstandyq «Keńes Odaǵynyń Batyry» ataǵyna ıe boldy. QR Eńbek jáne halyqty áleýmettik qorǵaý mınıstrliginiń deregi boıynsha, qazir respýblıkada 120 soǵys ardageri bar.

Euronews: Kóshpendiler merekesi

Apta ortasynda Euronews arnasyndaǵy Modern Nomads baǵdarlamasynyń kezekti shyǵarylymy kórsetildi. Bul joly baǵdarlama taqyryby Naýryz merekesine arnalǵan. Onda Qazaqstandaǵy merekeni toılaý úrdisi men bıylǵy jańalyqtar saralanypty.

Kóshpendiler árbir naýryz aıynda Naýryz merekesin toılaıdy. Bul – túrki elderimen qatar ózge memleketterge ortaq dástúr. Qazaqstanda da mańyzdy data ataýsyz ótpeıdi. Munda dástúrli kıim, ulttyq oıyndar, dámdi astyń túr-túrin kórýge bolady.

«Qazaqstan jyl saıyn naýryz aıynda kóktemdi qarsy alyp, Mańǵystaýdaǵy Otpan taý shyńynda qasıetti alaý jaǵady. Bul ejelgi dástúr úzilgen emes. Ár jyly Kishi júzdiń ókilderi kezekpen alaý jaǵý sharasyn ótkizedi. Bıylǵy kezek Adaıdyń Qosaı ata urpaqtaryna tıdi.

Naýryz merekesine arnalǵan festıval Qazaqstan boıynsha ótip, 21 jáne 22 naýryzda Astanadaǵy úlken merekelermen túıindeledi. Qala alańdarynda ulttyq sport túrlerin tamashalap, naýryz kóje ishýge bolady. Sonymen qatar ulttyq qolóner buıymyn qyzyqtap, dástúrli ánmen sýsyndap, rýhanı azyq alýǵa taptyrmas múmkindik», – delingen baǵdarlamada.

Сейчас читают