Álemdik BAQ-taǵy Qazaqstan: Samsung brendi, janar-jaǵarmaı tasymalyna tosqaýyl jáne áskerdegi JI
ASTANA. KAZINFORM – Apta boıy Qazaqstanda saıası-ekonomıkalyq jańalyqtar legi tolastaǵan joq. Samsung brendimen shyǵarylatyn turmystyq tehnıka zaýytynyń jumysy, áskerdegi jasandy ıntellekt bólimshesiniń ashylýy kóp aıtyldy. Shetelge zańsyz tasymaldanatyn janar-jaǵarmaıdy tejeý men WhatsApp, Telegram messendjerleriniń jabylýyna qatysty qaýesetke jaýap erekshe nazarǵa túsken. Atalǵan aqparattardy álemdik basylymdar da jazǵan bolatyn. Tolyǵyraq Kazinform tilshisiniń sholýynan oqyńyz.
Anadolu: Bılik WhatsApp, Telegram messendjerlerine qatysty aqparat taratty
Qazaqstandyq BAQ-ta keı áleýmettik jeli buǵattalýy múmkin degen habar taraýda. Soǵan oraı QR tsıfrlyq damý, ınnovatsııalar jáne aeroǵarysh ónerkásibi mınıstrligi resmı pozıtsııasyn bildirgen. Belgili bolǵandaı, elde WhatsApp, Telegrammessendjerleribuǵattalmaıdy. Mınıstrlik saıtynda jarııalanǵan habarlamany Anadolu aqparat agenttigi bólisti.
«BAQ-ta taralyp jatqan WhatsApp, Telegram jáne basqa da sheteldik messendjerlerdi qoldanýǵa tyıym salynady degen aqparat shyndyqqa janaspaıdy. Tsıfrlyq damý mınıstrligi jeke maqsatta sheteldik servısterdi qoldanýǵa esh tyıym salynbaıtynyn habarlaıdy», – dedi jaýapty vedomstvo.
Mundaı jańsaq pikir qazaqstandyq Aitu messendjeri qoldanysqa enetini týraly habar taraǵannan keıin shyqqan bolatyn. Resmı jaýapta atalǵan taqyryp tolyq taldanǵan.
«Aitu messendjerin engizý bastamasy tek ortalyq jáne jergilikti memlekettik organdarǵa, sondaı-aq kvazımemlekettik sektor uıymdaryna qyzmettik kommýnıkatsııa úshin ǵana usynylady. ıAǵnı. memlekettik qyzmetshiler tek jumys barysynda paıdalanatyn qaýipsiz aqparat almasýdy qamtamasyz etý maqsatynda qoldanylady. Maqsaty – aqparattyq qaýipsizdik deńgeıin arttyrý jáne qorǵalǵan tsıfrlyq ortaǵa kóshý», – delingen habarlamada.
Jańadan qurylǵan Aitu messendjeri qyzmettik hat almasýdyń, jumys chattarynyń, jedel habarlamalardyń jáne memlekettik tsıfrlyq platformalarmen baılanysýdyń negizgi quralyna aınalmaq. Basty artyqshylyǵy – barlyq serverler Qazaqstan aýmaǵynda ornalasady. Demek, derekterdi qorǵaý talabyna sáıkes keledi degen sóz. Oǵan qosa júıe memlekettik organdar úshin senimdi resýrstyń birine aınalady.
Mınıstrliktiń aıtýynsha, Aitu sheteldik messendjerlerdi almastyrmaıdy ári «kedergi keltirmeıdi». Ol tek memlekettik sektordaǵy jumys protsesi úshin qorǵalǵan júıe sıpatynda bolady.
TASS: Samsung turmystyq tehnıkasy shyǵaryla bastady
Qaraǵandy oblysynyń Saran qalasyndaǵy Silk Road Electronics zaýyty Samsung teledıdary men kir jýǵysh mashınasyn shyǵara bastady. Bul aýqymdy joba Qazaqstan men Ońtústik Koreıa arasyndaǵy ónerkásiptik yntymaqtastyqtyń jemisi bolyp otyr. Habardy reseılik TASS jetkizdi.
Otandyq turmystyq tehnıka óndirisiniń jetistigine aınalǵan bastama naryqty qamtýǵa múmkindik beredi. Qazir Saran qalasynda 2 jyl buryn ashylǵan turmystyq tehnıka zaýyty qarqyndy damyp keledi. Kásiporynda Samsung brendiniń qashyqtan basqarýǵa bolatyn, jýý rejımi ońtaılandyrylǵan kir jýǵysh mashınasy men Smart teledıdary shyǵaryla bastady. Óndiris halyqaralyq sapa standartyna sáıkes zamanaýı jelimen jabdyqtalǵan.
Kásiporynnyń qýaty jylyna 150 myń teledıdar, 200 myń kir jýatyn mashına shyǵarýǵa múmkindik beredi. Bıyl 10 myń teledıdar jáne 25 myń kir jýý mashınasyn shyǵarý josparlaǵan.
Silk Road Electronics zaýyty 2023 jyly «Qaraǵandyrezınotehnıka» kásipornynyń bazasynda quryldy. Zaýytta buryn Royal, Shuvaki, Vesta, Artel markalarymen turmystyq tehnıka shyǵarylǵan bolatyn.
Report: Qazaqstan shekaradaǵy baqylaýdy kúsheıtpek
Qazaqstan munaı ónimderiniń zańsyz tasymaldanyýyn tejeý úshin shekara baqylaýyn kúsheıtýge nıetti. Mundaı sheshim janar-jaǵarmaı naryǵyndaǵy jaǵdaıdy turaqtandyrýǵa arnalǵan. Bul týraly Premer-mınıstrdiń birinshi orynbasary Roman Sklıar sala mamandarymen ótken keńeste aıtqan. Sheneýnik sózin Report aqparat agenttigi taratty.
Jıynda ishki naryqty janar-jaǵarmaımen qamtamasyz etý, shekara mańyndaǵy óńirlerdegi munaı ónimderi aınalymyna baqylaýdy kúsheıtý máseleleri qaralǵan. Premer-mınıstrdiń birinshi orynbasary jaýapty memlekettik organdarǵa munaı ónimderiniń zańsyz aǵynyna jol bermeý, shekarada baqylaýdy kúsheıtý boıynsha egjeı-tegjeıli jospar ázirleýdi tapsyrdy.
«Baǵadaǵy alshaqtyq pen logıstıka tapshylyq paıda bolýyna ákep soqpaýy kerek. Bul másele Úkimettiń baqylaýynda», – dedi Roman Sklıar.
Energetıka mınıstrliginiń málimetinshe, naryqtaǵy jaǵdaı turaqty, otyn qory jetkilikti.
Oxu: Áskerde jańa bólimshe quryldy
Qorǵanys mınıstrliginde jasandy ıntellekt (JI) tehnologııalaryn engizýge jaýapty mamandandyrylǵan bólimshe quryldy. Qorǵanys mınıstrligi málimetinshe, jańa qurylym Qarýly kúshterdiń tsıfrlyq transformatsııasynyń negizgi elementine aınalady. Jańalyqty Oxu.az ınternet basylymy jazǵan.
Bólimsheniń negizgi mindeti – kólemdi derekterdi taldaý, basqarýdy avtomattandyrý. Sonymen qatar ártúrli stsenarıı boıynsha modeldeý jáne qazirgi áskerı jaǵdaıda basqarý sheshimderin jedeldetý nazarda bolady.
Bólimshe otandyq jáne halyqaralyq ǵylymı-zertteý ortalyqtary, jetekshi ýnıversıtetter, salalyq IT-kompanııalarmen yntymaqtaspaq. Bul tek ozyq tehnologııany qorǵanys salasyna engizýge ǵana emes, sonymen qatar jasandy ıntellektiniń áskerı qoldanys ulttyq mektebin qalyptastyrýǵa múmkindik beredi.
«JI engizý jónindegi bólimshe qurý kadrlyq áleýetti damytýǵa da baǵyttalǵan: zamanaýı algorıtmder men júıelermen jumys isteı alatyn ofıtser-analıtıkter men tsıfrlyq tehnologııalar salasyndaǵy mamandardy daıarlaý josparlanǵan», – dep qosty vedomstvo.