Álemdik BAQ-taǵy Qazaqstan: Referendým nátıjesi, volfram óndirisin arttyrý jáne medıtsınalyq týrızm
ASTANA. KAZINFORM – Osy aptada álemniń ár túkpirinen habar taratatyn buqaralyq aqparat quraldary Qazaqstan jaıly az jazǵan joq. Jańa Konstıtýtsııaǵa arnalǵan referendým qorytyndysyn jarııalaǵandar kóp boldy. Budan basqa AQSh pen Qazaqstannyń birlesken volfram óndirisi, Aqtaýda salynatyn bý-gaz qondyrǵysy jáne eldegi medıtsınalyq týrızm týraly aqparat bar. Tolyǵyraq Kazinform tilshisiniń sholýynan oqyńyz.
Reuters: Referendým arqyly jańa Konstıtýtsııa qabyldandy
Jeksenbi kúni ótken referendým nátıjesi halyqaralyq BAQ-tyń nazarynan tys qalmady. Reuters aqparat agenttigi Qazaqstan halqynyń tańdaýy men referendým nátıjesin jazǵan.
Eki ekzıtpol deregine sáıkes, saılaýshylardyń shamamen 87%-y jańa Konstıtýtsııany qoldaǵan. Buǵan deıin saılaý komıssııasy daýys berýge qatysý deńgeıin 73% dep habarlaǵan bolatyn.
Jańa Konstıtýtsııa parlament qurylymyn ońtaılandyryp, 1996 jyly alynyp tastalǵan vıtse-prezıdent qyzmetin qaıta engizedi. Sonymen qatar prezıdentke vıtse-prezıdentti, sondaı-aq birqatar mańyzdy laýazymdy tulǵany taǵaıyndaý quqyǵyn bermek.
Eski de, jańa da Konstıtýtsııalarda prezıdentti bir ǵana jetijyldyq merzimge saılaý bekitilgen. Bul shekteýdi Qasym-Jomart Toqaev 2022 jyly engizgen.
Ótken aptada Toqaev kelesi prezıdent saılaýy onyń ókilettik merzimi aıaqtalatyn ýaqytta – 2029 jyly ótetinin aıtty.
Report: Qazaqstan men Qytaı bý-gaz qondyrǵysyna ınvestıtsııa salady
Energetıka mınıstrligi men «Aqtaý energetıka kompanııasy» JShS Aqtaý qalasynda qýaty 160 MVt bolatyn bý-gaz qondyrǵysyn (PGÝ) salý jónindegi ınvestıtsııalyq kelisimge keldi. Jańalyqty Report aqparat agenttigi taratty.
Qujatqa Energetıka mınıstri Erlan Aqkenjenov pen «Aqtaý energetıka kompanııasy» JShS-nyń basshysy Ge Lıchýn qol qoıdy. Jobanyń jalpy quny shamamen 108 mlrd teńgeni quraıdy, qarjylandyrýdyń 70%-yn qytaılyq seriktes qamtamasyz etedi.
Mańǵystaý atom energetıkalyq kombınaty alańynda salynatyn bý-gaz qondyrǵysyn iske qosý 2027 jyldyń maýsymyna josparlanǵan.
Kelisimge sáıkes, 300-den astam jumys orny ashylady jáne qazaqstandyq mamandarǵa Qytaıdyń salalyq joǵary oqý oryndarynda «elektr energetıkasy» mamandyǵy boıynsha magıstratýrada bilim alý úshin jyl saıyn granttar bólinedi. Budan bólek, kadrlardyń biliktiligin arttyrý, úzdiksiz oqytý júıesi engiziledi.
Aıta keteıik, Aqtaý energetıka kompanııasy 2024 jyly Qytaıdyń iri energetıkalyq korporatsııalarynyń biri China Huadian Corporation kompanııasymen birlesip qurylǵan.
Caspianpost: «Taý-Ken Samuryq» pen Cove Capital volfram óndirisin iske qosady
Qazaqstannyń «Taý-Ken Samuryq UKT» AQ men amerıkalyq Cove Capital elde volfram óndirisin damytýdy josparlap otyr. Joba tolyq óndiristik tizbekti qamtıdy – ken óndirýden bastap sońǵy ónim, ıaǵnı ammonıı paravolframatyn (APT) shyǵarýǵa deıingi kezeńdi qamtamasyz etedi. Aqparatty Caspianpost jarııalady.
Kelissózderdiń ózekti baǵytynyń biri – Qaraǵandy oblysynyń Shet aýdanyndaǵy «Soltústik Qatpar» jáne «Joǵarǵy Qaıraqty» ken oryndaryn ıgerý jobasy. Atalǵan joba amerıkalyq Cove Capital kompanııasymen birlesip iske asyrylýda.
13 aqpanda taraptar satyp alý-satý shartyna jáne birlesken ıgerý jónindegi quryltaı qujatyna qol qoıǵan bolatyn. Kelisim Qasym-Jomart Toqaev pen Donald Tramp patronajymen jasalyp, eki el arasyndaǵy strategııalyq mańyzdy mıneraldar boıynsha kelisim aıasynda bekitildi.
«Taý-Ken Samuryq UTK» AQ basqarma tóraǵasy Narıman Ábsámetovtiń málimetinshe, «Soltústik Qatpar» men «Joǵarǵy Qaıraqty» – álemdegi asa iri volfram ken oryndarynyń qatarynda.
Kelisim talaptaryna sáıkes, ınvestor eki baıytý fabrıkasy men bir metallýrgııalyq zaýyttyń qurylysyna 1,1 mlrd dollar kóleminde ınvestıtsııa quıady. Joba tolyq júzege asqan kezde myńǵa jýyq adam jumyspen qamtylady. Bul rette qazaqstandyq mamandardy jumysqa tartýǵa basymdyq beriledi.
Qujatta strategııalyq qaǵıda retinde shıkizat pen jartylaı fabrıkattardy eksporttaýǵa tyıym salý normasy bekitilgen. Óndiris tek tereń óńdeýge baǵyttalady. Jobany iske asyrý kezeńinde bıýdjetke shamamen 1,5 mlrd dollar kóleminde salyq túsedi degen jospar bar.
Euronews: Qazaqstan medıtsınalyq týrızm ortalyǵyna aınalýda
Apta ishinde Euronews Qazaqstannyń medıtsınalyq týrızm áleýetine qatysty arnaıy baǵdarlama ázirledi. Onda saladaǵy statıstıka men aldaǵy jospar qamtylypty.
2024 jyly elge shamamen 80 myń sheteldik naýqas kelgen. Bılik kórsetkishti aldaǵy ýaqytta jylyna 300 myńǵa deıin arttyrýdy josparlap otyr.
2020 jyldan beri Úndistannan keletin patsıentter sany 40 ese, Qytaıdan – 24 ese, Túrkııadan – 3 ese ósken. Qazir Qazaqstanda emdelýge 50-ge jýyq elden adam keledi.
Qazaqstandaǵy medıtsınalyq qyzmet baǵasy AQSh pen Eýropamen salystyrǵanda 5–10 ese arzan. Onyń ústine munda halyqaralyq JCI akkredıtatsııasy bar klınıkalar jumys isteıdi. Astanada Ortalyq Azııadaǵy alǵashqy proton terapııasy ortalyǵy ashylǵan, ol jylyna shamamen 1000 patsıent qabyldaı alady.
