Álemdik BAQ-taǵy Qazaqstan: Prezıdent sapary, ýaqyt ózgerýi jáne logıstıkalyq termınal
Osy aptada álemdik buqaralyq aqparat quraldary Qazaqstandaǵy saǵat beldeýiniń aýysýy, Memleket basshysy Qasym-Jomart Toqaevtyń Ázerbaıjanǵa memlekettik sapary jáne Sıanda ashylǵan Qazaqstannyń jańa logıstıkalyq termınaly týraly jarysa jazdy. Tolyǵyraq Kazinform sholýshysynyń kezekti aptalyq materıalynan oqyńyz.
The Times of Central Asia: Qytaıda jańa logıstıkalyq termınal ashyldy
Qytaıdyń Sıan qurǵaq portynda jańa kólik-logıstıkalyq termınal ashyldy. Bul –Qytaıdyń «Bir beldeý, bir jol» bastamasynyń sońǵy býyny, onda Qazaqstan jetekshi seriktes bolyp sanalady. Termınalǵa Qazaqstannyń ulttyq temirjol kompanııasy «Qazaqstan temir joly» (QTJ) Huawei kompanııasymen birlesip qurǵan ınnovatsııalyq ortalyq ta kiredi. Bul týraly The Times of Central Asia jazdy.
Basylymnyń málimetinshe, ortalyq «Bir beldeý, bir jol» bastamasynyń jańa Smart Railway jobasynyń bir bóligi bolyp sanalady.
Sonymen qatar basylym Qazaqstan Prezıdenti Qasym-Jomart Toqaevtyń sózin keltirdi.
Bul joba Transkaspıı halyqaralyq kólik dálizin damytýǵa jańa serpin bermek. Sondaı-aq Eýrazııadaǵy saýda-ekonomıka yntymaqtastyǵyn nyǵaıta túsedi dep sanaımyn, – dep túsindirdi Qasym-Jomart Toqaev.
Qytaıdyń eń iri Sıan qurǵaq porty Shensı qalasyn Ortalyq Azııa jáne Eýropamen baılanystyrady. Sıandaǵy qazaqstandyq termınaldyń ótkizý qabileti jylyna 66 500 TEU (jıyrma fýtqa teń) asady. Bul Qazaqstanǵa Eýrazııadaǵy úlken tranzıttik hab retindegi áleýetin budan da arttyrýǵa múmkindik beredi.
Trend.az: Qazaqstannyń temirjol salasy tsıfrlyq jarysqa qosylýy kerek – Toqaev
Memleket basshysynyń Sıandaǵy termınaldyń ashylý saltanatyna qatysqanyn ázerbaıjandyq Trend.az basylymy da jazdy.
Qazaqstanda ozyq IT-sheshimderdi engizý úshin berik negiz qalyptasqan. Otandyq temirjol salasy «tsıfrlyq jarysqa» ýaqyt ozdyrmaı qosylýǵa tıis. Buǵan belgili bir deńgeıde ázirlik bar ekenin kórip otyrmyz. Tsıfrlandyrýdy jedeldetý esebinen taıaý arada tasymal tıimdiligin arttyrý jáne shyǵyndardy qysqartý mindeti tur, – dep keltirdi basylym Qasym-Jomart Toqaevtyń sózin.
Bul mindetti oryndaý úshin Toqaev otandyq kompanııalardy tartý qajet dep sanaıdy.
Trend.az: Qazaqstan Prezıdentiniń Ázerbaıjanǵa saparynyń kúni men baǵdarlamasy belgili boldy
Qazaqstan Prezıdenti Qasym-Jomart Toqaev 11-12 naýryzda Ázerbaıjanǵa memlekettik saparmen baratynyn jergilikti agenttik jazdy.
Basylymnyń málimetinshe, bul týraly seısenbide Trend-ge Qazaqstannyń Ázerbaıjandaǵy elshisi Álim Baıel habarlaǵan.
...Eki kúndik sapar barysynda Qazaqstan men Ázerbaıjan arasyndaǵy yntymaqtastyq týraly birqatar ekijaqty qujattarǵa qol qoıý josparlanǵan, – dep keltirdi agenttik dıplomattyń sózin.
Álim Baıeldiń aıtýynsha, sapar aıasynda Qazaqstan Prezıdenti Fızýlıge de baryp, Qurmanǵazy atyndaǵy balalar shyǵarmashylyq ortalyǵynyń ashylý saltanatyna qatysady. Sondaı-aq, elshi Qazaqstan basshysynyń sapary Ázerbaıjandaǵy kezekten tys prezıdent saılaýynan keıingi shetel memleketi basshysynyń alǵashqy sapary bolatynyn atap ótti.
The Straits times: Qazaqstan 1900 mıl qashyqtyqta biryńǵaı ýaqyt beldeýin engizedi
Qazaqstan tutynýshylary bankterden, uıaly baılanys operatorlarynan jáne basqa da qyzmet provaıderlerinen 1 naýryzda eldiń basym bóligi basqa ýaqyt beldeýine aýysatyndyqtan tehnıkalyq aqaýlar bolýy yqtımal degen habarlamalar aldy. Bul týraly The Straits times jazdy.
Basylymnyń málimetinshe, kólemi jaǵynan Batys Eýropamen birdeı Qazaqstanda biryńǵaı ýaqyt beldeýin ornatý úshin kóptegen aımaqtar beısenbi tún ortasynda saǵatty bir saǵatqa keri qoıyp, osylaısha búkil el UTC+5 ýaqyt beldeýine aýysady.
Osy kúnge deıin bul ýaqyt beldeýinde eldiń tek batys aımaqtary ǵana bolsa, basqalary, sonyń ishinde Astana men Almaty sekildi iri qalalar bir saǵatqa alda boldy. Reseı jáne Qytaımen shektesetin Qazaqstan shyǵystan batysqa qaraı 3000 shaqyrymǵa (shamamen 1900 mıl) sozylyp jatyr, – dep jazdy agenttik.
Daryo: 2023 jyly Qazaqstanda 148 myń avtokólik shyǵaryldy, bul ótken jyldan 30%-ǵa kóp
Sońǵy birneshe jylda Qazaqstanda avtomobıl ónerkásibi aıtarlyqtaı ósti. Tek 2023 jyldyń ózinde elde 148 myńnan astam kólik shyǵaryldy, bul ótken jylmen salystyrǵanda 30%-ǵa kóp. Bul ósim eldiń ekonomıkasyn ártaraptandyrý saıasatynyń perspektıvaly nátıjeleriniń dáleli bolyp sanalady, dep jazdy ózbekstandyq daryo.uz qazaqstandyq Astana Times basylymyna silteme jasap.
Ótken jyly ulttyq ekonomıka 5,1 paıyzǵa ósti. 2023 jyldyń alǵashqy 10 aıynda mashına jasaý salasy 27%-ǵa artty. Qazaqstannyń Ulttyq ekonomıka mınıstrliginiń habarlaýynsha, barlyq salanyń ishinde avtomobıl ónerkásibi osy kezeńde eń joǵary ósim – 42%-dy kórsetti. Jańa óndiris oryndarynyń ashylýy salanyń qarqyndy damýyna aıtarlyqtaı yqpal etti, – dep jazdy basylym.
