Álemdik BAQ-taǵy Qazaqstan: Parlament saılaýy, Aqjan, $6,2 mlrd ınvestıtsııa jáne mekteptegi JI
ASTANA. KAZINFORM — Bul aptada álemdik aqparat keńistiginde Qazaqstanǵa qatysty jańalyq azaıǵan joq. Tamyzda ótetin Parlament saılaýy, Qytaımen birlesip sý mamandaryn ázirleý bastamasy jáne ońtústik óńirdegi jel elektr stantsııasynyń qurylysy týraly málimet tarady. Mektepterdegi jasandy ıntellekt jobalary, Astana topyraǵynda týǵan Aqjan atty erekshe jylqy jáne 6 mlrd dollardan asatyn ınvestıtsııa taqyryby da qozǵalǵan. Tolyǵyraq Kazinform tilshisiniń sholýynan oqyńyz.
Reuters: 23 tamyzda parlament saılaýy ótedi
Qazaqstanda 23 tamyzda kezekten tys parlament saılaýy ótedi. Bul týraly Prezıdent Qasym-Jomart Toqaev sársenbi kúni jańa Konstıtýtsııanyń kúshine enýine baılanysty qol qoıǵan jarlyqta aıtylǵan. Memleket basshysynyń sózin Reuters taratty.
Jańa Konstıtýtsııaǵa sáıkes, Qazaqstannyń eki palataly Parlamenti yqshamdalyp, bir palataly zań shyǵarýshy organǵa aınalady. Sonymen qatar vıtse-prezıdent laýazymy engizilip, saılaýdan keıin taǵaıyndaý bolady.
Saspianpost: Qazaqstan men Qytaı sý salasynyń mamandaryn daıarlaıdy
Qazaqstan men Qytaı sý sharýashylyǵy salasyna joǵary bilikti maman daıarlaý isin birlese qolǵa alady. Saspianpost-tyń jazýynsha, qyrkúıek aıynda Qazaq ulttyq sý sharýashylyǵy jáne ırrıgatsııa ýnıversıteti Soltústik Qytaı sý resýrstary jáne gıdroenergetıka ýnıversıtetimen bilim baǵdarlamasyn iske qosýdy josparlap otyr. Qazaqstandyq stýdentter qytaılyq oqý ornynda tegin bilim alýy úshin arnaıy granttar bólinedi.
Bilim berý baǵytyndaǵy taǵy bir mańyzdy joba Taraz qalasynda iske asyrylmaq. Qazirgi tańda Qazaq sý sharýashylyǵy ǵylymı-zertteý ınstıtýtynyń bazasynda Qytaıdyń «Úsh shatqal» elektr energetıkasy kásiptik kolledjimen birlesken zamanaýı oqý ortalyǵyn ashý máselesi pysyqtalyp jatyr.
The Times of Central Asia: Masdar kompanııasy Qazaqstanda jel elektr stantsııasyn salýda
Jambyl oblysynda Ortalyq Azııadaǵy iri jel elektr stantsııasynyń qurylysy bastaldy. Joba jańartylatyn energııa kózderi salasyndaǵy jetekshi uıym — Masdar kompanııasymen birlesip júzege asyrylyp jatyr. AqparattyThe Times of Central Asia bólisti.
Quny 1,4 mıllıard dollardy quraıtyn jobany qazaqstandyq kompanııalar men Birikken Arab Ámirlikteriniń ınvestorlarynan quralǵan konsortsıým júzege asyrady. Joba aktsııasynyń 40 paıyzy — Masdar kompanııasyna, 40 paıyzy — W Solar kompanııasyna, 18 paıyzy — «Samuryq-Qazyna» qorynyń quramyna kiretin Qazaq Green Power kompanııasyna jáne 2 paıyzy — Qazaqstannyń ınvestıtsııalyq damý qoryna tıesili.
Qurylysqa arnalǵan kapsýla salý rásimi 29 maýsym kúni telekópir formatynda ótti. Al jel elektr stantsııasyn paıdalanýǵa berý 2029 jyldyń úshinshi toqsanyna josparlanǵan.
Report: 6,2 mlrd dollar ınvestıtsııa tartylady
Qazaqstan aldaǵy eki jylda 200-den astam óndiris ornyn iske qosýdy josparlap otyr. Osy maqsatqa shamamen 3 trıllıon teńge (6,2 mlrd dollar) ınvestıtsııa tartylmaq. Bul týraly Prezıdent Qasym-Jomart Toqaev Parlament palatalarynyń birlesken otyrysynda málimdedi.
Report dereginshe, Qazaqstanda eńbekke qabiletti azamattardyń shamamen jartysy shaǵyn jáne orta bıznes salasynda eńbek etedi. Sońǵy bes jylda bul sektorda jumyspen qamtylǵandar sany 4,5 mln adamǵa jetip, shaǵyn jáne orta bıznestiń jalpy ishki ónimdegi úlesi 40 paıyzdan asty.
Euronews: Qazaqstan jasandy ıntellektini mektepke qalaı engizip jatyr?
Qazaqstan bilim berý júıesine jasandy ıntellektini kezeń-kezeńimen engizýdi bastady. Prezıdent Qasym-Jomart Toqaev Úkimetke osy baǵyttaǵy jol kartasyn bekitýdi tapsyrdy. Alǵashqy kezeńde joba qala men aýyl mektepteri arasyndaǵy bilim sapasynyń alshaqtyǵyn azaıtýǵa baǵyttalady. Aqparatty Euronews jarııalaǵan.
Bıylǵy qyrkúıekte 500 aýyl mektebinde pılottyq joba iske qosylady. Olar joǵary jyldamdyqty ınternetpen jáne zamanaýı tsıfrlyq ınfraqurylymmen qamtamasyz etilmek. Joba 2027 jyldyń mamyryna deıin jalǵasady.
Mekteptegi jasandy ıntellekt oqýshylardyń úlgerimin taldap, jeke oqý traektorııasyn qalyptastyrýǵa septesýi kerek. Sarapshylardyń boljamynsha, JI muǵalimderdiń ákimshilik júktemesin 30%-ǵa qysqartýy múmkin.
Búginde 350 myńnan astam pedagog JI-di qoldaný boıynsha oqytýdan ótti, 100 myńnan astam muǵalim OpenAI ázirlegen GPT-edu platformasyna qol jetkizgen. 2029 jylǵa qaraı Qazaqstan úlgerimi tómen oqýshylardyń sanyn azaıtyp, JI oqytý tásilin bilim berý júıesine tolyq engizýdi josparlap otyr.
Jiji Press: Aqjan — Uly dalanyń mádenı fenomeni
Astana topyraǵynda týǵan Aqjan atty qylquıryq baıtal shyǵar jastan asty. Ǵanatly jáne Tabys degen túrikmenniń taza qandy aqaltekesinen týǵan tekti tóldiń sýreti áleýmettik jelide at kórkiniń sımvolyndaı tarap júr. Bul týraly Japonııanyń Jiji Press aqparat portaly habarlady.
— Aqjan — óte sırek kezdesetin qylańboz tústi jylqy. Túginiń túsi jaryqpen qanyǵyp, erekshe kórik berip turady. Mundaı reńk kóziniń túsin de qanyq ete túsip, jer betinde kezdespeıtin tym erekshe jylqy maly qylyp kórsetedi, — dep jazady basylym.
