Álemdik BAQ-taǵy Qazaqstan: Parıjdegi qazaq kınosy, Koreıamen baılanys jáne áskerı daıyndyq
ASTANA. KAZINFORM — Ádettegideı jahandaǵy aqparat taratýshy ınternet-basylymdar elimizdegi kóp jaıǵa úńildi. Onyń ishinde Qazaqstannyń 2040 jylǵa qaraı qansha munaı óndiretini, Parıjdegi qazaq kınosy kúni týraly keń qaýzalǵan. Prezıdenttiń Ońtústik Koreıaǵa sapary aıasynda jasalǵan kelisimder men Ujymdyq qaýipsizdik týraly shart uıymynyń el aýmaǵyndaǵy oqý-jattyǵýy týraly da aıtylypty. Tolyǵyraq Kazinform tilshisiniń sholýynan oqyńyz.
Reuters: Qazaqstan men Ońtústik Koreıa atom energetıkasy boıynsha memorandýmǵa qol qoıdy
Ońtústik Koreıa men Qazaqstan seısenbi kúni atom energııasyn beıbit maqsatta paıdalaný salasyndaǵy yntymaqtastyq týraly ózara túsinistik memorandýmyna qol qoıdy. Sondaı-aq taraptar saýda, energetıka, paıdaly qazbalar jáne jasandy ıntellekt salalarynda birlesip jumys isteýge ýaǵdalasty. Seýldiń baspasóz qyzmetiniń málimetin Reuters taratqan.
Atom energetıkasy salasyndaǵy ózara túsinistik týraly memorandým seısenbi kúni qol qoıylǵan 13 qujattyń qataryna endi. Qujattar munaı, ǵylym jáne tehnologııa salalaryndaǵy baılanysty da qamtıdy.
Jiji Press: Parıjde Qazaqstan kınosy kúnderi bastaldy
17-19 qyrkúıek kúnderi Qazaqstan mádenıeti kúnderi aıasynda Parıjde Qazaqstan kınosy kúnderi bastaldy. Sharada otandyq klassıkalyq kınotýyndylar men zamanaýı fılmder usynylmaq. Jańalyqty Jiji Press bólisti.
Kıno kúnderi kórnekti rejısser Abdolla Qarsaqbaevtyń «Alty jasar Alpamys» fılmimen bastaldy. Rejısserdiń týǵanyna 100 jyl tolýyna oraı týyndynyń 4K formatynda restavratsııadan ótken nusqasy kórsetilgen.
Zamanaýı otandyq kınolarlyń qataryndaǵy «Qaitadan» jáne «Igromanka» fılmderi de kórermenge jol tartty. Eki týyndy memlekettik qoldaýmen túsirilgen.
Xinhua News: 2040 jylǵa qaraı munaı óndirý kólemi artady
Qazaqstan 2040 jylǵa qaraı munaı óńdeý kólemin eki eseden astam arttyryp, munaı óndirý men óńdeý araqatynasyn qazirgi 5:1 kórsetkishinen 2,5:1-ge deıin qysqartýdy josparlap otyr. Bul týraly Energetıka mınıstrliginiń Munaı óńdeý jáne munaı ónimderin óndirý basqarmasynyń basshysy Nazym Bekbatyrova málimdegen. Resmı derekti qytaılyq Xinhua agenttigi jarııalady.
Qazaqstanda 2025-2040 jyldarǵa arnalǵan munaı óńdeý salasyn damytý tujyrymdamasy bekitildi. Onda munaı óńdeý qýaty, munaıdy óńdeý tereńdigi jáne munaı sapasyna qatysty jospar qamtylǵan.
Aıta keterligi, munaı óndirý kólemin ulǵaıtý úshin Qazaqstanǵa 15-19 mlrd dollar kóleminde ınvestıtsııa qajet.
TASS: «Shep-2026» oqý-jattyǵýynyń ekinshi kezeńi bastaldy
Qazaqstandaǵy «Kóktal» oqý-jattyǵý polıgonynda Ortalyq Azııa óńiriniń «Shep-2026» oqý-jattyǵýy bastaldy. Reseılik TASS aqparat agenttiginiń habarlaýynsha, shara týraly UQShU Birikken shtabynyń baspasóz hatshysy Vladıslav Şegrıkovıch málimdegen.
Oqý-jattyǵý 13-18 qyrkúıek aralyǵynda ótti. Onda 1500-ge jýyq áskerı qyzmetshi jáne 300-den astam qarý-jaraq, áskerı jáne arnaıy tehnıka, onyń ishinde 115 ushqyshsyz ushý apparaty qamtylǵan. Oǵan qosa kishi shabýyldaý toptary mototsıklderdi, kvadrotsıklderdi jáne «Ulan-1» jáne «Ulan-2» taktıkalyq kólikterin paıdalandy.
Praktıkalyq is-qımyldar taýly-shóleıt jerlerdiń erekshelikterin eskere otyryp júrgizilgen jáne Qazaqstannyń Shekara qyzmeti men Ulttyq ulany qosylǵan.
