Álemdik BAQ-taǵy Qazaqstan: Pákistanmen baılanys, Baıqońyrdaǵy týrızm jáne JI mınıstrligi
ASTANA. KAZINFORM – Bul aptada álemdik medıa keńistikte Qazaqstanǵa qatysty jańalyq tolastaǵan joq. Eldegi elektr energııasymen qamtý jobalarynyń jaıy, Syrtqy ister mınıstri Murat Nurtileýdiń Islamabadqa sapary aıasynda qol jetkizgen kelisimder keń tarady. Prezıdent Joldaýynda aıtylǵan jasandy ıntellekt mınıstrligin qurý usynysy men Baıqońyrdyń týrızm áleýeti týraly aqparat ta ushyrasty. Tolyǵyraq Kazinform tilshisiniń sholýynan oqyńyz.
Oxu: Jasandy ıntellekt mınıstrligi qurylady
Apta basyndaǵy Prezıdent Joldaýynan keıin ondaǵy aıtylǵan taqyryptar álemdik BAQ-ta talqyǵa tústi. Sonyń ishinde jasandy ıntellekt mınıstrligin qurý ıdeıasy týraly aqparat lezde kózge túsken edi. Jańalyqty ázerbaıjandyq Oxu ınternet basylymy da bólisti.
8 qyrkúıekte Qazaqstan halqyna Joldaýynda Prezıdent Qasym-Jomart Toqaev Jasandy ıntellekt jáne tsıfrlyq damý mınıstrligin qurý týraly málimdedi. Memleket basshysynyń aıtýynsha, jańa vedomstvo qazirgi beıindi mınıstrliktiń negizinde qurylmaq. Ony vıtse-premer basqarady.
«Jańa tehnologııalyq qalyptyń ajyramas bóligine aınalý úshin búkil memlekettik basqarý júıesin qaıta quryp, onyń azamattar múddesine saı bolýyn qamtamasyz etý, sondaı-aq ashyqtyǵy men tıimdiligin eselep arttyrý kerek.Sondyqtan qazirgi quzyrly mınıstrliktiń negizinde Jasandy ıntellekt jáne tsıfrlyq damý mınıstrligin qurý qajet dep sanaımyn. Jańa mınıstrlikti Premer-mınıstrdiń orynbasary deńgeıindegi maman basqarýy kerek», – dedi Prezıdent.
Sondaı-aq ol Kazaqstan úsh jyldyń ishinde tolyq tsıfrlyq memleketke aınalýy tıis ekenin atap ótti. Osy maqsatta Tsıfrlyq kodeksti jedel qabyldaý qajet. Bul qujat tsıfrlandyrý strategııasyn aıqyndaıtyn negizgi akt bolady: jasandy ıntellekt pen platformalyq ekonomıkany damytý, úlken derekterdi paıdalaný jáne basqa da baǵyttar qamtylmaq.
Report: 2035 jylǵa deıin elektr energııasyna tapshylyq máselesi tolyq sheshiledi
2035 jylǵa qaraı el ekonomıkasynyń elektr energııasyna qajettiligi tolyq óteletin bolady. Energetıka mınıstri Erlan Aqkenjenovtiń aıtýynsha, bul kezeńge deıin qosymsha 26 GVt-tan astam jańa óndirýshi qýattardy engizý kózdelgen. Mınıstrdiń Úkimet otyrysynda aıtqan sózin Report bólisti.
– Mınıstrlik eldegi tapshylyqty óteý jáne eksporttyq áleýetti arttyrý úshin 2035 jylǵa deıin qosymsha 26 GVt-tan astam jańa óndirýshi qýattardy engizýdi kózdeıtin elektr energııasy salasyn damytý jónindegi is-sharalar josparyn ázirledi. Osylaısha, ekonomıkanyń elektr energııasyna degen barlyq qajettiligi óteledi dep kútilýde, – dedi mınıstr.
Aqkenjenovtiń aıtýynsha, kómirtegi izin tómendetý baǵyty aıasynda balamaly energetıkany damytý jáne taza kómir tehnologııalary bazasynda kómir generatsııasyn odan ári damytý jumystary josparlanǵan.
– 33,6 mlrd. tonnany quraıtyn energetıkalyq kómirdiń rastalǵan orasan zor qory bola tura, qolda bar kómirmen jumys isteıtin energııa kózderinen tolyq bas tartý oryndy bolmaıdy. Osyǵan baılanysty, jańa kómir stantsııalaryn salý, sondaı-aq jumys istep turǵan kómir stantsııalaryn jańǵyrtý ekologııaǵa eń az áser ete otyryp, ekologııalyq talaptar men normalarǵa sáıkes keletin taza kómir tehnologııalaryna negizdeletin bolady. Mundaı jobalardyń aıqyn mysaly – Kókshetaý, Semeı jáne Óskemen qalalarynda júzege asyrylatyn jylý elektr ortalyqtary, sondaı-aq Kýrchatov jáne Ekibastuz qalalaryndaǵy iri elektr stantsııalary, – dedi ol.
Anadolu: Qazaqstan men Pákistan seriktestigi talqylandy
QR Syrtqy ister mınıstri Murat Nurtileýdiń Islamabadqa resmı sapary kezinde elaralyq baılanys jaıy jan-jaqty talqylandy. Ásirese taraptar saýda, logıstıka, qarjy, IT, aýyl sharýashylyǵy, azyq-túlik salalaryna basa kóńil bólip otyr. Bul týraly Anadolu aqparat agenttigi jazdy.
Bul saparda qazaqstandyq delegatsııa Pákistannyń prezıdenti Asıf Alı Zardarımen, premer-mınıstri – Shahbaz Sharıfpen, syrtqy ister mınıstri –– Muhammad Ysqaq Darmen kezdesedi.
– Qazir elderimiz arasyndaǵy saýda-ınvestıtsııalyq qatynastarda oń úrdisterdi baıqap otyrmyz. Qazaqstan Pákistanmen ekonomıkalyq yntymaqtastyqty odan ári nyǵaıtýǵa múddeli. Astana ekijaqty jáne óńirlik alańdarda ózara tıimdi bastamalardy júzege asyrýǵa daıyn. 33 jyldan astam ýaqyt ishinde elderimiz mazmundy saıası dıalogty qoldap, ózara senimge, ashyqtyqqa jáne gýmanıtarlyq baılanystarǵa negizdelgen berik qatynastar ornatty, – dep málimdedi mınıstr.
Jyl basynan beri Qazaqstan men Pákistan arasyndaǵy taýar aınalymy 2,5 esege ósip, 86 mln AQSh dollaryna jetken. Qazir Qazaqstannan Pákistanǵa kókónister, burshaq tuqymdastar, pııaz, sarymsaq, suly, qaraqumyq, tary jáne basqa dándi daqyldar, qara metall buıymdary eksporttalady. Al Pákistannan — tsıtrýs jemisteri, dárilik zattar, erler men áıelder kıimi, azyq-túlikter, kartop jetkiziledi. Eki el arasyndaǵy taýar aınalymyn 1 mlrd dollardan da asyrýǵa nıetti.
Kelissózder qorytyndysy boıynsha taraptar saıası dıalogty jalǵastyrýǵa, basym sektorlardaǵy birlesken jobalardy jandandyrýǵa jáne beıindi memlekettik organdar arasynda tıimdi úılestirýdi qamtamasyz etýge ýaǵdalasty. Kezdesý sońynda Qazaqstan men Pákistan syrtqy ister mınıstrlikteri arasynda 2025-2026 jyldarǵa arnalǵan birlesken is-qımyl josparyna qol qoıyldy.
Euronews: 2029 jylǵa qaraı Baıqońyrǵa jylyna 50 myń týrıst keledi
Álemniń alǵashqy ǵarysh aılaǵy sanalatyn Baıqońyr 2029 jylǵa qaraı 50 myń týrısti qabyldaıtyn shaharǵa aınalýy ǵajap emes. Aldaǵy ýaqyııa ońtústik óńirge keletin qonaqtarǵa tarıh pen tylsymǵa toly ǵarysh sapary usynylatyn bolady. Osy maqsatta glempıng, qonaqúıler men balalar lageri bar týrıstik ortalyqty damytý josparlanǵan. Aqparatty Euronews taratty.
Baıqońyrdyń týrıstik ekojúıesi damyp keledi. Reseı qalany jalǵa alýdy jalǵastyrsa da, qazirdiń ózinde 50-den astam paıdaǵa aspaıtyn nysandy Qazaqstanǵa qaıtardy. Bılik bul nysanderdy tek zymyrandy paıdalanyp qana qoımaı, týrısterge de kórsetip, jańa ortalyq ashpaq.
Qazir tarıhı mańyzy zor oryndar mańynda týrıstik ınfraqurylymǵa daıyndyq jumystary júrip jatyr. Máselen, 1961 jyly tuńǵysh ǵaryshqa attanǵan áıgili Gagarın starty bar. Dál osy jerde ımmersıvti ekspozıtsııalar, qonaqúıler, glempıng pen balalar lageri boı kótermek.