Álemdik BAQ-taǵy Qazaqstan: Ormýz buǵazyndaǵy jer telimi, ulttyq krıptorezerv jáne áleýmettik jelini baqylaý
ASTANA. KAZINFORM – Apta ishinde jahandaǵy aqparat taratýshy ınternet-basylymdar Qazaqstandaǵy saıası oqıǵalardy qapy jibermedi. Sonyń ishinde ulttyq strategııalyq krıptorezerv qurý ıdeıasy men Irannyń Ormýz buǵazy mańynan Qazaqstanǵa jer telimin bólýge kelisýi kóp jazylǵan. Májilis depýtatynyń áleýmettik jelilerdi baqylaýǵa qatysty oıy jáne Qytaımen aradaǵy júk tasymalynyń jaıy da ataýsyz qalmady. Tolyǵyraq Kazinform tilshisiniń sholýynan oqyńyz.
Report: Ulttyq krıptorezerv qurylady
Jasandy ıntellekt jáne tsıfrlyq damý mınıstrligi «Ctrategııalyq tsıfrlyq maınıngti júzege asyrý qaǵıdalary» jobasyn ázirledi. Joba 1 shildege deıin qoǵamdyq talqylaý úshin «Ashyq NQA» portalynda jarııalanǵan. Jańalyqty Report taratty.
Joba aıasynda strategııalyq tsıfrlyq maınıngti júrgizý sharttary belgilenbek. Onyń ishinde qyzmetti energetıkalyq resýrstarmen qamtamasyz etý erekshelikteri qarastyrylǵan.
Sonymen qatar memleket Ulttyq strategııalyq krıptorezerv qalyptastyrýdy josparlap otyr. Ony strategııalyq tsıfrlyq maınıng sýbektileri óndiretin tsıfrlyq aktıvterdiń esebinen ázirleıtin bolady.
Mundaı erejeler 28 mamyrdaǵy "Tsıfrlyq aktıvter ındýstrııasynyń keıbir máseleleri týraly" qaýlydan keıin qolǵa alynyp otyr.
The Times of Central Asia: Qazaqstan-Iran port ınfraqurylymyn damytady
QR Premer-mınıstriniń orynbasary – ulttyq ekonomıka mınıstri Serik Jumanǵarın Iran Islam Respýblıkasy Jol jáne qalany damytý mınıstri Farzane Sadekpen kezdesti. Kelissóz barysynda Ormýz buǵazyndaǵy Shahıd Radjaı (Bender-Abbas) portynan Qazaqstanǵa jer telimi bólinetini belgili boldy. Aqparatty The Times of Central Asia basylymy jarııalaǵan.
Oǵan qosa Iran Qazaqstanǵa Chabahar portynda jumys isteýge múmkindik berýge daıyn. Bul port Ońtústik jáne Ońtústik-Shyǵys Azııa naryǵyna tikeleı shyǵýdy qamtamasyz etedi.
Farzane Sadektiń aıtýynsha, Zahedan-Chabahar temirjol jelisi qurylysynyń 90%-dan astamy aıaqtalǵan. Nysandy iske qosý aldaǵy aılarǵa josparlanypty. Jeli iske qosylǵannan keıin Chabahar porty Úndi muhıtyn, Ortalyq Azııa men Eýropany baılanystyratyn halyqaralyq temirjol jelisine qosylady.
Caspianpost: Qazaqstan TikTok, YouTube jáne Instagram platformalaryna baqylaýdy kúsheıtýi múmkin
Májilis depýtaty Danabek Isabek balalarǵa arnalǵan tsıfrlyq kontent sapasyna qatysty másele kóterdi. Depýtattyń sózin Caspianpost bólisti.
Qazaqstan qazaq tilindegi balalar kontentin damytýǵa baǵyttalǵan memlekettik strategııa ázirleýi yqtımal. Danabek Isabektiń aıtýynsha, qazirgi ýaqytta qazaq tilindegi sapaly tsıfrlyq orta tolyq qalyptaspaǵan. Al qazaq tilindegi balalar kontenti, tanymdyq platformalar, anımatsııa, ǵylymı-aǵartýshylyq baǵdarlamalar men medıajobalar jahandyq tsıfrlyq platformalardaǵy agressıvti aqparat aǵynymen básekelese almaı otyr.
Osy oraıda depýtat balalar psıhologııasyna zııan kontentke tosqaýyl qoıýdy surap, TikTok, YouTube jáne Instagram sekildi platformalarǵa baqylaýdy kúsheıtý kerek dep málimdedi.
Xinhua: Sıan men Almatydaǵy termınaldar Qazaqstan-Qytaı yntymaqtastyǵyn tereńdete tústi
Almatydaǵy halyqaralyq qazaq-qytaı ZHETYSU logıstıkalyq termınaly jumys isteı bastaǵanyna bir jyl toldy. Taqyrypqa oraı Xinhua aqparat agenttigi memleketaralyq porttardyń jaı-kúıin baıandady.
Sıandaǵy termınal 2024 jyly, al Almatydaǵy ZHETYSU termınaly 2025 jyly iske qosyldy. ZHETYSU termınaly qysqa ýaqyt ishinde mańyzdy transshekaralyq logıstıka torabyna aınaldy. Al Qytaıdyń Sıan qalasyndaǵy Qazaqstan logıstıkalyq termınaly arqyly Qazaqstannan aýyl sharýashylyǵy ónimderi eksporttalýda.
Anadolu: Toqaev Túrki memleketteri uıymynyń rólin joǵary baǵalady
Prezıdent Qasym-Jomart Toqaev Túrki memleketteri uıymyna múshe elderdiń Joǵarǵy sot tóraǵalarymen kezdesti.
Anadolu aqparat agenttiginiń habarlaýynsha, Prezıdent baýyrlas elder yntymaqtastyǵyn nyǵaıtýda Túrki memleketteri uıymynyń róli aıryqsha ekenin jetkizgen. Sonymen qatar TMU múshe elderdiń joǵarǵy sottarynyń ekinshi konferentsııasynda sot salasyn tsıfrlandyrý máselesi talqylanatynyn aıtty.
