Álemdik BAQ-taǵy Qazaqstan: munaı jónindegi boljam, Mońǵolııaǵa arnalǵan lokomotıvter
Osy aptada sheteldik birqatar basylymda Qazaqstan týraly kóptegen materıal jarııalandy. Almatydaǵy jer silkinisi, Mońǵolııaǵa lokomotıv jetkizý jáne munaıdy óz erkimen azaıtý týraly maqalalar shyqty. Halyqaralyq baspasóz Qazaqstan týraly taǵy ne jazdy – Kazinform tilshisiniń sholýynan oqyńyz.
Reuters: Qazaqstannyń eń úlken qalasynda jer silkinisi boldy
Reuters agenttigi 2023 jyldyń 4 naýryzynda Qazaqstannyń eń iri qalasy Almatyda jer silkinisi bolyp, dabyl qaǵylǵan kezde turǵyndar kóshege qaýipsiz jerge júgirgenin habarlady.
Qazaqstannyń Tótenshe jaǵdaılar mınıstrliginiń málimetinshe, Almatyda kúshi shamamen 5 baldyq jer silkinisi boldy jáne ol kórshiles Qyrǵyzstan astanasy Bishkekte de sezildi, – dep jazdy Reuters agenttigi.
Daryo: Qazaqstanǵa 35-ten astam jańa kompanııa kóshýi múmkin
Ózbekstannyń Daryo aqparat portaly Qazaqstan úkimeti sheteldik kompanııalardy – iri kásiporyndardy kóshirip jatqanyn habarlady. Tizimde 30-dan astam elden 400-ge jýyq kompanııa bar. Basylym bul týraly Astanada ótken brıfıngte Ulttyq ekonomıka vıtse-mınıstri Baýyrjan Qudaıbergenovtiń málimdemesine silteme jasap jazdy.
Naqty nátıjelerge jettik. Búginde quny 1,5 mıllıard dollardan asatyn 41 kompanııa bar, bul kompanııalardy bárińiz bilesiz. Bul – InDriver, TikTok jáne t.b. Búginde 37 kásiporynmen jumys júrip jatyr. Ázirge qaı kompanııalar ekenin jarııalamaýymyz múmkin. Jumystyń qorytyndysy shyqqanda qosymsha aqparat beriledi, – dep keltiredi Qudaıbergenovtiń sózin Daryo.
Vıtse-mınıstr qazirdiń ózinde Qazaqstanǵa 41 kompanııa kóshirilgenin atap ótti. Al 37 kásiporyndy kóshirý jyl sońyna deıin aıaqtalady dep josparlanǵan.
Azernews: Qazaqstan 2024 jylǵa munaı óndirý boljamyn ózgertpeıdi
Azernews agenttiginiń habarlaýynsha, Qazaqstan bıligi OPEK+ kelisimi boıynsha óndirýdi qysqartý jónindegi mindettemelerine baılanysty bıylǵa munaı óndirý boljamyn qaıta qaraýdy josparlap otyrǵan joq. Bul týraly QR energetıka mınıstri Almasadam Sátqalıev málimdedi.
Boljam ózgermeıdi. Erikti mindettemeler (OPEK+ sheńberinde) birinshi jáne ekinshi toqsanda sol qalpynda qalady, onyń sońynda biz munaı naryǵyndaǵy baǵa konıýnktýrasyn jáne suranys pen usynys teńgerimin qarastyramyz. Bul kólemdi jalpy alǵanda kelesi kezeńde óteýge múmkindigimiz bar, – dep keltiredi Azernews Sátqalıevtiń sózin.
Portaldyń málimetinshe, buǵan deıin Energetıka mınıstrligi osy jyldyń sońynda elimizde munaı óndirý boljamy 90,3 mln tonna bolatynyn habarlaǵan. 2024 jyldyń naýryzynda birqatar OPEK+ eli bastapqyda birinshi toqsanǵa josparlanǵan munaı óndirýdi qosymsha erikti qysqartý sharalaryn uzartý týraly jazdy. Sondaı-aq, Qazaqstan munaı óndirýdi qosymsha erikti qysqartý merzimin ekinshi toqsanǵa deıin uzartty.
The Times of Central Asia: Qazaqstan munaı óndirýdi erikti túrde qysqartýdy táýligine 82 myń barrelge deıin uzartady
The Times of Central Asia gazetinde de Qazaqstan munaı óndirýdi erikti túrde qysqartý merzimin 2024 jyldyń ekinshi toqsanynyń sońyna deıin uzartý sheshimin qabyldaǵany týraly maqala jarııalandy. El úkimeti muny suranys pen usynys tepe-teńdigin saqtaý jáne munaı naryqtarynyń turaqtylyǵyn qamtamasyz etý úshin qabyldaǵan.
Osy keńeıtilgen bastama aıasynda 2024 jylǵy maýsymnyń sońyna deıin Qazaqstanda munaı óndirý táýligine 1,468 mln barrel bolady. Bolashaqta bul kólemder naryqtaǵy turaqtylyqty saqtaý úshin qaıtarylady, – delingen The Times of Central Asia maqalasynda.
Trend.az: Qazaqstan Mońǵolııaǵa lokomotıvter jiberedi
Ázerbaıjannyń Trend.az aqparat agenttiginiń habarlaýynsha, Qazaqstan Mońǵolııaǵa lokomotıvter jetkize bastady.
Birinshi partııamen Mońǵolııaǵa árqaısysynyń quny 4 mln dollardan asatyn tórt lokomotıv jiberildi. Indýstrııa mınıstrliginiń málimetinshe, qazaqstandyq lokomotıvterge qazirdiń ózinde alty memleket: Tájikstan, Ózbekstan, Ýkraına, Moldova, Ázerbaıjan jáne Túrikmenstan tapsyrys bergen. Mońǵolııa Qazaqstannan lokomotıv satyp alǵan segizinshi el boldy, – dep jazdy basylym QR Indýstrııa jáne qurylys mınıstrligine silteme jasap.
Agenttiktiń habarlaýynsha, 2023 jyly Qazaqstan men Mońǵolııa arasyndaǵy taýar aınalymy shamamen 133 mln dollar boldy. Qazaqstannyń Mońǵolııaǵa eksporty basym – 124,3 mln dollar, al Mońǵolııadan $8,7 mln ımport keledi.
Eureporter: Qazaqstan Antalııa dıplomatııalyq forýmyna 2024 qatysty
Eureporter 2024 jyldyń 1-3 naýryzy aralyǵynda Antalııada (Túrkııa) ótken Dıplomatııalyq forým týraly maqala jarııalady. «Dıplomatııany kúızelis kezinde ilgeriletý» taqyrybyna arnalǵan forýmǵa 100-den astam memleket basshylary jáne úkimet, syrtqy ister mınıstrleri, halyqaralyq uıymdardyń, úkimettik emes uıymdar men sarapshylyq toptardyń ókilderi qatysty.
Agenttiktiń habarlaýynsha, ashylý saltanatynda Túrkııa prezıdenti Rejep Taııp Erdoǵan kúrdeli jahandyq geosaıası jaǵdaıynda dıplomatııany kúsheıtý qajettigin aıtyp, bul máseleni sheshýdegi forýmnyń mańyzdy rólin atap ótken.
Sondaı-aq, Eureporter forýmǵa QR premer-mınıstriniń orynbasary, syrtqy ister mınıstri Murat Nurtileý qatysqanyn jazdy. «Túrki álemindegi ınstıtýttandyrý: HHІ ǵasyrdaǵy Túrki memleketteriniń uıymy (TMU)» taqyrybyna arnalǵan paneldik sessııada Murat Nurtileý Qazaqstannyń túrki álemindegi sheshýshi róline toqtalyp, onyń TMU-nyń bastamashysy jáne negizin qalaýshy múshesi retindegi mártebesin, sondaı-aq onyń aıasyndaǵy ıntegratsııany ilgeriletýdegi belsendiligi týraly aıtqan.
