Álemdik BAQ-taǵy Qazaqstan: Munaı tranzıti, qaýipsizdik yntymaqtastyǵy, dinaralyq dıalog jáne AES
ASTANA. KAZINFORM – Qyrkúıektiń orta sheginde jahandyq aqparat quraldary Qazaqstanǵa qatysty birqatar mańyzdy taqyryptardy jarııalady. Olardyń qatarynda Baký–Tbılısı–Djeıhan qubyry arqyly munaı eksportyn qaıta bastaý, Ázerbaıjanmen qaýipsizdik salasyndaǵy áriptestik, Astanada ótken álemdik dinder seziniń qorytyndylary jáne Qazaqstanda AES salý jobasyna halyqaralyq qoldaý máseleleri bar. Tolyǵyraq Kazinform agenttiginiń sholýynan oqyńyz.
Trend: Baký-Tbılısı-Djeıhan qubyry arqyly munaı jóneltý qaıta bastaldy
Qazaqstannyń ulttyq kompanııasy «QazMunaıGaz» Baký-Tbılısı-Djeıhan (BTD) munaı qubyry arqyly eksportty qaıta bastady. Bul týraly Trend agenttigi habarlady.
Kompanııanyń baspasóz qyzmetiniń málimetinshe, 13 qyrkúıekte Aqtaý portynan BTD baǵytyna 8,8 myń tonna Qashaǵan munaıy jóneltildi. Kelesi jóneltý 20 qyrkúıekte josparlanyp otyr.
Aıta keteıik, osy marshrýt boıynsha jetkizýler tamyz aıynda ýaqytsha toqtatylǵan edi. 2025 jyldyń alǵashqy 8 aıynda Baký-Tbılısı-Djeıhan baǵyty arqyly 0,9 mln tonna munaı tranzıttelgen.
2022 jyly «QazMunaıGaz» ben Ázerbaıjannyń memlekettik munaı kompanııasy SOCAR Qazaqstan munaıyn tranzıtteý týraly kelisimge qol qoıǵan bolatyn. 2024 jyly taraptar Ázerbaıjan aýmaǵy arqyly tranzıtti kezeń-kezeńimen arttyrý jóninde kelisimge kelgen.
Anadolu: Qazaqstan barlyq deńgeıde dinaralyq jáne mádenıetaralyq dıalogty qoldaıdy
Álemdik jáne dástúrli dinder lıderleriniń VIII sezi «Astana beıbitshilik deklaratsııasy – 2025» qujatyn qabyldaýmen aıaqtaldy. Prezıdent Qasym-Jomart Toqaev jabylý saltanatynda sóılegen sózinde Qazaqstannyń dinaralyq jáne mádenıetaralyq dıalogty tolyq qoldaıtynyn jáne sezdiń jahandyq dıalog alańy retindegi rólin arttyrýǵa yqpal etetinin aıtty. Bul týraly túrkııalyq Anadolu agenttigi habarlady.
Memleket basshysy ózgeristerge toly kezeńde dinı kóshbasshylardyń adamzatqa rýhanı qundylyqtar men gýmanıstik baǵdar berýi asa mańyzdy ekenin atap ótti. Onyń aıtýynsha, sezdiń qorytyndy deklaratsııasynda ortaq oılar men usynystar kórinis tapty.
Toqaev dinı nysandardy qorǵaýdyń tarıhı jad pen mádenı ártúrlilikti saqtaý úshin mańyzdylyǵyna toqtaldy. Sondaı-aq, klımattyń ózgerýine qarsy kúreste jáne jasandy ıntellektini jaýapty paıdalaný máselesinde dinı lıderlerdiń únin biriktirý qajettigin qoldady. Prezıdenttiń pikirinshe, sezd barysynda kóterilgen beıtarap ári saıasılanbaǵan biryńǵaı ún – jańa ári ádiletti álemdik tártip qurýǵa mańyzdy úles bola alady.
TASS: MAGATE Qazaqstanǵa AES salýdyń barlyq kezeńinde qoldaý kórsetýge daıyn
Atom energııasy jónindegi halyqaralyq agenttik (MAGATE) Qazaqstanǵa atom elektr stantsııasyn salýdyń barlyq kezeńinde qoldaý kórsetpek. Bul týraly reseılik TASS agenttigi habarlady.
AEHA Bas konferentsııasy aıasynda Qazaqstan Atom energııasy agenttiginiń tóraǵasy Almasadam Sátqalıev pen MAGATE Bas dırektory Rafael Grossı jumys kezdesýin ótkizdi. Kelissózderde atom energetıkasyn damytý ulttyq baǵdarlamasy, AES salý jospary, ınfraqurylymdy jetildirý jáne ıadrolyq tehnologııalardy ónerkásip, aýyl sharýashylyǵy men densaýlyq saqtaý salasynda paıdalaný máseleleri qaraldy.
MAGATE Qazaqstannyń júıeli qadamdaryn joǵary baǵalap, jobanyń barlyq kezeńinde – alań tańdaýdan bastap nysandy paıdalanýǵa berýge deıin tolyq qoldaý kórsetýge daıyn ekenin málimdedi. Sondaı-aq ýran qorlaryn tıimdi paıdalaný, jahandyq naryqqa turaqty jetkizilimder jáne ulttyq múdde men halyqaralyq mindettemelerdi úılestirý máseleleri qaraldy.
Qazaqstan AES salý úshin halyqaralyq konsortsıým qurǵanyn, ǵylymı-zertteý jobalaryn júzege asyryp jatqanyn jáne joǵary baıytylǵan otyndy qaýipsiz saqtaý nysanyn paıdalanýǵa engizgenin habarlady.
Report: Qazaqstan men Ázerbaıjan qoǵamdyq qaýipsizdik tájirıbesin bólisti
QR ІІM Ulttyq ulanynyń delegatsııasy Ázerbaıjanǵa resmı sapary barysynda qoǵamdyq tártipti qamtamasyz etý tájirıbesimen tanysty. Bul týraly Report aqparat agenttigi habar taratty.
Ulttyq ulannyń Bas qolbasshysy, ishki ister mınıstriniń orynbasary Ańsaǵan Baltabekov bastaǵan delegatsııa Ázerbaıjan ІІM basshylyǵymen jáne ishki áskerdiń qolbasshylyǵymen kezdesti. Taraptar qoǵamdyq qaýipsizdikti nyǵaıtý, uıymdasqan qylmyspen kúres jáne tájirıbe almasý máselelerin talqylady.
Kezdesý barysynda qazaqstandyq delegatsııaǵa Ázerbaıjan ІІM ishki áskeriniń qyzmeti, uıymdasqan qylmysqa qarsy is-qımyl jáne qoǵamdyq qaýipsizdikti qamtamasyz etý baǵytyndaǵy jumystar tanystyryldy. Sondaı-aq áskerı bólimderdiń qarý-jaraq pen tehnıkasy kórsetildi.
Qazaqstan delegatsııasy 2014 jyldan beri ofıtserler daıarlaıtyn Ázerbaıjan ishki áskerleriniń áskerı ınstıtýtyna baryp, oqý baǵdarlamalary men tájirıbe almasý múmkindikterin qarastyrdy.
Baltabekov eki el arasyndaǵy yntymaqtastyqty keńeıtý qajettigin atap ótti. Óz kezeginde general-leıtenant Shahın Mamedov qazaqstandyq tarappen seriktestikti damytýǵa daıyn ekenin jetkizdi.