Álemdik BAQ-taǵy Qazaqstan: munaı tranzıti, Kaspi jáne Qytaı kapıtaly, frankofonııa, Araldy qutqarý
ASTANA. KAZINFORM – Bul aptada álemdik BAQ Qazaqstanmen baılanysty birneshe baǵyttaǵy taqyryptardy kóterdi. Olar: Qytaı kapıtalynyń fınteh sektoryna kelýi, Máskeýdiń qazaq munaıynyń tranzıtine qatysty jańa ustanymy, frantsýz mádenıetiniń Ortalyq Azııadaǵy yqpaly, temirjol ınfraqurylymynyń keleshegi, sırek metall ındýstrııasy. Tolyǵyraq tilshi sholýynda.
Reuters: Qazaqstan munaıyn Germanııaǵa eksporttaý marshrýty ózgerdi
Reseı premer-mınıstriniń orynbasary Aleksandr Novak birinshi mamyrdan bastap Qazaqstan munaıy Germanııaǵa «Drýjba» qubyry arqyly emes, basqa baǵytpen tranzıtteletinin aıtqan bolatyn. Agenttik Máskeýdiń bul áreketi Ormýz buǵazyndaǵy ahýaldyń Eýropaǵa tıgizer salmaǵyn aýyrlatýy múmkin ekenin eske salady.
- «Nemister reseılik munaıdan bas tartty, sondyqtan olarda bári jaqsy», – dep jazady Reuters reseılik sheneýnikke silteme jasap.
Materıalda bul ózgeris Eýropanyń Reseı munaıy men gazynan bas tartýymen baılanysty ekeni aıtylǵan.
Bloomberg: Qytaı kapıtaly elge Kaspi.kz arqyly da kire bastady
Qytaıdyń Tencent kompanııasy Qazaqstandaǵy Kaspi.kz fınteh ekojúıesine ınvestıtsııa saldy.
- Tencent Qazaqstannyń jetekshi fınteh kompanııalarynyń biri Kaspi.kz-ke ınvestıtsııa saldy, - dep jazady Bloomberg.
Basylym bul mámileni Qytaı ınvestorlary tarapynan Ortalyq Azııadaǵy tsıfrlyq qarjy sektoryna degen qyzyǵýshylyqtyń artýymen baılanystyrady. Kaspi-diń óńirdegi eń iri platformalardyń biri ekeni atap ótiledi.
Euronews: Frantsýz mádenıeti Ortalyq Azııaǵa Qazaqstan arqyly tarap jatyr
- Frankofonııa kóktemi festıvali Ortalyq Azııada, sonyń ishinde Qazaqstanda da, mádenı aýqymyn keńeıtip jatyr, – delingen materıalda.
Euronews festıvaldiń aımaqtyń birneshe elinde ótip jatqanyn jáne mádenı baılanystardy nyǵaıtýǵa yqpal etetinin baıandaıdy. Bul Qazaqstannyń halyqaralyq mádenı alań retindegi rólin kúsheıtip otyrǵanyn kórsetedi.
Xinhua-da bizdiń nazarymyzdy aýdarǵan eki materıal jarııalandy.
Biri Qazaqstannyń temirjol ınfraqurylymyn damytýǵa basymdyq bere bastaǵany týraly.
Qazaqstan aldaǵy tórt jylda 5 myń shaqyrym jańa temirjol salýdy josparlap otyr.
– Qazaqstan temirjol tasymalynyń ótkizý qabiletin arttyrý úshin aýqymdy ınfraqurylymdyq jobalardy iske asyrýǵa nıetti, – dep habarlaıdy Xinhua.
Materıalda 2035 jylǵa qaraı tranzıttik júk kólemin jylyna 100 mln tonnaǵa jetkizý kózdelgeni aıtylǵan. Jańa jobalar júk jetkizý merzimin qysqartyp, porttardyń ótkizý qabiletin arttyratyny da baıandalǵan.
Ekinshi materıal Almatydaǵy Qytaı tiliniń kúni týraly.
Materıalda bul shara mádenı jáne bilim berý baılanystaryn damytýǵa baǵyttalǵany aıtylǵan. Mundaı bastamalar Qazaqstan men Qytaı arasyndaǵy gýmanıtarlyq yntymaqtastyqty nyǵaıtýǵa yqpal etetini atap ótiledi.
Anadolu Agency: Astanada ekologııalyq sammıt ótti
– Astanada Araldy qutqarý halyqaralyq qorynyń memleket basshylary deńgeıindegi kezdesýi ótti. Taraptar Aral óńirindegi ekologııalyq jaǵdaıdy jaqsartý jáne sý resýrstaryn tıimdi basqarý máselelerin talqylady. Sondaı-aq, óńirlik yntymaqtastyqty kúsheıtý jáne birlesken jobalardy iske asyrý qajettigi atap ótildi, – delingen materıalda.
Maqalada Ortalyq Azııa elderiniń sý resýrstary men ekologııalyq máseleler boıynsha yntymaqtastyqty kúsheıtýge nazar aýdarǵany aıtylǵan.
Anadolu Agency: Qazaqstan sırek metaldar óndirisin keńeıtýde
Qazaqstan sırek jer elementteri óndirisin ulǵaıtyp jatyr.
– Qazaqstan sırek jer elementteri ónimderiniń jelisin keńeıtýde, – dep jazady Anadolu Agency.
Materıalda bul bastama joǵary tehnologııalyq óndiristerge qajetti shıkizatqa jahandyq suranystyń ósýimen baılanysty ekeni aıtylǵan.
AZERTAC: Transkaspıı baǵyty boıynsha tranzıt ósti
Transkaspıı halyqaralyq kólik baǵyty arqyly júk tasymaly sońǵy jyldary aıtarlyqtaı artqan.
- Sońǵy bes jylda Transkaspıı halyqaralyq kólik baǵyty boıynsha tranzıt kólemi úsh esege ósti. Bul baǵyt Eýropa men Azııany baılanystyratyn mańyzdy kólik dálizine aınalyp keledi. Marshrýttyń damýy óńir elderiniń logıstıkalyq áleýetin aıtarlyqtaı arttyryp otyr, - delingen materıalda.
Azertac bul úrdis Qazaqstandy aımaqtaǵy negizgi tranzıttik býyndardyń biri retinde kúsheıtip jatqanyn aıtady.
