Álemdik BAQ-taǵy Qazaqstan: memlekettik rámizder, Tájikstanmen baılanys jáne jańa óndiris jospary

ASTANA. KAZINFORM - Maýsymnyń alǵashqy aptasynda jahandaǵy túrli aqparat quraldary Qazaqstan týraly jańalyqtardy az jazǵan joq. Sonyń ishinde Memleket basshysy Qasym-Jomart Toqaevtyń memlekettik rámizder kúnine qatysty aıtqan oı-pikiri, Tájikstanmen jańa kelisim erekshe nazarǵa tústi. Al Túrkistan oblysynda jańa óndiris nysany salynýy múmkin. Sondaı-aq qazaqstandyq jáne ırandyq kompanııalar arasynda seriktestik artyp jatqany málim boldy. Tolyǵyraq Kazinform agenttiginiń sholýynan oqyńyz.

Anadolu: Toqaev Qazaqstannyń qýatty ári progressıvti memleket ekenin aıtty

4 maýsymda Qazaqstan Prezıdenti Qasym-Jomart Toqaev memlekettik týdy kóterýdiń saltanatty rásimine qatysyp, ataýly kúnniń mańyzy jóninde sóz qozǵady. Aqparatty túrkııalyq Anadolu agenttigi jazdy.

Aldymen Memleket basshysy memlekettik rámizder kúnimen halyqty quttyqtap, bul merekeniń el úshin aıryqsha mańyzǵa ıe ekenin atap ótken.

– Ult rámizderi – Táýelsizdigimizdiń kıeli boıtumary. Eltańba, Tý jáne Ánuran – myzǵymas memlekettigimizdiń belgisi. Qasterli nyshandarymyz Qazaqstannyń egemen el, eńseli jurt ekenin jer júzine áıgileıdi. Baıraǵy bıik eldiń rýhy asqaq bolady. Sondyqtan biz osy meıramǵa oraı jyl saıyn kók Týymyzdy bıikke kóteremiz, – dedi Prezıdent.

Onyń sózinshe, búginde Qazaqstannyń kók Týy búkil álemge tanylǵan. Ol Birikken Ulttar Uıymy shtab-páteri ǵımaratynyń aldynda jelbirep tur. Qazaq alpınısteri týdy álemniń eń bıik shyńdaryna tikti, sportshylar ony halyqaralyq jarystarda mártebeli tuǵyrǵa kóterdi.

Prezıdent bıyl Qazaqstan áskerı qyzmetshileri BUU týy astynda alǵash ret derbes bitimgershilik mıssııa oryndaǵanyn eske saldy. «Azamattarymyzdyń, memleketimizdiń osyndaı jetistikteri Qazaqstannyń qýatty ári jasampaz el ekenin kórsetedi», – dedi Memleket basshysy.

– Eltańbamyz, kók Týymyz ben Ánuranymyz ár azamattyń júreginen erekshe oryn alady. Bul – naǵyz otanshyldyq belgisi. Ult nyshandary – halqymyzdyń bolmys-bitiminiń aınasy, jarqyn bolashaǵymyzdyń kepili, – dedi Toqaev.

Sondaı-aq Prezıdent Konstıtýtsııa – qoǵamymyzdyń negizgi qaǵıdattaryn aıqyndaıtyn basty qujat ekenin aıtty. Ata zań rýhyna saı, Qazaqstan Zań men Tártip ústemdigin ornatyp, aýqymdy reformalardy birtindep júzege asyrýda.

Ol kók Týdyń astynda ártúrli etnostardyń beıbit jáne kelisimde ómir súrip jatqanyn atap ótti. Qasym-Jomart Toqaev jańa jetistikterge tek birlik arqyly ǵana qol jetkizýge bolatynyn alǵa tartty. Saltanatty rásim barysynda Qorǵanys mınıstrligi, UQK, Іshki ister mınıstrligi men Tótenshe jaǵdaılar mınıstrliginiń oqý oryndaryn úzdik bitirgen 14 túlek Prezıdent – Qazaqstan Qarýly Kúshteriniń Joǵarǵy Bas Qolbasshysynyń qolynan ofıtserlik pogon aldy.

Іs-shara sońynda Memlekettik kúzet qyzmeti, Qorǵanys mınıstrligi jáne Іshki ister mınıstrliginiń Ulttyq ulanynyń qurmet qaraýyl rotalary Memleket basshysy men saltanatty jıynǵa qatysýshylardyń aldynda sap túzep ótti.

Hovar: Qazaqstan men Tájikstan kedendik aqparat almasý týraly Hattamanyń tehnıkalyq sharttaryna qol qoıdy

Eki eldiń aldyn ala kedendik aqparat almasý týraly Hattamanyń tehnıkalyq sharttaryna qol qoıǵanyn tájikstandyq Hovar ulttyq aqparat agenttigi habarlady.

Buǵan deıin habarlanǵandaı, Tájikstan Respýblıkasynyń Úkimeti janyndaǵy Keden qyzmeti delegatsııasy Almatyda ótken Ortalyq Azııa elderi men Qytaı Halyq Respýblıkasynyń keden organdary basshylarynyń ekinshi kezdesýine qatysty. Іssapar aıasynda tájik delegatsııasy Qazaqstannyń Qarjy mınıstrligine qarasty Memlekettik kirister komıtetiniń basshylyǵymen ekijaqty kelissózder júrgizdi.

Kelissózderge Tájikstan Keden qyzmetiniń basshysy Hýrshed Karımzoda jáne Qazaqstan Memlekettik kirister komıtetiniń tóraǵasy Jandos Dúısembıev tóraǵalyq etti.

Qujatqa qol qoıylýy kedendik ákimshilendirý salasyndaǵy ekijaqty yntymaqtastyqtyń nyǵaıa túskenin kórsetedi. Bul taýarlar qozǵalysy kezinde derektermen tıimdi almasýǵa, táýekelderdi ýaqytyly taldap, baǵalaýǵa jáne tranzıttik áleýetti arttyrýǵa múmkindik beredi.

Azertaq: Túrkistanda tikushaqtar men ushqyshsyz ushý apparattaryn shyǵaratyn zaýyt salý josparlanýda

Adam men júk tasymaldaýǵa arnalǵan drondardy qosa alǵanda, tikushaqtar men ushqyshsyz ushý apparattaryn shyǵaratyn jańa zaýyt Qazaqstannyń Túrkistan oblysynda salynýy múmkin. Bul habardy Ázerbaıjannyń Azertaq basylymy usynǵan.

Agenttik Túrkistan oblysy ákiminiń baspasóz qyzmetine silteme jasap, aımaq basshysy Nuralhan Kósherov pen ınvestor ókili kezdesip, jobany júzege asyrý sharttaryn talqylaǵanyn jazdy.

Sheteldik kompanııa Túrkistan oblysyna shamamen 290 mıllıon dollar kóleminde ınvestıtsııa salmaq. Zaýytta 150-ge jýyq jańa jumys orny ashylady dep kútilýde. Bul óńirlik ónerkásiptiń jańa baǵyttaryn damytýǵa serpin beredi.

Kásiporyn azamattyq maqsattaǵy jáne arnaıy úlgidegi tikushaqtar men drondardy shyǵarady. Olar logıstıka, aýyl sharýashylyǵy, týrızm, ınfraqurylymdy baqylaý salasynda qoldanylmaq.

Joba ekonomıkadaǵy qarqyndy damyp kele jatqan tómengi avıatsııa sektory – 3000 metrge deıingi bıiktikte ushatyn apparattarǵa baǵyttalǵan. Bul qalalyq áýe tasymaly, júk jetkizý, tótenshe kómek kórsetý, sondaı-aq aýyl sharýashylyǵy men ónerkásip salalarynda drondardy paıdalanýǵa jol ashady.

Trend: Iran kompanııasy Qazaqstandaǵy kásiporynda tehnıkalyq qyzmet kórsetpek

Irandyq Ascotec holdıngi men Qytaıdyń TCS kompanııasy Qazaqstanda Pered tehnologııasy boıynsha gýbka temirin óndirýge qatysty qyzmet kórsetý jóninde yntymaqtastyq týraly kelisimge qol qoıdy.

Trend agenttiginiń habarlaýynsha, bul kelisimge qol qoıýǵa arnalǵan is-shara Tegeranda ótti. Oǵan Irannyń ónerkásip, shahta jáne saýda mınıstriniń orynbasary Vadjıhýlla Djafarı, Shahtalar men ken óndirisin damytý jáne qaıta qurý uıymynyń (IMIDRO) tóraǵasy Muhammed Agadjanlý men basqa da resmı tulǵalar qatysqan.

Іs-sharada Ascotec holdınginiń atqarýshy dırektory Amır Álı Tahırzade bul kelisimdi Pered tehnologııasy boıynsha alǵashqy ınjenerlik yntymaqtastyq úlgisi dep atady. Onyń aıtýynsha, bul kelisim Irannyń bolat óndirisi salasyndaǵy tehnologııalyq damýynda mańyzdy qadam bolyp sanalady.

Tahırzade kelisim aıasynda Qazaqstandaǵy gýbka temiri óndirisine arnalǵan zaýytqa jylyna 800 myń tonna ónim shyǵaratyn tehnıkalyq qyzmet kórsetiletinin aıtty.

Qytaılyq TCS kompanııasynyń ókili óz kezeginde ırandyq tarappen 18 jyl boıy tabysty yntymaqtastyq ornatyp kele jatqanyn jáne Qazaqstandaǵy jańa jobalar aıasynda bul baılanysty jalǵastyrýǵa múddeli ekenin jetkizdi. Kompanııa sonymen qatar Afrıka elderindegi jobalarda da ırandyq kompanııalarmen seriktestik ornatýǵa qyzyǵýshylyq kórsetken.

Іs-sharada sóz sóılegen mınıstrdiń orynbasary Vadjıhýlla Djafarı bul kelisimdi Iran men Qytaıdyń úshinshi elderdegi seriktestigin nyǵaıtýdaǵy mańyzdy qadam dep baǵalap, bul baǵyttaǵy seriktestiktiń túrli salalarda jalǵasatynynan úmit kútetinin aıtqan.

Pered tehnologııasy boıynsha gýbka temirin óndirý ırandyq mamandar ázirlegen jańa óndiristik ádisterdiń biri sanalady.