Álemdik BAQ-taǵy Qazaqstan: Malaızııa premeri, ekonomıkany yryqtandyrý, Ortalyq Azııamen taýar aınalymy $7,7 mlrd
Osy aptada álemniń buqaralyq aqparat quraldary elimizge qatysty kóp materıal jazdy. Ásirese, Malaızııa premer-mınıstri Anýar Ibragımniń Astanaǵa resmı sapary jáne ekonomıkany yryqtandyrý týraly jarlyq kóptegen BAQ-tyń nazarynda boldy. Sheteldegi basylymdar Qazaqstan týraly basqa qandaı habar taratqanyn Kazinform tilshisiniń sholýynan oqyńyz.
Sinar Harian: Malaızııa men Qazaqstan qarym-qatynasty nyǵaıtýǵa jáne jańa yntymaqtastyq múmkindikterin zertteýge kelisti
Malaızııa men Qazaqstan 1992 jylǵy 16 naýryzdan bastap qalyptasqan qarym-qatynasty odan ári nyǵaıtýǵa, sondaı-aq yntymaqtastyqtyń jańa múmkindikterin zertteýge kelisti. Bul týraly malaızııalyq Sinar Harian gazeti jazdy.
Premer-mınıstr Anýar Ibragım keshe prezıdent saraıynda (Aqorda) Qazaqstan Prezıdenti Qasym-Jomart Toqaevpen kezdesti, odan keıin tıisti delegatsııalardyń ekijaqty kezdesýi kezinde kelisimge qol jetkizilgenin aıtty. Sondaı-aq ol kezdesýde eki el arasyndaǵy saýda, ınvestıtsııa, joǵary bilim, týrızm jáne halal ındýstrııasy sııaqty ártúrli salalardaǵy yntymaqtastyqtyń keńirek talqylanǵanyn málimdedi, – dep keltirdi malaızııalyq premer-mınıstrdiń sózin Sinar Harian.
Anýar Ibragım Astanaǵa sapary týraly X jelisindegi akkaýntynda da jazǵan.
Resmı qabyldaýdan keıin Prezıdent Toqaev ekeýimiz Malaızııa men Qazaqstan arasyndaǵy qarym-qatynasqa qatysty mańyzdy máselelerdi talqylap, tórt tarmaqtan turatyn kezdesý ótkizdik, onyń barysynda sondaı-aq ózara qyzyǵýshylyq týdyratyn halyqaralyq máseleler de sóz boldy, – dedi ol X áleýmettik jelisinde.
Saya dan delegasi Malaysia menghadiri majlis sambutan rasmi oleh Presiden Kazakhstan Kassym-Jomart Tokayev di Istana Presiden (Akorda).
— Anwar Ibrahim (@anwaribrahim) May 16, 2024
Usai sambutan rasmi, saya dan Presiden Tokayev mengadakan pertemuan empat mata bagi membincangkan perkara penting terkait hubungan Malaysia… pic.twitter.com/dzYANYGXT1
Premer-mınıstr jáne Malaızııa delegatsııasyna arnalǵan keshki astan keıin, Qasym-Jomart Toqaev pen Anýar Ibragım Aqordanyń baǵynda serýendedi.
Malaızııa premer-mınıstri Qazaqstanǵa ne úshin kele jatyr.
Anadolu Agency: Qazaqstan Prezıdenti Malaızııamen ózara is-qımyl men yntymaqtastyqty damytýǵa daıyn ekenin bildirdi
Malaızııa premeri Anýar Ibragımniń elimizge sapary týraly túrkııalyq Anadolu agenttigi de habarlady.
Qazaqstan men Malaızııany uzaq jylǵy dostyq pen ózara yntymaqtastyq arqaýy baılanystyrady... Biz kóptegen mańyzdy salalarda ózara yqpaldastyǵymyz ben yntymaqtastyǵymyzdy odan ári nyǵaıtý úshin qosymsha kúsh jumsaýǵa daıynbyz, – dep keltirdi Toqaevtyń sózin basylym.
Sondaı-aq, agenttik habarlaýynsha, Anýar Ibragım Malaızııanyń Qazaqstanmen saýda-ekonomıkalyq yntymaqtastyqty nyǵaıtýǵa erekshe mán beretinin atap ótip, «damyp kele jatqan ekonomıkalyq qatynastardan barynsha paıda tabýǵa bolatynyn» aıtqan..
Naqty usynystarymyz bar. Mınıstrlerińizben ımport jáne eksport máseleleri jóninde ekijaqty kezdesý ótkizýdi josparlap otyrmyz. Malaızııanyń taýarlar naryǵy orasan zor. Qazirgi kezde bizdiń elimiz kompıýter chıpterin óndiretin óńirlik habqa aınaldy. Oǵan AQSh, Eýropa elderi, onyń ishinde Germanııa, sondaı-aq Qytaı aýqymdy ınvestıtsııa quıyp otyr. Biz óz tájirıbemizben bólisip, Sizdiń elde tabysty júzege asyrylǵan ózgeristerden úlgi alǵymyz keledi... – dep keltirdi Anadolu Anýar Ibragımniń sózin.
Deutsche Welle: Germanııanyń Qazaqstanǵa tikeleı ınvestıtsııasy rekordtyq kórsetkishke jetti
Prezıdent Qasym-Jomart Toqaev Germanııanyń kompanııalary Qazaqstandaǵy úlesin keńeıtýge múddeli ekenin aıtty. Onyń málimdeýinshe, Germanııanyń Qazaqstanǵa salǵan tikeleı ınvestıtsııasy 712 mıllıon eýrony qurady. Bul týraly Qazaqstannyń Germanııa Federatıvtik Respýblıkasyndaǵy elshiligine silteme jasap nemistiń Deutsche Welle jazdy.
Basylymnyń habarlaýynsha, Germanııanyń Qazaqstanǵa salǵan tikeleı ınvestıtsııasy 2023 jyly rekordtyq deńgeıge – 712 mıllıon eýroǵa jetti. Mundaı málimetterdi Qazaqstan Prezıdenti Qasym-Jomart Toqaev 15 mamyrda ótken Germanııa ekonomıkasy Shyǵys komıtetiniń delegatsııasymen kezdesýinde aıtty.
Bul kórsetkish 2022 jylmen salystyrǵanda 64 paıyzǵa ósti, – dep keltirdi Deutsche Welle Toqaevtyń sózin.
Eureporter: Qazaqstanda ekonomıkany yryqtandyrý sharalary týraly jarlyq jarııalandy
Qazaqstan Prezıdenti Qasym-Jomart Toqaev básekelestikti damytý, memlekettiń ekonomıkadaǵy úlesin azaıtý jáne bıznes shyǵyndaryn qysqartý arqyly kásipkerliktiń erkindigin qamtamasyz etýge baǵyttalǵan ekonomıkany yryqtandyrý sharalary týraly jarlyqqa qol qoıdy. Bul týraly Eureporter jazdy.
Basylym jarlyqtyń basty erekshelikterine toqtalyp, bes pýnktti atap ótedi. Onyń ishinde Básekelestikti qorǵaý jáne damytý agenttiginiń janynan Ulttyq jekeshelendirý ofısin qurý jospary, «Samuryq-Qazyna» Ulttyq ál-aýqat qory men onyń enshiles uıymdaryn korporatıvtik basqarý derbestigin, sapasyn jáne táýelsizdigin arttyrý, sondaı-aq olardyń satyp alý rásimderin jetildirý boıynsha sharalar qabyldanyp jatqanyn jazdy.
Sondaı-aq, Eureporter Jarlyq aıasynda ónim naryǵynda básekelestikti damytý úshin birqatar naqty sharalar qarastyrylyp, retteý saıasatyn jetildirý jáne bıznes ashý, júrgizý rásimderin yryqtandyrý sharalary usynylatynyn habarlady.
Jarlyq kásipkerlik sýbektileriniń quqyǵy men zańdy múddelerin qorǵaýdy kúsheıtýge baǵyttalǵan sharalar keshenin qamtıdy... Jarlyqty júzege asyrý ekonomıkadaǵy memlekettik sektordyń úlesin aıtarlyqtaı qysqartýǵa jáne jedeldetýge, sondaı-aq jeke kásipkerlikke kóbirek múmkindikter ashýǵa septigin tıgizedi, – dep jazdy basylym.
Taǵy bir reforma: Memlekettiń shyǵyny shekteletin boldy
Daryo: 2023 jyly Qazaqstannyń Ortalyq Azııa elderimen taýar aınalymy 7,7 mlrd dollarǵa jetti
Qazaqstannyń Ortalyq Azııa elderimen taýar aınalymy 2023 jyly 7,7 mlrd dollardy qurady. Mundaı derekti saýda jáne ıntegratsııa vıtse-mınıstri Qaırat Tórebaev 14 mamyrda Almatyda ótken 13-shi Ortalyq Azııa saýda forýmynda keltirdi. Tórebaev Ortalyq Azııadaǵy saýda baılanystaryn nyǵaıtýdyń ekonomıkalyq paıdasyn, sondaı-aq aımaqtaǵy ekonomıkalyq ósimge, jumys oryndaryn qurýǵa jáne ómir súrý deńgeıin jaqsartýǵa qosqan úlesin atap ótti. Bul týraly ózbekstandyq Daryo ınternet basylymy habarlady.
Forýmda Qazaqstannyń 131 elmen syrtqy saýda aınalymy 2023 jyly ótken jylmen salystyrǵanda 3,2%-ǵa ósip, 139,8 mlrd dollarǵa jetkeni atap ótildi. Bul saýda rásimderin jeńildetý, syrtqy ekonomıkalyq belsendilikti yntalandyrý esebinen bolyp otyr, – dep jazdy basylym.
