Álemdik BAQ-taǵy Qazaqstan: Quryltaı saılaýy, Digital Qazaqstan strategııasy jáne Lı Sıan Lýnnyń sapary
ASTANA. KAZINFORM – Bul aptada jahandaǵy ınternet-basylymdar Qazaqstanǵa qatysty jańalyqty qalys qaldyrmady. Kóbine Quryltaı depýtattaryn saılaý qorytyndysy, Sıngapýrdyń Aǵa mınıstri Lı Sıan Lýnnyń elge jasaǵan sapary men munaı-gaz salasyndaǵy ınvestıtsııa jaıy talqylanǵan. Kaspıı teńizine túsirilgen jańa keme jáne 2029 jylǵa deıingi Digital Qazaqstan ulttyq strategııasy da aqparat aǵynyna qosylypty. Tolyǵyraq Kazinform tilshisiniń sholýynan oqyńyz.
TASS: Quryltaı saılaýynyń aldyn ala qorytyndysy jarııalandy
«Ádilet», «Aýyl», Respublica, «Aq jol» jáne Jalpyulttyq sotsıal-demokratııalyq partııalary Quryltaı saılaýynda 5%-dan astam daýys jınap, zań shyǵarýshy organnan mandat aldy. Ortalyq saılaý komıssııasynyń málimetin reseılik TASS agenttigi taratty.
Ortalyq saılaý komıssııasynyń dereginshe, saılaýǵa 9,3 mln adam qatysqan, osylaısha saılaýshylardyń kelýi 74,08%-dy qurap otyr. Aldyn ala málimet boıynsha, saılaýda «Ádilet» partııasy – 71,17% , «Aýyl» partııasy – 6,26%, Respublica partııasy – 5,56%. «Aq jol» partııasy – 5,21%, Jalpyulttyq sotsıal-demokratııalyq partııasy – 5,11% daýys jınaǵan.
Jiji Press: Sıngapýrdyń Aǵa mınıstri Lı Sıan Lýn stýdenttermen kezdesti
Sıngapýrdyń Aǵa mınıstri Lı Sıan Lýn Qazaqstanǵa jasaǵan alǵashqy resmı sapary aıasynda Nazarbayev University-de qonaq dárisin oqydy. Aqparatty japondyq Jiji Press jarııalady.
Lı Sıan Lýn dáristi Sıngapýrdyń 1950 jyldardan bergi damý tarıhyna sholýdan bastap, keıin Sıngapýr ekonomıkasynyń damý tájirıbesi, Qazaqstanmen yntymaqtastyqtyń keleshegi týraly oı bólisken. Mınıstr geografııalyq jaǵdaıy men resýrstary ártúrli bolǵanymen, eki eldiń ustanymynda uqsastyq bar degen oı aıtty. Ásirese kórshilerimen tyǵyz baılanys ornatý jáne álemniń ár túkpirinen seriktes tabý qos memleketke tán erekshelik degen ustanymda.
– Sıngapýrdyń damý joly eshqashan túzý bolǵan emes. Qazaqstan men Sıngapýrdyń jaǵdaıy ártúrli. Bizdiń saıası sheshimimiz óz elimizdiń ereksheligine negizdeledi, sondyqtan Qazaqstannyń da ózge sheshimder qabyldaýy zańdy. Alaıda bárimizge ortaq bir mindet bar: ózgeristerge únemi beıimdele alatyn júıe qurý qajet, – dedi Aǵa mınıstr Lı Sıan Lýn.
Xinhua: Qazaqstan 2029 jylǵa deıingi Digital Qazaqstan strategııasyn bekitti
Qazaqstan Úkimeti 2029 jylǵa deıingi Digital Qazaqstan ulttyq strategııasyn iske asyrý jónindegi is-qımyl josparyn bekitti. Xinhua aqparat agenttiginiń jazýynsha, 2028 jylǵa qaraı Qazaqstanda JOO men kolledjderdegi 80% bilim berý júıesine JI tehnologııalary engizilýi múmkin.
Bilim berý uıymdary oqý baǵdarlamasyn ekonomıka qajettiligine sáıkes jańartýy tıis. 2029 jylǵa qaraı mektep, kolledj jáne JOO túlekteriniń keminde 80%-y JI salasyndaǵy bazalyq daǵdylardy meńgerýi kózdelgen. Sonymen qatar, 2029 jylǵa qaraı memlekettik qyzmetter men áleýmettik qoldaý sharalaryn kórsetýge ketetin ýaqytty keminde 50%-ǵa qysqartý josparlanyp otyr.
Caspian Post: Kaspıı teńizine jańa qutqarý kemesi jetkizildi
Qazaqstan tótenshe jaǵdaılar mınıstrligi Kaspıı teńizine arnalǵan jyldam júretin DAMEN Fast Crew Supplier 2710 kemesin qabyldap aldy. Keme Estonııanyń Kýressaare qalasyndaǵy DAMEN Workboats óndiris ornynda jasalǵan. Mınıstrliktiń aqparatyn Caspian Post basylymy bólisti.
– Jańa keme qazaqstandyq qutqarýshylarǵa oqıǵa ornyna jyldamyraq jetip, qıyn jaǵdaıǵa tap bolǵan adamdarǵa der kezinde kómek kórsetýge jáne avarııa saldaryn tıimdi joıýǵa múmkindik beredi, – delingen mınıstrlik habarlamasynda.
DAMEN Fast Crew Supplier 2710 joǵary jyldamdyqty qutqarý kemesi Qazaqstannyń avarııalyq-qutqarý flotynyń múmkindigin arttyrady.
Report: Munaı-gaz salasyna 100 mln eýro ınvestıtsııa tartylady
Frantsııalyq SNF SA kompanııasy Qazaqstandaǵy munaı-gaz salasyna arnalǵan polımerlik ónimder men jabdyqtardyń jergilikti óndiristik bazasyn damytýǵa yqylas tanytýda. Munaı bergishtigin arttyrý ádisteri jónindegi forýmy aıasynda Energetıka mınıstrligi men SNF SA kompanııasy memorandýmǵa qol qoıdy. Jańalyqty Report jazdy.
SNF SA jergilikti óndiristik bazany damytýǵa 100 mln eýroǵa deıin ınvestıtsııa salmaq. Joba munaı-gaz salasyna arnalǵan polımerlik ónimder men jabdyqtar óndirisin lokalızatsııalaýǵa, zamanaýı tehnologııalardy engizýge baǵyttalǵan.
