Álemdik BAQ-taǵy Qazaqstan: kóshpendiler ashanasy, venchýrlyq kapıtal, ınvestıtsııalyq qor
Osy aptada sheteldegi basylymdar Qazaqstan týraly túrli materıal jarııalady. Sonyń ishinde Prezıdent Qasym-Jomart Toqaevtyń Ázerbaıjanǵa memlekettik sapary, Almatyda ótken V5+1 forýmy, sondaı-aq elimizdiń týrıstik áleýeti týraly jazdy. Tolyǵyraq Kazinform tilshisiniń sholýyn usynamyz.
Trend: Ázerbaıjan-Qazaqstan joǵary deńgeıdegi úkimetaralyq keńesiniń birinshi otyrysy
Ázerbaıjandyq trend basylymy eki eldiń basshylary Ázerbaıjan-Qazaqstan joǵary deńgeıdegi úkimetaralyq keńesiniń birinshi otyrysyna qatysqany týraly jazdy. Agenttik olardyń baıandamasyn jarııalap, foto-vıdeomaterıaldar usyndy.
«Qazaqstan men Ázerbaıjan – eki baýyrlas memleket. Sońǵy ýaqytta bizdiń ózara saparlarymyzdyń serpini óte aıqyn, bul bizdiń qarym-qatynasymyzdyń jańa serpin alǵanyn kórsetedi», – dep keltiredi basylym Ázerbaıjan Prezıdenti Ilham Álıevtiń sózin.
Sondaı-aq, basylym Qazaqstan Prezıdenti Qasym-Jomart Toqaevtyń joǵary deńgeıdegi úkimetaralyq keńestiń otyrysyn tarıhı oqıǵa dep baǵalaǵanyn habarlady.
«Bul da – tarıhı oqıǵa. Jańa ǵana biz saýda-ekonomıkalyq jáne ınvestıtsııalyq yntymaqtastyǵymyzǵa, halyqaralyq arenadaǵy ózara is-qımylymyzǵa qatysty barlyq máselelerdi jan-jaqty talqylap, jalpy qorytyndyǵa keldik. Keleshegimizden senim bar, eki eldiń úkimeti qol qoıylǵan qujattar men kelisimderdi júzege asyrýǵa kirisedi degen úmit zor», – dedi Qasym-Jomart Toqaev.
Azernews: Ázerbaıjan-Qazaqstan birlesken ınvestıtsııalyq qory Baký-Tbılısı-Djeıhan arqyly qazaqstandyq munaı tasymalyn yntalandyrady
Ázerbaıjandyq taǵy bir basylym azernews eki túrkitildes memleket – Ázerbaıjan men Qazaqstan qarym-qatynasynda jańa taraý ashylyp jatqanyn habarlady.
«Osylaısha, eki el de kapıtaly 300 mıllıon dollar bolatyn ınvestıtsııalyq qor qurýdy josparlap otyr, ol óte mańyzdy jobalardy qarjylandyrady. Samuryq-Qazyna ulttyq ál-aýqat qorynyń tóraǵasy qordyń Ortalyq Azııa elderi, Bolgarııa, Vengrııa, Rýmynııa jáne Túrkııa ekonomıkasyndaǵy túrli saladaǵy basym jobalardy da qarjylandyrýdy kózdeıtinin atap ótti. Ol qor Qazaqstan men Ázerbaıjan arasyndaǵy áriptestikti nyǵaıta túsetinin aıtty», – dep jazdy agenttik.
The Times of Central Asia: Almatyda ótken V5+1 forýmyn joǵary dárejeli spıkerler ashty
Al, halyqaralyq The Times of Central Asia basylymy Almatyda ótken B5+1 forýmy týraly jazdy. Agenttiktiń habarlaýynsha, atalǵan platforma, sonyń ishinde Ortalyq Azııanyń bes respýblıkasy men Amerıka Qurama Shtattary bar elder toby Almatyda birinshi B5+1 forýmyn ashý arqyly alǵa mańyzdy qadam jasady.
«Ortalyq Azııa aımaǵyndaǵy memlekettik-jekemenshik áriptestikti damytý maqsaty bolyp sanalatyn Halyqaralyq jeke kásipkerlik ortalyǵy (CIPE) V5+1 tobyn qalyptastyrýda mańyzdy ról atqardy. Bul jańa bıznes-platforma halyqaralyq jáne jergilikti kompanııalarǵa jahandyq bıznes pen saýda múmkindikterinen paıda tabýǵa kómektesý, sonymen qatar alty eldiń úkimetterine tikeleı sheteldik ınvestıtsııalardy kóbirek tartýǵa kómektesý úshin jasalǵan», – dep habarlady basylym.
Sondaı-aq, agenttik forýmnyń alǵashqy kúni «Ortalyq Azııaǵa kózqaras» degen taqyryppen ótkenin jazdy.
Daryo: Qazaqstannyń venchýrlyq kapıtal naryǵy 2023 jyly 110 mıllıon dollardan asady
«RISE Research seriktesteri EA Group jáne BGlobal Ventures, sondaı-aq Crunchbase jáne úkimettik uıymdarmen birlesip júrgizgen keshendi zertteýdiń sońǵy nátıjeleri Qazaqstandaǵy jáne Ortalyq Azııa men Kavkaz aımaǵyndaǵy venchýrlyq kapıtaldyń órkendep jatqanyn kórsetti», - dep habarlady Daryo agenttigi.
«Zertteýlerge súıensek, sońǵy bes jylda venchýrlyq kapıtaldy qarjylandyrý kólemi bes eseden astam ósken Qazaqstandaǵy venchýrlyq kapıtal naryǵy aıtarlyqtaı ulǵaıdy. 2023 jyly aımaqtaǵy venchýrlyq mámilelerdiń jalpy kólemi 110 mıllıon dollardan asty», – dep jazdy ózbekstandyq basylym.
Euronews.Travel: Palaý, et jáne kóshpendilerdiń jańa ashanasy: Qazaqstan Ortalyq Azııadaǵy kelesi iri gastronomııalyq baǵytqa aınala ma?
Sheteldik buqaralyq aqparat quraldaryndaǵy materıaldardyń toptamasyn Euronews.Travel materıalymen aıaqtaımyz. Basylym elimizdiń týrıstik áleýetine sholý jasap, ulttyq taǵamdarymyz týraly baıandady. Sondaı-aq, «Qazaqstannyń gastronomııalyq sahnasynyń ortalyǵy – «neo-kóshpeli taǵamdary» basty nazarda», - dep habarlady.
«Halyqaralyq saıahatshylar úshin az zerttelgen oryn – Qazaqstan shytyrman oqıǵaly saıahatshylarǵa baı mádenıet, qar basqan taýlar jáne tańǵajaıyp sáýletti usynady. Soltústiginde Reseımen, shyǵysynda Qytaımen, ońtústiginde Qyrǵyzstanmen shektesetin onyń mádenı murasy geografııasy sııaqty alýan túrli. Kóshpeliler dástúriniń, Islam mádenıetiniń jáne keńestik dáýir tarıhynyń áseri onyń bolmysyn qalyptastyrýǵa kómektesti», – dep jazdy agenttik.
Basylymnyń tilshisi, negizinen qatal aýa raıyna beıimdelgen taıpalar tutynatyn dástúrli, kóshpeli taǵamdar ekenin atap ótedi.
«Bul as burynnan et, qamyr jáne pııaz sııaqty negizgi taǵamdardan turatyn, biraq qazir qazaqtyń túpnusqa elementterin saqtaı otyryp, baıaý damyp, jańaryp jatyr», – deıdi Euronews.Travel.
