Álemdik BAQ-taǵy Qazaqstan: Koreıada zańdy jumys isteýge ruqsat, qaterli isikke qarsy dári jáne alkılat zaýyty
ASTANA. KAZINFORM – Ádettegideı jahandaǵy ınternet-basylymdar eldegi kóp jaıǵa úńildi. Astanadaǵy onkologııalyq ortalyqta synaqtan ótip jatqan qaterli isikke qarsy dári, qazaqstandyqtardyń Ońtústik Koreıada zańdy túrde jumysqa ornalasýyna múmkindik beretin EPS júıesi týraly jazylǵan. Baıqońyrdan «Soıýz-5/Suńqar» zymyranyn ushyrý merzimi men Pavlodardaǵy alkılat zaýytynyń qurylysy da aıtylypty. Tolyǵyraq Kazinform tilshisiniń sholýynan oqyńyz.
The Times of Central Asia: Qazaqstandyqtar Ońtústik Koreıada zańdy túrde jumys isteı alady
Qazaqstan Ońtústik Koreıanyń Employment Permit System (EPS) júıesine resmı túrde qosyldy. Bul qazaqstandyqtarǵa Koreıada resmı ári zańdy jumysqa ornalasýǵa múmkindik beredi. Jańalyqty The Times of Central Asia taratty.
Qazaqstan azamattaryn jumysqa tartý 2028 jyldan bastalady dep josparlanǵan. Oǵan deıin úkimetaralyq memorandýmǵa qol qoıylyp, Qazaqstanda koreı tilinen test ótkizetin EPS-TOPIK ortalyǵy ashylady.
EPS baǵdarlamasy sheteldik jumysshylarǵa óńdeý ónerkásibi, qurylys, aýyl sharýashylyǵy jáne balyq sharýashylyǵynda jumys isteýge ruqsat beredi. Ol úshin E-9 vızasyn alýǵa jaǵdaı jasaıdy. Ádette jumysshylar elge úsh jyl merzimge kiredi, al vızany uzartý arqyly Ońtústik Koreıada qalý merzimin tórt jyl on aıǵa deıin sozýǵa bolady.
Úmitkerler koreı tilinen test tapsyryp, kásibı daǵdylaryn baǵalaýdan jáne medıtsınalyq tekserýden ótedi. Jumysshylar deldaldar arqyly emes, tek resmı júıe arqyly irikteledi.
Aıta keteıik, 2025 jyly Ońtústik Koreıada shamamen 15 myń qazaqstandyq jumys istedi, olardyń 11 myńǵa jýyǵynyń zańdy mártebesi bolmaǵan.
Report: 2027 jyly qaterli isikke qarsy dári shyǵýy múmkin
Qazaqstanda DVC degen ataýmen qaterli isikke qarsy preparatty synaqtan ótkizip jatyr. Qazir Astanada klınıkalyq synaqtyń ekinshi kezeńi bastaldy. Ǵylym jáne joǵary bilim mınıstri Saıasat Nurbektiń aıtýynsha, synaq aıaqtalǵan soń preparat tirkeýden ótpek. Mınıstr sózin Report agenttigi bólisti.
Qaterli isikke qarsy otandyq DVC dárisin Nazarbayev University ǵalymdary ázirleýge kirisken. Qazir preparattyń klınıkalyq synaqtarynyń ekinshi kezeńi aıaqtalýǵa jaqyn. Bul kezeńde dáriniń mólsheri jáne onyń adam aǵzasyna áseri zertteledi.
Eger dári Qazaqstanda satylatyn bolsa, ony eldegi Densaýlyq saqtaý mınıstrligi tekseredi. Al preparatty halyqaralyq naryqqa shyǵarý josparlansa, halyqaralyq talaptarǵa sáıkes qosymsha rásimderden ótý qajet.
– AQSh-ta tirkeýden ótý – álemdegi eń qatań talaptyń biri. Bul talaptardy kóp elde moıyndaıdy. Eýropanyń óz talaby men standarty bar, Ońtústik-Shyǵys Azııa elderinde de ózindik qaǵıda qarastyrylǵan. Qazir basty maqsatymyz – dáriniń Qazaqstanda jáne EAEO aýmaǵynda resmı tirkelgen preparat retinde qoldanylýyna qol jetkizý, – dedi Saıasat Nurbek.
TACC: «Báıterek» jobasy aıasynda zymyrandardyushyrý merzimi 2027-2028 jyldarǵa qaldy
Qazaqstan men Reseıdiń «Báıterek» jobasy aıasynda «Suńqar – Soıýz-5» zymyran tasyǵyshynyń kezekti ushyrý merzimderi 2027-2028 jyldarǵa josparlanǵan. Bul týraly birlesken kásiporynnyń ókili, ǵaryshker Aıdyn Aıymbetov málimdedi.
Reseılik TASS aqparat agenttiginiń jazýynsha, zymyrandy ekinshi márte ushyrý merzimi ázirge belgilengen joq. Jospar boıynsha ekinshi ushyrý 2026 jylǵa belgilengen edi, alaıda, eń yqtımal nusqa retide 2027 jylǵa shegerildi. Soǵan sáıkes, úshinshi synaq zymyranyn ushyrý merzimi 2028 jyly ótýi múmkin.
Buǵan deıin birinshi «Suńqar – Soıýz-5» zymyran tasyǵyshyn ushyrý 2026 jylǵy 30 sáýirde ótken bolatyn. Ol kezde de ushyrý merzimi 2025 jylǵa josparlanǵanymen, 2026 jylǵa shegerilgen. Aıdyn Aıymbetovtiń aıtýynsha, mundaı jaǵdaıǵa qaýipsizdik máselesi, daıyndyq jumysy áser etken.
Jiji Press: Alkılat óndiretin zaýyt salynýda
Pavlodar oblysynda K5 benzınine qajetti alkılat óndiretin zaýyt salynyp jatyr. Energetıka mınıstrliginiń málimetinshe, jańa zaýyt 2027 jyly iske qosylmaq. Aqparatty japondyq Jiji Press jarııalady.
Alkılat óndiretin zaýyttyń qurylysyn «INTERTRANS C.A.» JShS qolǵa alǵan, al jobanyń ınvestıtsııalyq quny - 35,5 mlrd teńge. Qazir qurylys alańynda sý deńgeıin tómendetý, taýarlyq park pen sorǵy stantsııalaryn salý jumysy júrgizilip jatyr.
Zaýyt jylyna 110 myń tonna býtan-býtılen fraktsııasynan 97,6 myń tonna alkılat óndirmek. Alkılat – joǵary oktandy ári ekologııalyq taza motor otynynyń komponenti, ol K5 standartyna sáıkes keletin benzın óndirýde paıdalanylady.
