Álemdik BAQ-taǵy Qazaqstan: Ońtústik Azııaǵa temirjol, sheteldikterdi tirkeý jáne sırek jer elementteri naryǵy
ASTANA. KAZINFORM – Bul aptada álemdik BAQ Qazaqstanǵa qatysty birqatar mańyzdy taqyrypqa nazar aýdardy. Eldiń tranzıttik áleýetin arttyrý boıynsha qadamdar, sonyń ishinde Ońtústik Azııaǵa temirjol jobalary, sheteldikterdi tirkeý júıesin jetildirý, sondaı-aq sırek jer elementteri naryǵyna shyǵý men EýroOdaqpen strategııalyq seriktestikti damytý sııaqty bastamalar erekshe ataldy. Tolyǵyraq Kazinform tilshisiniń sholýynan oqyńyz.
Anadolu: Qazaqstan men Túrikmenstan Aýǵanstan arqyly Ońtústik Azııaǵa temirjol salýdy talqylady
Qazaqstan Prezıdenti Qasym-Jomart Toqaev pen Túrikmenstan Prezıdenti Serdar Berdimuhamedov BAQ ókilderi aldynda birlesken brıfıng ótkizdi. Bul týraly Anadolu aqparat agenttigi habarlaǵan.
Kezdesý barysynda eki eldiń basshylary ekijaqty yntymaqtastyqty ári qaraı damytý baǵyttaryn belgilep, negizgi nazar saýda-ekonomıkalyq baılanystardy nyǵaıtýǵa aýdaryldy. Toqaev qazirgi jaǵdaıda tranzıttik-transporttyq salanyń strategııalyq mańyzy artqanyn atap ótti.
Qazaqstan–Túrikmenstan–Iran temirjol jelisi Soltústik–Ońtústik transporttyq dáliziniń negizgi býyny bolyp sanalady. Bıylǵy 10 aıda tasymaldaý kólemi 1,5 mıllıon tonnaǵa jetip, 14%-ǵa ósken. Tarıfterdi ońtaılandyrý, ákimshilik rásimderdi jeńildetý jáne shekara mańy ınfraqurylymyn jańartý jumystary belsendi júrgizilip jatyr.
Taraptar Aýǵanstan arqyly Ońtústik Azııaǵa temirjol jelisin salý múmkindikterin, Qazaqstannyń bıdaıy men aýyl sharýashylyǵy ónimderin eksporttaý kólemin ulǵaıtý joldaryn talqylady. Sondaı-aq Túrikmenstan–Aýǵanstan shekarasynda dán termınalyn salý jobasy qaraldy. Energetıka salasynda Qazaqstan Túrikmenstannan Qytaıǵa tabıǵı gaz jetkizýdiń senimdi seriktesi bolyp qala beredi.
TASS: Qazaqstanda 30 kúnnen artyq turatyn sheteldikterdi mindetti tirkeý júıesi engiziledi
Qazaqstan Іshki ister mınıstrliginiń buıryǵyna sáıkes, 2026 jylǵy 1 shildeden bastap Qazaqstanda 30 kúnnen astam turatyn sheteldikter úshin mindetti tirkeý engiziledi. Bul týraly TASS aqparat agenttigi jazdy.
Qujatta kórsetilgendeı, Qazaqstanǵa 90 kúnge deıingi merzimge keletin ózge eldiń azamattary memlekettik shekarany kesip ótken kúnnen bastap 30 kúntizbelik kún ishinde ІІM organdarynda tirkelýi tıis. Tirkeý úshin sheteldiktiń aty-jóni, týǵan kúni, pasportynyń derekteri, sondaı-aq turatyn oryn usynatyn adamnyń derekteri qajet.
Tirkeýge ótinish berý jáne jaýap alý elektrondy túrde júzege asyrylady. Eger turǵyn úı ıesi kelisim bermese, sheteldik jalǵan aqparat usynsa nemese Qazaqstanda bolý merzimin buzsa, tirkeýden bas tartýǵa bolady. Jańa mekenjaıǵa kóshken jaǵdaıda tirkeý qaıta júrgiziledi, al burynǵy tirkeý avtomatty túrde joıylady.
Sondaı-aq, qabyldaýshy tarap sheteldiktiń kelgenin ІІM-ge úsh jumys kúni ishinde habarlaýǵa mindetti. Qonaqúıler derekterdi avtomatty túrde beredi, al jeke tulǵalar ózderi habarlaýy tıis. Sheteldikter bul erejeni oryndamasa, aıyppul salynady.
The Times Of Central Asia: Qazaqstan sırek jer elementteri naryǵyna kirdi
Qazaqstan sırek jer elementteri salasynda jahandyq arenaǵa shyǵýǵa bel býdy. The Times Of Central Asia ınternet portaly habarlaǵandaı, el buryn tek shıkizat jetkizýshi bolsa, qazir strategııalyq oıynshyǵa aınalyp, krıtıkalyq mańyzdy materıaldardyń jetkizý tizbeginde belsendi ról atqarýǵa umtylyp otyr.
Bul transformatsııanyń negizgi draıveri – «Taý-Ken Samuryq» memlekettik taý-ken kompanııasy. Qazirgi ýaqytta Qazaqstanda 100-den astam SJE ken oryndary anyqtalǵan. El 34 belgili elementtiń 19-yn óndiredi, bul onyń halyqaralyq naryqta básekege qabilettiligin arttyrady.
«Taý-Ken Samuryq» jetekshisi Nurlan Jaqypovtyń aıtýynsha, Qazaqstan endi tek shıkizat óndirýmen shektelmeı, tolyqqandy óndiristik tizbekti qurýǵa umtylyp otyr. Bul Qytaıdyń uzaq ýaqyt ústemdik etken naryǵynda Qazaqstandy balama habqa aınaldyrady.
— Biz Afrıka men Aýǵanstandaǵy áleýetti aımaqtardy zerttep jatyrmyz. Qazý jumystary áli bastalǵan joq, biraq lıtsenzııalaý máseleleri boıynsha jergilikti seriktestermen kelissózder júrgizilip jatyr, — dedi Jaqypov.
Mamandardyń pikirinshe, Qazaqstannyń uzaqmerzimdi strategııasy geologııalyq barlaý, óńdeý jáne halyqaralyq yntymaqtastyqty biriktirý arqyly eldiń jahandyq SJE naryǵyndaǵy ornyn nyǵaıtýǵa baǵyttalǵan. Bul qadam Qazaqstandy burynǵydan da strategııalyq mańyzdy oıynshyǵa aınaldyrady.
Report: EýroOdaq «Transkaspıı» halyqaralyq dálizin damytýǵa nıetti
Tashkentte ótken úshinshi «Eýropalyq Odaq – Ortalyq Azııa» ekonomıkalyq forýmynda Qazaqstan Vıtse-premeri Ǵalymjan Qoıshybaev pen Eýropalyq Odaqtyń halyqaralyq áriptestik jónindegi komıssary Iozef Sıkel kezdesti. Kezdesý barysynda taraptar Qazaqstan men EO arasyndaǵy strategııalyq seriktestikti nyǵaıtý, tranzıttik áleýetti keńeıtý jáne ınvestıtsııalyq jobalardy iske asyrý máselelerin talqylady. Bul týraly Report aqparat agenttigi habarlady.
Negizgi nazar Transkaspıı halyqaralyq tranzıttik marshrýtynyń damýyna aýdaryldy. Sonymen qatar, ES «Global Gateway» bastamasy aıasynda praktıkalyq yntymaqtastyqty nyǵaıtý máselesi de talqylandy.
Qazaqstan men EO arasyndaǵy kópqyrly yntymaqtastyq únemi keńeıip keledi, al memleket basshysy Qasym-Jomart Toqaev Ortalyq Azııa elderi men Eýropalyq odaq arasyndaǵy konstrýktıvti dıalogke joǵary baǵa beredi. Ǵalymjan Qoıshybaev forýmda óńirlik ekonomıkalyq kooperatsııany tereńdetý, ınvestıtsııalyq yntymaqtastyqty keńeıtý jáne Qazaqstandaǵy ekonomıkalyq reformalar arqyly ulttyq ekonomıkany qurylymdyq turǵyda jańǵyrtý qajettiligin atap ótti.
Kezdesý qorytyndysynda eki tarap strategııalyq seriktestikti odan ári tereńdetýge, turaqty ekonomıkalyq baılanystardy damytýǵa jáne birlesken ınvestıtsııalyq jobalardy júzege asyrýǵa degen ózara nıetin rastady. Qazaqstan úkimeti Ortalyq Azııa elderi men Eýropalyq odaqpen uzaq merzimdi yntymaqtastyqqa daıyn ekenin málimdedi.