Álemdik BAQ-taǵy Qazaqstan: Kaspıı tabanymen ınternet tartý, PSG akademııasyn ashý jáne Wildberries qoımasy
ASTANA. KAZINFORM - Ádettegideı jahandaǵy aqparat taratýshy ınternet-basylymdar elimizdegi kóp jaıǵa úńildi. Olardyń arasynda Qazaqstanda salynyp jatqan Wildberries-tiń jańa qoımalary, Kaspıı túbimen ınternet jelisin tartý máselesi jáne Astanada ashylatyn «Parı Sen-Jermen» fýtbol klýbynyń resmı akademııasy týraly aıtylǵan. 2040 jylǵa deıingi jerasty sýyn paıdalaný jospary men shetel azamattarynyń elge kirý tártibi de qyzyqty kórinipti. Tolyǵyraq Kazinform tilshisiniń sholýynan oqyńyz.
TASS: Shetel azamattary úshin Qazaqstanǵa kirý aqyly bolady
Qazaqstanda shetel azamattary men azamattyǵy joq adamdar úshin elge kirýge arnalǵan elektrondy ruqsat berý júıesi engizilýi múmkin. Bul ózgeris qoldaý tapsa, shetel azamattary úshin Qazaqstanǵa kirý aqyly bolady. Aqparatty reseılik TASS aqparat agenttigi habarlady.
Jańa tártip shetel azamattarynyń Qazaqstanǵa kirýin tsıfrlyq formatta rásimdeýge múmkindik berip, kóshi-qon baqylaýyn tıimdi júrgizýge jaǵdaı jasaıdy.
Qazirgi tańda Qazaqstanǵa álemniń 50-den astam memleketiniń azamattary vızasyz kire alady. Onyń ishinde TMD elderiniń azamattaryna vızasyz kirý tártibi qoldanylady, sondaı-aq Eýropalyq odaqqa múshe memleketterdiń azamattaryna qysqa merzimdi sapar úshin vızasyz rejım qarastyrylǵan.
Report: Wildberries Qazaqstanda eki qoıma salady
Reseılik Wildberries marketpleısi Qazaqstanda jalpy aýmaǵy 260 myń sharshy metrdi quraıtyn qoıma keshenderin salyp jatyr. Onyń ishinde 160 myń sharshy metrlik qoıma Astanada, al taǵy 100 myń sharshy metrlik nysan Almatyda ornalasady. Report agenttiginiń jazýynsha, jańa logıstıkalyq nysandar keler jyldyń birinshi toqsanynda paıdalanýǵa berilmek.
Qazirgi tańda Wildberries 46 myń sharshy metrge jýyq qoıma alańyn jalǵa alyp otyr. Saýda jáne ıntegratsııa mınıstrliginiń málimetinshe, Wildberries-ten qosymsha qoımalar salýǵa qatysty usynys túspegen.
Xinhua: Kaspıı teńizi túbine optıkalyq kabel tóseý aıaqtaldy
Aqtaý men Sýmgaıyt arasyndaǵy tsıfrlyq magıstral qurylysynyń eń kúrdeli kezeńi aıaqtaldy. Jańa baǵyt Qazaqstan men Ázerbaıjannyń telekommýnıkatsııalyq ınfraqurylymyn tikeleı jalǵastyryp, Azııa men Eýropa arasyndaǵy joǵary jyldamdyqty derekterdi berý arnasyna aınalýy tıis. Jańalyqty Xinhua aqparat agenttigi taratty.
Joba 2025 jyly bastaý alǵan bolatyn. Injenerlik zertteýler men kabeldi synaqtan ótkizgennen keıin, bıyl shildede kabelditeńiz túbine tóseý jumysy bastaldy. Qurylys jumystary táýlik boıy sý syıymdylyǵy 20 myń tonnadan asatyn arnaıy kemeniń kómegimen júrgizildi. Jobaǵa 70 maman tartyldy.
Jiji Press: Jerasty sýyn paıdalaný jospary ázirlenýde
Qazaqstan 2027-2040 jyldarǵa arnalǵan Jerasty sýyn paıdalaný jáne basqarý tujyrymdamasyn ázirlep jatyr. Sý resýrstary jáne ırrıgatsııa mınıstrliginiń málimetin japondyq Jiji Press bólisti.
Tujyrymdama jerasty sý resýrsyn basqarýdyń zamanaýı júıesin qalyptastyrýǵa baǵyttalǵan. Qujatty iske asyrý jerasty sýyn paıdalanýdyń tıimdiligin arttyryp, eldi mekender men ekonomıka salalaryn turaqty sýmen qamtamasyz etý múmkindik beredi.
PSG: «Parı Sen-Jermen» fýtbol klýbynyń resmı akademııasy ashylady
Qyrkúıek aıynda Astanada Frantsııanyń áıgili «Parı Sen-Jermen» fýtbol klýbynyń resmı akademııasy – PSG Academy Kazakhstan ashylady. Osylaısha, Qazaqstan PSG Academy halyqaralyq jelisine qosylǵan 24-shi el bolady. Atalǵan aqparat álemdik basylymdarmen qatar klýbtyń resmı saıtynda da jarııalandy.
Akademııanyń alǵashqy oqý-jattyǵý ortalyǵy elordadaǵy Air Arena sport kesheninde ornalasady. FIFA talaptaryna saı jabyq fýtbol alańynda jas sportshylar jyl boıy úzdiksiz jattyǵa alady.
Alǵashqy maýsymda akademııa 6-14 jas aralyǵyndaǵy 300-ge jýyq ul men qyzdy qabyldaıdy. Oqýshylar jas ereksheligi men daıyndyq deńgeıine qaraı topqa bólinip, «Parı Sen-Jermen» akademııasynyń resmı oqý-jattyǵý ádistemesi boıynsha daıyndyqtan ótedi.
