Álemdik BAQ-taǵy Qazaqstan: Kaspıı, Germanııaǵa munaı jiberý jáne pedofılderdi kastratsııalaý

ASTANA. KAZINFORM – Apta ishinde álemdik aqparat keńistiginde Qazaqstan taqyrybyna arnalǵan birqatar mańyzdy materıaldar jaryq kórdi. Halyqaralyq basylymdar Kaspıı teńizi men transshekaralyq ózenderdiń ekologııalyq jaǵdaıyna qatysty Qasym-Jomart Toqaevtyń bastamalaryna erekshe nazar aýdardy. Sonymen qatar, Germanııaǵa qazaqstandyq munaı jetkizýdi arttyrý, TMU+ formatynda yntymaqtastyqty keńeıtý jáne gaz salasyndaǵy jańa jobalardy iske asyrý týraly jańalyqtar keńinen talqylandy. Pedofılderge hımııalyq kastratsııa qoldaný tártibine engizilgen ózgerister de sheteldik medıanyń nazarynan tys qalǵan joq. Tolyǵyraq Kazinform tilshisiniń sholýynan oqyńyz.

Azertaq: Kasym-Jomart Toqaev Kaspıı teńizi men transshekaralyq ózenderdiń jaǵdaıyna erekshe nazar aýdarýdy tapsyrdy

Qazaqstan Prezıdenti Qasym-Jomart Toqaev Kaspıı teńizi men transshekaralyq ózenderdiń jaǵdaıyna erekshe nazar aýdarýdy qajet dep sanaıdy. Ol bul pikirin Dýshanbedegi «Ortalyq Azııa – Reseı» ekinshi sammıtinde aıtty. Bul habardy Ázerbaıjannyń Azertaq basylymy usynǵan.

Qazaqstan Prezıdenti aımaq elderi ekologııalyq qaýipterge tap bolyp otyrǵanyn aıtyp, máseleni sheshý úshin úkimet basshylary men tıisti organdar deńgeıinde júıeli jáne úılestirilgen sharalar qabyldaý kerek ekenin atap ótti.

- Osyǵan oraı Ekologııa máseleleri jónindegi Reseı jáne Ortalyq Azııa elderiniń mınıstrler keńesin bekitýdi usynamyz. Transshekaralyq ózender men Kaspıı teńiziniń jaǵdaıyna basa nazar aýdarý kerek. Bul kúrdeli máseleni sheshýge Kaspııdiń sý resýrstaryn saqtaý boıynsha memleketaralyq baǵdarlamasyn iske asyrý yqpal etedi. Sý qaýipsizdiginiń qazirgi jaǵdaıy da alańdatpaı turmaıdy. Sý resýrstary men aýyl sharýashylyǵy jerleriniń jaı-kúıin baqylaý, sondaı-aq tótenshe jaǵdaılardy boljaý úshin jasandy jer serikterin paıdalana otyryp ǵaryshtyq monıtorıng boıynsha birlesken baǵdarlama jasaqtaýdy jáne iske asyrýdy usynamyz, – dedi Prezıdent.

Report: Qazaqstan Germanııaǵa munaı jetkizilimin arttyrady

Qazaqstan men Germanııa 2026 jylǵa arnalǵan munaı jetkizý týraly kelisimdi uzartty. Bul týraly Report agenttigi habarlady.

Kelisim «QazMunaıGaz» ulttyq kompanııasynyń basqarma tóraǵasy Ashat Hasenov pen Rosneft Deutschland GmbH kompanııasynyń bas dırektory Iohanes Bremer arasyndaǵy kezdesý qorytyndysy boıynsha bekitildi.

- Kelisimge sáıkes, Germanııaǵa jetkiziletin qazaqstandyq munaı kólemi aı saıyn 100 myń tonnadan 130 myń tonnaǵa deıin arttyrylmaq, – dep habarlady QMG baspasóz qyzmeti.

2024 jyly jetkizilim KMG Kashagan B.V. resýrstary esebinen bastalsa, 2025 jyly oǵan Teńizshevroıl kompanııasynyń munaıy qosylǵan.

Kompanııa málimetinshe, 2025 jyldyń toǵyz aıynda Germanııanyń Shvedt qalasyndaǵy munaı óńdeý zaýytyna shamamen 1,5 mıllıon tonna qazaqstandyq munaı jetkizilgen.

Anadolu: Qazaqstan «Túrki memleketteri uıymy+» formatyn qurý ıdeıasyn qoldaıdy

Qazaqstan Prezıdenti Qasym-Jomart Toqaev XII Túrki tildes memleketter uıymy sammıtinde «TMU +» formatyn qurý ıdeıasyn qoldaıtynyn aıtty. Bul format yntymaqtastyqty ári qaraı keńeıtýge baǵyttalǵan. Bul týraly túrkııalyq Anadolu agenttigi habarlady.

Qazaqstan Prezıdenti túrki halyqtarynyń ortaq tarıhyn atap, kıberqaýipsizdik máselesi úshin TMU aıasynda Keńes qurýdy usyndy.

Ekonomıka salasynda Túrki ınvestıtsııalyq qoryn tıimdi paıdalaný jáne «Túrki áleminiń perspektıvalary – 2040» baǵdarlamasyn iske asyrý mańyzdy dep atap ótti.

Qazaqstan Prezıdenti kólik pen logıstıkaǵa nazar aýdaryp, temirjol men Transkaspıı marshrýtyn jańǵyrtý, tsıfrlandyrý jáne jasandy ıntellekt qoldanýdy usyndy.

Energetıka men sý resýrstaryn tıimdi paıdalaný, mádenı-gýmanıtarlyq baılanystardy nyǵaıtý da negizgi baǵyttar retinde ataldy. Sammıtke Túrkııa, Ázerbaıjan, Qyrǵyzstan, Ózbekstan, Vengrııa, Túrikmenstan, Soltústik Kıpr lıderleri jáne TMU Bas hatshysy qatysty.

TACC: Reseı Qazaqstanǵa jańa magıstraldyq gaz qubyryn tarmaqtaıdy

Sankt-Peterbýrgte Qazaqstan Premer-mınıstriniń birinshi orynbasary Roman Sklıar men «Gazprom» AQ basqarma tóraǵasy Alekseı Mıller kezdesti. Taraptar gaz salasyndaǵy yntymaqtastyqty damytý perspektıvalaryn talqylady jáne qazaqstandyq gazdy Reseıde uzaq merzimdi qaıta óńdeý boıynsha negizgi sharttar týraly kelisimge qol qoıdy. Jańalyqty reseılik TASS jazdy

Qujatqa sáıkes, Qarashyǵanaq ken ornynan óndiriletin gaz Reseıdegi Orynbor gaz óńdeý zaýytynda qaıta óńdelmek. Zaýyt jaqyn arada jańǵyrtýdan ótetini aıtylǵan.

- Reseıden Qazaqstanǵa jańa magıstraldyq gaz qubyryn salý jobasyn iske asyrý týraly memorandýmǵa qol qoıyldy, – delingen habarlamada.

Aıta keteıik, buǵan deıin «Gazprom» men Qazaqstan 2025–2026 jyldary reseılik gazdy respýblıkaǵa jetkizýdi ulǵaıtý týraly kelisimge kelgen bolatyn.

SentralAsia: Qazaqstanda pedofılder bostandyqqa shyǵýǵa 6 aı qalǵanda hımııalyq kastratsııalanady

Qazaqstan Densaýlyq saqtaý mınıstrligi «Mindetti medıtsınalyq sharalardy qoldaný erejesin bekitý týraly» buıryqqa ózgerister engizdi. Jańalyqty qyrǵyzstandyq SentralAsia habarlady.

Qujatqa sáıkes, kámeletke tolmaǵandarǵa jynystyq sıpattaǵy qylmys jasaǵandar bostandyqqa shyǵýǵa 6 aı qalǵanda hımııalyq kastratsııaǵa jiberiledi.

- Mekeme ákimshiligi jazasyn óteý merzimi aıaqtalýǵa on eki aı qalǵanda sotqa materıaldar joldap, sot-psıhıatrııalyq saraptama taǵaıyndaýǵa tıis. Saraptama olardyń psıhıkalyq aýytqýlarynyń bar-joǵyn jáne seksýaldy zorlyqqa beıimdiligin anyqtaıdy, – delingen buıryqta.

Atalǵan norma psıhıkalyq aýrýy bar, biraq esi durys dep tanylǵan tulǵalarǵa qoldanylmaıdy.

Buıryq resmı jarııalanǵan kúnnen keıin on kúnnen soń kúshine enedi.

2018 jyldan beri Qazaqstanda balany zorlaǵandarǵa hımııalyq kastratsııa qoldaný zań júzinde múmkin boldy. Ol tek sot sheshimimen jáne sot-psıhıatrııalyq saraptama qorytyndysy boıynsha júzege asyrylady. Zańǵa ózgerister balalarǵa qarsy zorlyq sanynyń kúrt ósýine baılanysty engizildi. Sondaı-aq, 2024 jyldyń aqpanynda depýtattar pedofılderdi hırýrgııalyq kastratsııalaýdy usynǵan bolatyn.