Álemdik BAQ-taǵy Qazaqstan: Qashaǵan daýy, Qytaımen baılanys, qoqys óńdeý zaýyty jáne kardıohırýrgııa jetistigi

Xinhua: Sı Tszınpın Qazaqstan Prezıdenti Qasym-Jomart Toqaevpen kezdesti

16 shildede Shanhaıdaǵy Sıtszıao rezıdentsııasynda Qytaı Tóraǵasy Sı Tszınpın Qazaqstan Prezıdenti Qasym-Jomart Toqaevpen kezdesti. Qazaqstannyń Memleket basshysy Qytaıǵa Dúnıejúzilik jasandy ıntellekt konferentsııasyna qatysý úshin barǵan. Aqparatty Xinhua agenttigi habarlady.

Kezdesý barysynda taraptar saýda, ınvestıtsııa, energetıka, kólik, tsıfrlyq ekonomıka jáne jasandy ıntellekt salalaryndaǵy yntymaqtastyqty keńeıtý týraly sóz qozǵady. Sonymen qatar BUU, ShYU, «Qytaı – Ortalyq Azııa» formaty jáne ózge de halyqaralyq alańdar arqyly jasandy ıntellektini damytýǵa ýaǵdalasty.

Reuters: Qashaǵan operatorlary Qazaqstanǵa 2,3 trln teńge aıyppul tóleýge tıis

Úkimet Qashaǵan munaı ken ornyn ıgerip otyrǵan kompanııalardan 2,3 trln teńge ekologııalyq aıyppuldy óndirip alýǵa nıetti. Qashaǵan operatory – North Caspian Operating Company (NCOC) kompanııasyna aıyppuldy erikti túrde tóleýge 20 shildege deıin ýaqyt berilgen. Málimetti Reuters taratty.

Eger konsortsıým belgilengen merzimde qarjyny aýdarmasa, mınıstrlik aıyppul aqysyn májbúrlep óndirip almaq. Eger májbúrlep óndirý sharasy bastalsa, negizgi aıyppul somasyna 10 paıyz (230 mıllıard teńgege jýyq) ósimpul qosylady.

Aıta keteıik, 2023 jyly Ekologııa jáne tabıǵı resýrstar mınıstrligi «Qashaǵan» munaı jobasyna qatysty 2,3 trln teńge (5,1 mlrd dollar shamasynda) kólemindegi talapty kúkirtti shamadan tys saqtaý faktisi boıynsha engizgen edi.

Report: 3 qoqys óńdeý zaýyty salynady

Premer-mınıstr Oljas Bektenov China Tianying Inc. kompanııasynyń prezıdenti ári partııa komıtetiniń hatshysy Debıao Tsaomen kezdesti. Report aqparat agenttiginiń jazýynsha, eki jaq qaldyq óńdeıtin zaýyttar salý máselesin talqylaǵan.

Qazaqstanda salynatyn shaǵyn qýatty zaýyttar táýligine 250-den 500 tonnaǵa deıin qoqys óńdeı alady. Mundaı kásiporyndar qaldyq kólemi iri keshen salýdy qajet etpeıtin óńirlerde boı kóterýi múmkin.

China Tianying bul salada 20 jyldan beri jumys isteıdi. Kompanııanyń óz tehnologııalyq jáne óndiristik qýattary bar. Uıym Sıngapýr, Maldıv araldary jáne Frantsııa sekildi álemniń 30-dan astam elinde jobalardy júzege asyrǵan.

The Times of Central Asia: Qazaqstan kardıohırýrgııa salasy boıynsha álemniń úzdik 30 eliniń qataryna endi

Qazaqstanda joǵary tehnologııalyq kardıologııalyq jetilip keledi. Ótken jyly júrekke 13 106 ashyq operatsııa jasalǵan, bul 2024 jylmen salystyrǵanda 7,2%-ǵa kóp.

The Times of Central Asia-nyń jazýynsha, keıingi bes jylda qanaınalym júıesi aýrýlaryna shaldyqqandar 15%-ǵa, ólim-jitim 35,1%-ǵa tómendedi. Al bıyl qańtar-mamyr aralyǵynda qanaınalym júıesi aýrýlary – 6,6%-ǵa, arterııalyq gıpertenzııa – 9,7%-ǵa, júrektiń ıshemııalyq aýrýy – 10,1%-ǵa, jedel mıokard ınfarkti – 5,7%-ǵa, mı qanaınalymynyń jedel buzylysy (ınsýlt) – 6,1%-ǵa azaıǵan.

Kardıohırýrgııanyń qarqyndy damýynyń nátıjesinde Qazaqstan osy saladaǵy jetistikteri boıynsha álemniń úzdik 30 eliniń qataryna endi.

Euronews: Shaıdorovtyń jeńis joly

Qazaqstandyq mánerlep syrǵanaýshy Mıhaıl Shaıdorov 2026 jylǵy Olımpıadada altyn medal jeńip alyp, osy sport túrinen eldegi tuńǵysh Olımpıada chempıony atandy. Qazir ol Almatydaǵy Halyk Arena muz aıdynynda jańa maýsymǵa qyzý daıyndalyp jatyr. Osyǵan oraı Euronews jarııalaǵan maqalany yqshamdap usyndyq.

Shaıdorovtyń sporttaǵy joly Almatydaǵy saýda ortalyǵyndaǵy shaǵyn muz aıdynynan bastalǵan. Balalyq shaǵynda ony 2014 jylǵy Olımpıadanyń qola júldegeri Denıs Tenniń jetistigi erekshe shabyttandyrǵan eken.

Keıin Shaıdorovtyń Olımpıadadaǵy jeńisi Qazaqstan úshin tarıhı oqıǵa boldy. El qorjynyna mánerlep syrǵanaýdan alǵashqy Olımpıada altyny túsip, Denıs Ten bastaǵan jeńis joly jalǵasty.

Aldaǵy ýaqytta Mıhaıl Shaıdorov mansabyn jalǵastyrmaq. Jarystarǵa qatysyp, baǵdarlamasyna jańa elementter engizýge qulyqty.

Sonymen qatar Qazaqstanda mánerlep syrǵanaýdy nasıhattaý maqsatynda muz shoýyn uıymdastyrýdy josparlap otyr.