Álemdik BAQ-taǵy Qazaqstan: Iran ýranyn saqtaý, Baıqońyrdaǵy jańa zymyran, Alataý qalasy jáne munaı óndirisi
ASTANA. KAZINFORM – Maýsymnyń alǵashqy aptasynda jahandyq ınternet-basylymdardy paraqtadyq. Jańalyqtyń basym deni Alataý qalasynyń damý baǵdary, Baıqońyrǵa jetkizilgen jańa zymyran jáne munaı óndirý kólemi tóńireginde órbigen. Oǵan qosa Irandaǵy baıytylǵan ýran qoryn Qazaqstanda saqtaýǵa qatysty usynys pen teńiz júk tasymalyndaǵy rekordtyq kórsetkish aıtylypty. Tolyǵyraq Kazinform tilshisiniń sholýynan oqyńyz.
Euronews: Qazaqstan Iran ýranyn saqtaýǵa daıyn
Qazaqstan AQSh pen Iran arasyndaǵy kelissózge kómektesý úshin Irannyń baıytylǵan ýranyn óz aýmaǵynda ornalastyrýdy usyndy. Ótken aptada Prezıdent Qasym-Jomart Toqaev MAGATE-niń bas dırektory Rafael Grossımen kezdesýinde ıdeıany qoldap, Qazaqstandy ýran qoryn beıtarap saqtaýshysy retinde kórsetken.
Euronews málimetinshe, 2017 jyly Qazaqstan BUU-nyń ıadrolyq qadaǵalaý organymen birlesip MAGATE-niń Tómen baıytylǵan ýran bankin ornalastyrǵan bolatyn. Ol eldiń shyǵysyndaǵy Óskemen qalasynda, Úlbi metallýrgııalyq zaýytynda ornalasqan jáne 2019 jyldyń qazan aıynda jumysyn bastady. Banktiń maqsaty – azamattyq ıadrolyq baǵdarlamalar úshin otyn jetkizýdi qamtamasyz etý jáne ıadrolyq qarýdyń taralý qaýpin azaıtý.
– Barlyq tarappen halyqaralyq kelisimge kelgen jaǵdaıda, óz tarapymyzdan adal nıetpen tehnıkalyq kómek kórsetýge daıyn ekenimizdi bildiremiz, – dep málimdedi Syrtqy ister mınıstrliginiń resmı ókili Erlan Jetibaev.
Reuters: Qazaqstan munaı óndirisin qaıta jandandyrdy
26 mamyrda bolǵan apat saldarynan «Teńiz» ken ornynda munaı óndirý kólemi kúrt tómendegen bolatyn. Keıin munaı óndirý táýligine 290 myń tonna deńgeıine shyqty.
Reuters agenttiginiń esebinshe, 28 mamyrda «Teńiz» ken ornynda munaı óndirý kólemi 310 000 barrel bolǵan, 31 mamyrda táýligine shamamen 900 000 barrel deńgeıine kóterilgen. Mamyr aıynda jalpy munaı jáne gaz kondensatyn óndirý kórsetkishi táýligine ortasha eseppen 2,1 mıllıon barreldi qurady, bul – sáýirdegi kórsetkishten (táýligine 2,16 mıllıon barrel) tómen.
Qazaqstan táýligine álemdik shıki munaıdyń 2 paıyzyn óndiredi. Munaıdyń negizgi bóligi Kaspıı qubyr konsortsıýmy arqyly Reseıdiń Novorossıısk portyna eksporttalady.
Anadolu: Toqaev kásipkerlerdi Alataý qalasyn damytýǵa shaqyrdy
Qazaqstandyq kásipkerler Alataý qalasyndaǵy jobalardy qoldaýy tıis. Bul sózdi Qasym-Jomart Toqaev Qazaqstandaǵy alǵashqy tsıfrlyq qalany damytýǵa arnalǵan kezdesý barysynda aıtty.
Anadolu taratqan aqparatqa sáıkes, Alataý qalasynda 50-den astam ınvestıtsııalyq joba júzege asady. Jobalardyń jalpy quny 4 mıllıard dollardy quraıdy jáne 50 000-nan astam jumys orny ashylýy yqtımal.
Qasym-Jomart Toqaev bir-eki jyl ishinde basym sektorlarǵa ınvestorlardy tartyp, ınvestıtsııa qorjynyn keńeıtýge úndedi. Onyń aıtýynsha, otandyq kásiporyndar «jaı baqylaýshy emes, qalany damytýdyń teń quqyly qatysýshysy» bolýy shart.
TASS: Baıqońyrǵa zymyran jetkizildi
«Progress MS-36» júk kemesin orbıtaǵa shyǵarýǵa arnalǵan «Soıýz-2.1b» zymyran tasyǵyshy Baıqońyr ǵarysh aılaǵyna ákelindi. Roskosmos málimetin TASS taratty.
– «ıÝjnyı» ǵarysh ortalyǵynyń mamandary zymyran bloktary tıelgen temirjol quramyn qabyldap aldy, – delingen habarlamada.
Júk túsirý jumystary aıaqtalǵannan keıin mamandar bloktardy ornalastyrady, keıin zymyran ushyrýǵa daıyndyq bastalǵanǵa deıin 31-shi alańnyń tehnıkalyq keshenine jiberilmek.
Sonymen qatar TASS agentigi Baıqońyr qalasy ákimshiliginiń basshysy Konstantın Býsygınmen suhbattasqan. Onyń aıtýynsha, shahar ákimshiligi Qazaqstanmen birlesip qalaǵa jasalatyn birkúndik týr sanyn arttyrýdy josparlap otyr.
Xinhua: Mamyrdaǵy teńiz júk tasymaly rekordtyq deńgeıge jetti
«Qazmortransflot» ulttyq teńiz keme qatynasy kompanııasy konteınermen tasymaldanatyn júk kólemin arttyrdy. Ótken aıda Aqtaý teńiz portynan Baký mańyndaǵy Alıat teńiz portyna 20 fýttyq balamadaǵy (JFB) 7 451 konteıner tasymaldanǵan. Aqparatty Xinhua agenttigi bólisken.
«Qazmortransflot» 2019 jyldan beri Aqtaý men Alıat porttary arasynda 210 myńnan astam JFB konteıner tasymaldaǵan edi. Bul shamamen 2,7 mıllıon tonna júkke teń.
Transkaspıı halyqaralyq kólik baǵyty Qazaqstan, Qytaı, Kavkaz elderi, Túrkııa jáne Eýropa naryqtaryn baılanystyrady. Baǵyt – Azııa men Eýropa arasyndaǵy mańyzdy kólik dálizi.
