Álemdik BAQ-taǵy Qazaqstan: Horvatııamen áriptestik, ónim eksporty jáne temir jol qurylysy
ASTANA. KAZINFORM – Ádettegideı jahandaǵy túrli aqparat quraldarynda Qazaqstan jaıly aqparattar az jazylmady. Qazaqstannyń Horvatııamen áriptestigi, Taıaý Shyǵys elimen alys-beris, jańa temir jol qurylysy boıynsha kelisim sóz boldy. Buǵan qosa, elimizdegi ardagerlerdiń jaıy da jazylypty. Tolyǵyraq Kazinform tilshsiniń sholýynan oqyńyz.
Anadolu: Qazaqstan men Horvatııa áriptestigi tereńdeı beredi
Qazaqstan prezıdenti Qasym-Jomart Toqaev Horvatııanyń syrtqy ister mınıstri Gordan Grlıch-Radmandy Aqordada qabyldady. Kezdesý barysynda Qazaqstan men Horvatııa arasyndaǵy ózara is-qımyldyń qazirgi jaǵdaıy men keleshegi talqylandy. Jańalyqty Anadolu jazdy.
Prezıdent Toqaev eki el arasyndaǵy qatynastar konstrýktıvti dıalog rýhynda odan ári damıtynyna senim bildirdi. Memleket basshysy Horvatııamen saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyqty keńeıtýge múddeli ekenin atap ótti.
Gordan Grlıch-Radman Qazaqstanǵa kórsetilgen qurmet úshin alǵysyn bildirip, ekijaqty qatynastardy odan ári nyǵaıtýǵa daıyn ekenin jetkizdi. Qazaqstan men Horvatııa arasyndaǵy ózara is-qımyl ózara senim men syndarly dıalog rýhynda ári qaraı damı bermek.
Memleket basshysy mınıstrdiń bul sapary Horvatııanyń ekijaqty qarym-qatynastarǵa jańa serpin berýge nıetti ekenin aıqyn kórsetetinin atap ótti.
Prezıdent energetıka, ınfraqurylym, farmatsevtıka jáne tamaq ónerkásibi sııaqty salalarda horvat kompanııalarynyń Qazaqstan naryǵyna qyzyǵýshylyǵynyń artyp kele jatqanyn rızashylyqpen atap ótti. Qazir Qazaqstanda Pliva men Podravka sııaqty tanymal brendterdi qamtıtyn 30-dan astam horvatııalyq qatysýmen jumys isteıtin kompanııa tabysty qyzmet atqarýda.
Sondaı-aq Qasym-Jomart Toqaev qazaq-horvat bıznes-forýmyna Horvatııadan ókildik delegatsııanyń qatysýyn quptap, qol jetkizilgen ýaǵdalastyqtar saýda-ekonomıkalyq jáne ınvestıtsııalyq yntymaqtastyqtyń keńeıýine jol ashatynyn atap ótti. Kezdesý barysynda mádenıet pen bilim berý salalaryndaǵy baılanysty nyǵaıtý perspektıvalary da talqylandy.
Trend: Irannan Qazaqstanǵa jetkizilgen ónim kólemi ataldy
Iran kúntizbesi boıynsha, 2024 jylǵy 20 naýryzdan 20 jeltoqsanǵa deıin Irannan Qazaqstanǵa munaıǵa jatpaıtyn ónim eksporty shamamen 360 myń tonnany qurap, 203 mln dollarǵa jetti. Buny ázerbaıjandyq Trend jarııalady.
Bul ótken jyldyń sáıkes kezeńimen salystyrǵanda qundyq kórsetkish boıynsha 38,5%-ǵa, salmaq boıynsha 2%-ǵa artyq. Ol kezde Iran Qazaqstanǵa 353 myń tonna ónim eksporttap, odan 146 mıllıon dollar tabys tapqan.
Eksporttyń negizgi bóligin aýyl sharýashylyǵy jáne azyq-túlik ónimderi, temeki buıymdary, munaı-hımııa ónimderi jáne basqa da taýarlar qurady.
Atalǵan kezeń ishinde Iran men Qazaqstan arasyndaǵy jalpy taýar aınalymy shamamen 470 myń tonna bolyp, onyń jalpy quny 244 mıllıon dollardy qurady.
Eksport kóleminiń ósýi eki el arasyndaǵy ekonomıkalyq yntymaqtastyqtyń keńeıip kele jatqanyn jáne qazaqstandyq naryqta ırandyq ónimderge qyzyǵýshylyqtyń artqanyn kórsetedi.
Report: Qazaqstan men Aýǵanstan jańa temir jol salýǵa nıetti
Qazaqstan men Aýǵanstan Týrgýndı – Gerat – Kandagar – Spın-Boldak temirjolyn salýǵa qatysý nıetin bekitetin hattamaǵa qol qoıdy. Bul týraly Qazaqstan Úkimetiniń baspasóz qyzmetine silteme jasap, Report agenttiginiń qazaqstandyq bıýrosy habarlady.
Málimetke sáıkes, memorandýmǵa Qazaqstan Premer-Mınıstriniń orynbasary – Ulttyq ekonomıka mınıstri Serik Jumanǵarınniń Aýǵanstanǵa sapary aıasynda qol qoıylǵan.
«Qol jetkizilgen ýaǵdalastyqtardyń jalǵasy retinde kólik jáne logıstıka salasyndaǵy yntymaqtastyq týraly kelisimge qol qoıý josparlanyp otyr. Osy kelisim aıasynda «Týrgýndı – Gerat» temirjol ýchaskesiniń, qajetti ınfraqurylymnyń jáne Gerat qalasyndaǵy kólik-logıstıkalyq ortalyqtyń qurylysy bastalatyn bolady», – delingen habarlamada.
Atalǵan joba Qazaqstan úshin óńirlik tranzıttik baılanystardy keńeıtý, Ortalyq jáne Ońtústik Azııa arasyndaǵy kólik-logıstıkalyq qatynastardy nyǵaıtý jáne Úndi muhıtyndaǵy porttarǵa qol jetkizý turǵysynan erekshe mańyzǵa ıe.
Jańa temirjol jelisi Aýǵanstan aýmaǵy arqyly ótetin bolashaq transulttyq dálizdiń basty býynyna aınalyp, júkterdi ońtústik baǵytta tasymaldaýdyń eń qysqa jolyn qamtamasyz etedi.
Qol qoıylǵan hattama Qazaqstan, Aýǵanstan jáne Túrikmenstan temirjoldary arasynda birlesken kásiporyn qurý múmkindigin AHQO (Astana Halyqaralyq qarjy ortalyǵy) ıýrısdıktsııasynda qarastyrýdy kózdeıdi.
Sonymen qatar, habarlamada temirjol jelisiniń boıynda bir mezgilde talshyqty-optıkalyq kabel júrgizý de josparlanǵany aıtylǵan. Serik Jumanǵarın Aýǵanstannyń azamattyq avıatsııa jáne kólik mınıstri Hamıdýlla Ahýndzamen de kezdesý ótkizdi. Taraptar eki el arasynda tikeleı áýe reısterin ashý, Aýǵanstan naryǵyna qazaqstandyq avtokólikter men avtobýstardy jetkizý, sondaı-aq aýǵanstandyq stýdentterdi Qazaqstannyń joǵary oqý oryndarynda tehnıkalyq mamandyqtar boıynsha oqytý máselelerin talqylady.
TASS: Qazaqstanda 677 myń soǵys ardageri týraly málimetter jarııalandy
Qazaqstannyń Mádenıet jáne aqparat mınıstrligi jańartylǵan «Batyrlarǵa taǵzym» onlaın-portalynda sovet-german soǵysynyń 677 myńnan astam ardageri týraly aqparatty jarııalady. Bul týraly vedomstvonyń baspasóz qyzmetine silteme jasap, reseılik TASS habarlady.
«Joba fashızmdi jeńýge baǵa jetpes úles qosqan qazaqstandyqtardyń erligi men batyrlyǵy týraly estelikti saqtap, ony keler urpaqqa jetkizýge baǵyttalǵan. Portalda kólemdi ári únemi tolyqtyrylyp otyratyn derekter bazasy usynylǵan. Qazirgi tańda 677 myńnan astam ardager týraly málimet qalyptastyryldy. Olardyń ishinde 365 Keńes Odaǵynyń Batyry, tórt eki márte batyr, jáne Dańq ordeniniń 19 ıegeri bar», – delingen habarlamada.
Portal ınterfeısi paıdalanýshylarǵa qajetti aqparatty tabýǵa ǵana emes, sonymen qatar óz týystary – ardagerler týraly estelikter men fotosýretterdi saıtqa júkteýge, sondaı-aq ózekti jańalyqtarmen tanysýǵa múmkindik beredi. Qyzmet bolashaq urpaq úshin tarıhı jadyny saqtaýǵa arnalǵan platforma retinde qyzmet etedi jáne Otan qorǵaýshylarǵa qurmet kórsetkisi keletin azamattardy biriktirýge yqpal etedi.
Buǵan deıin Qazaqstannyń mádenıet jáne aqparat mınıstri Aıda Balaeva «Batyrlarǵa taǵzym» portalyn «Elektrondyq qujattardyń biryńǵaı muraǵaty» aqparattyq júıesimen biriktirý josparlanǵanyn habarlaǵan edi. Osylaısha, qazaqstandyqtar soǵys ardagerleri men olardyń erlikteri týraly muraǵattyq qujattarǵa qol jetkize alatyn bolady.
Qazaqstan astanasynda 7 mamyr kúni Otan qorǵaýshy kúni men Uly Otan soǵysyndaǵy Jeńistiń 80 jyldyǵyna arnalǵan áskerı parad ótedi. Kórermender jaıaý paradtyq esepterdiń marshyn, mehanıkalandyrylǵan kolonnalardyń sherýin jáne avıatsııanyń áýe ushýlaryn tamashalaı alady. Paradqa 4 myńnan astam áskerı qyzmetker qatysady. Mehanıkalandyrylǵan kolonna 300-den astam áskerı jáne arnaıy tehnıkalardan turady. Áýe sherýine túrli tıptegi 66 ushý apparaty qatysady.
Soǵys jyldarynda maıdanǵa 1,3 mıllıonnan astam qazaqstandyq mobılızatsııalanǵan, olardyń jartysy urys dalasynda qaza tapty. 500-den astam qazaqstandyq Keńes Odaǵynyń Batyry ataǵyna ıe boldy. Qazaqstannyń Eńbek jáne halyqty áleýmettik qorǵaý mınıstrliginiń derekterine sáıkes, qazirgi tańda elde Uly Otan soǵysynyń 111 ardageri jáne jeńiske úles qosqan 42,5 myńnan astam azamat ómir súrýde.