Álemdik BAQ-taǵy Qazaqstan: Germanııada ustalǵan qazaqstandyq, Baıqońyr, ýran óndirisi, týrızm jáne tsıfrlandyrý

Al Jazeera: Germanııada ustalǵan Qazaqstan azamaty

- Germanııa bıligi Berlınde Qazaqstan azamatyn Reseıdiń paıdasyna tyńshylyq jasady degen kúdikpen qamaýǵa aldy, – dep habarlaıdy Al Jazeera.

Basylymnyń jazýynsha, «Sergeı K.» dep atalǵan azamat Reseı barlaý qyzmetimen uzaq ýaqyt baılanysta bolǵan. Ol Ýkraınaǵa qatysty Germanııanyń áskerı kómegi týraly aqparat jınap, NATO nysandary jóninde málimetter jibergen dep aıyptalyp otyr.

Materıalda bul is Reseıdiń Ýkraınaǵa basyp kirýinen keıin kúsheıgen tyńshylyq áreketteriniń jalǵasy retinde qarastyrylady.

Deutsche Welle: Qazaqstan eksporttaıtyn munaı marshrýtynyń ózgerýi Germanııa zaýyttaryna qalaı áser etedi

- Reseı 2026 jyldyń mamyrynan bastap Qazaqstan munaıynyń Germanııaǵa «Drýjba» qubyry arqyly tranzıtin toqtatýdy josparlap otyr, – dep jazady Deutsche Welle.

Materıalda bul sheshim Germanııadaǵy iri munaı óńdeý zaýytyna áser etetini jáne Eýropa úshin qosymsha logıstıkalyq qıyndyqtar týǵyzýy múmkin ekeni aıtylǵan.

- Qysqa merzimde munaı tapshylyǵy bolmaıdy, biraq jetkizýdiń quny qymbattaýy múmkin, - dep atap ótedi sarapshylar.

Reseı aýmaǵy arqyly Qazaqstannan Germanııaǵa ımporttalyp kelgen munaı taqyrybyn Bloomberg tarqatyp jazdy.

Munda da Schwedt refinery munaı óńdeý zaýytynyń tóńiregindegi ahýal Eýropanyń energetıkalyq qaýipsizdigi úshin mańyzdy máselege aınalyp otyrǵany aıtylǵan.

Bloomberg-tiń jazýynsha, Keńes dáýirinde Reseı munaıyn óńdeýge beıimdelip salynǵan bul kásiporyn keıingi jyldary balama shıkizat kózderin izdeýge májbúr bolǵan. 2023 jyldan bastap Qazaqstan munaıy «Drýjba» munaı qubyry arqyly jetkizilip kelgen edi. Reseı bul tranzıttiń marshrýtyn ózgertetinin málimdegennen keıin Germanııa jańa jetkizý baǵyttaryn qarastyrýǵa kirisken.

- Schwedt zaýyty Berlındi avıatsııalyq jáne kólik otynymen qamtamasyz etetin negizgi nysandardyń biri sanalady. Sondyqtan onyń turaqty jumysy tek Germanııa úshin ǵana emes, kórshi elder, sonyń ishinde Chehııa úshin de mańyzdy. Qazaqstan bıylǵy alǵashqy toqsanda Germanııaǵa munaı jetkizýdi aıtarlyqtaı arttyryp, shamamen 730 myń tonnaǵa jetkizgen edi.

Germanııa úshin Polsha arqyly jetkizý ýaqytsha sheshim bolýy múmkin. Biraq uzaq merzimde balama kózderdi ártaraptandyrý basty mindetke aınalmaq, - dep túıindeıdi avtor.

The Moscow Times (Reuters deregi): Qazaqstan ýran óndirisin 9% arttyrdy

- Qazaqstan 2026 jyldyń birinshi toqsanynda ýran óndirý kólemin 9%-ǵa arttyrdy, – dep habarlaıdy The Moscow Times.

Materıalda Kazatomprom derekterine súıene otyryp, óndiris kólemi 6 144 tonnaǵa jetkeni aıtylǵan. Jyldyq jospar 27 500-29 000 tonna deńgeıinde saqtalyp otyr.

Bul Qazaqstannyń jahandyq ıadrolyq otyn naryǵyndaǵy negizgi oıynshy retindegi pozıtsııasyn nyǵaıta túsetini de aıtylǵan.

Report.az: Qazaqstan men Ázerbaıjan birlesken týrıstik kompanııa qurady

- Qazaqstan men Ázerbaıjan birlesken týrıstik kompanııa qurý týraly kelisimge keldi, - dep habarlaıdy Report.az.

«TýrAn» atty jańa týroperator eki el arasyndaǵy týrıstik aǵyndy arttyrýǵa baǵyttalǵan. Joba ekotýrızm, mádenı jáne emdik baǵyttardy qamtıdy.

Materıalda bul bastama óńirdi birtutas týrıstik baǵyt retinde ilgeriletýge yqpal etetini aıtylǵan.

Space.com: Baıqońyrdan HǴS-qa júk jetkizildi

- Reseı «Progress-95» júk kemesin Qazaqstandaǵy Baıqońyr ǵarysh aılaǵynan ushyrdy, - dep jazady Space.com.

Keme Halyqaralyq ǵarysh stantsııasyna shamamen 3 tonna júk jetkizgen. Materıalda Baıqońyrdyń halyqaralyq ǵarysh mıssııalaryndaǵy mańyzdy róli atap ótiledi.

Xinhua: Qazaqstan jasandy ıntellekt engizýdi jedeldetti

- Qazaqstan ekonomıkanyń negizgi salalarynda jasandy ıntellekt tehnologııalaryn engizýdi jedeldetip jatyr, - dep habarlaıdy Xinhua.

Materıalǵa súıensek, AI júıeler Qazaqstanda energetıka, kólik, ónerkásip jáne memlekettik qyzmet kórsetý salalarynda qoldanylmaq. Bul sheshim tıimdilikti arttyryp, shyǵyndardy azaıtýǵa baǵyttalǵan.