Álemdik BAQ-taǵy Qazaqstan: EO-men vıza rejımin jeńildetý, porttardy damytý, Kabırhannyń jeńisi

Osy aptada birqatar sheteldik BAQ-ta elimiz týraly kóptegen maqalalar jarııalandy. Álemdik baspasóz betterinde Eýropalyq Odaqpen vızalyq rejımdi jeńildetý jáne Astana halyqaralyq forýmy týraly maqalalar legi jarııalandy. Tolyǵyraq Kazinform sarapshysynyń sholýynda.

Caspian news: Qazaqstan men Eýroodaq vıza rejımin jeńildetý jumystaryn jalǵastyrýda

Caspian news agenttigi Qazaqstan men EO ókilderi vızalyq rejımdi jeńildetý boıynsha kezdesý ótkizgenin habarlady. Kezdesý barysynda taraptar konsýldyq saladaǵy yntymaqtastyqtyń birqatar máselelerin qozǵap, QR azamattary úshin EO elderiniń vızalyq rejımin jeńildetý boıynsha konsýltatsııalardyń ekinshi kezeńin ótkizý máselesin talqylaǵan. Bul talqylaýlardyń negizgi maqsaty – Eýropaǵa vıza rejımin ońtaılandyrý. Bul konsýldyq alymdardy azaıtý, vızanyń áreket etý merzimin uzartý, ótinishterdi qaraýǵa qajetti ýaqytty qysqartýdy jáne vıza alý úshin qajetti qujattardyń biryńǵaı tizimin qurýdy qamtıdy.

Kelissózderdiń nátıjesi boıynsha, QR men EO arasyndaǵy konsýldyq saladaǵy dostyq qarym-qatynastardy odan ári nyǵaıtý boıynsha ýaǵdalastyqqa qol jetkizildi.

«Euractiv» : Qazaqstan EO ınvestorlaryna portty, áýejaıdy basqarýdy usyndy

«Euractiv» agenttigi 29 qańtarda Kaspıı teńizindegi Aqtaý jáne Quryq porttaryn, sondaı-aq 22 áýejaıdy Azııa men Eýropa arasynda kúshti tranzıttik hab qurý úshin eýropalyq ınvestorlarǵa basqarýǵa usyndy dep jazdy. Bul týraly Brıýsselde Eýropalyq Odaq pen Ortalyq Azııa kólik baılanysyna arnalǵan eki kúndik forýmnyń ashylýynda sóz sóılegen Qazaqstannyń kólik mınıstri Marat Qarabaev málimdegen.

«Biz Qazaqstannyń qalǵan 22 áýejaıyn eýropalyq ınvestorlarǵa basqarýǵa berýge daıynbyz, bul Azııa men Eýropa arasyndaǵy tranzıttik habqa aınalady», - dedi Qarabaev

Sonymen qatar, mınıstr Kaspııdegi, Aqtaýdaǵy jáne Quryqtaǵy teńiz porttaryna qatysty osyndaı áriptestik ornatý týraly da habarlady. Forýmǵa sheneýnikter, bıznes-qoǵamdastyq ókilderi jınaldy.

The Times of Central Asia: Qazaqstan Eýropa men Azııany baılanystyratyn negizgi kólik ortalyǵy bola alady

The times of Central Asia jańalyqtar agenttigi 29 qańtarda Brıýsselde (Belgııa) ótken EO jáne Ortalyq Azııa kólik qatynasy boıynsha Global Gateway ınvestorlar forýmynda QR Kólik mınıstri Marat Qarabaev Qazaqstandy Eýropa men Azııa arasyndaǵy eń negizgi ornyqty kólik baǵyty retinde usynǵanyn habarlady.

«Qarabaev aldaǵy bes jylda Qazaqstan kólik ınfraqurylymynyń iri jobalaryna 40 mlrd eýro (4 43,3 mlrd) ınvestıtsııa tartýǵa nıetti ekenin aıtty», - dep habarlaıdy The Times of Central Asia.

Agenttik osy kezeńde Qazaqstan uzyndyǵy 4700 km tranzıttik dálizdi qaıta jańartýdy jáne Transkaspıı kólik dáliziniń negizin quraıtyn joldardy jóndeýdi josparlap otyrǵanyn jazady.

«Osy jobalardy júzege asyrý úshin biz EO Global Gateway bastamasy aıasynda qarajat jınaýdy jáne eýropalyq merdigerlerdi Qazaqstandaǵy joldardyń qurylysyna qatysýǵa shaqyrýdy usynamyz», - dep keltiredi Marat Qarabaevtyń sózin The Times of Central Asia.

Maqalada Qazaqstan 1300 shaqyrym jańa temirjol jelisin salyp, qoldanystaǵy ınfraqurylymdy jańǵyrtatyny týraly aıtylady. Bul jumys Azııa men Eýropalyq Odaq arasyndaǵy kólik áleýetin arttyrýǵa baǵyttalǵan.

Reuters: Air Astana naryqtyq kapıtaldandyrýy $962 mln quraýy múmkin

Reuters agenttigi qazaqstandyq «Air Astana» avıakompanııasy Ulybrıtanııa bırjasynda lıstıng úshin baǵalar dıapazonyn belgilep, Londonnyń baıaý IPO naryǵyn yntalandyratyn aktsııalardy ornalastyrýǵa daıyndaǵanyn habarlady.

«Ornalastyrýdyń maqsaty – 300 mıllıon dollar tartý, onyń 120 mıllıonyn kompanııa tartady», - delingen Reuters maqalasynda.

Agenttiktiń habarlaýynsha, «Eır Astana» áýe kompanııasy aktsııalarynyń naryqtyq qunyn 770 mıllıon dollardan 962 mıllıon dollarǵa deıin jetkizýdi maqsat etip otyr. Qańtar aıynda jarııalanǵan alǵashqy lıstıng Qazaqstannyń ulttyq ál-aýqat qory men brıtandyq qorǵanys alyby BAE Systems (BAES.L) ) kompanııasyna áýekompanııasyndaǵy úlesin azaıtýǵa múmkindik beredi.

Trend.az: Astana halyqaralyq forýmy ótetin kún belgilendi

Ázerbaıjannyń Trend.az aqparat agenttigi kelesi halyqaralyq Astana forýmy 2024 jyldyń 13-14 maýsymynda Qazaqstannyń elordasy Astanada ótetinin habarlady.

«Halyqaralyq qaýymdastyq polıarızatsııanyń órshýi men geosaıası bólinýimen betpe-bet kelip jatqan kezde Qazaqstan mańyzdy jahandyq máselelerdi sheshýde kúsh biriktirý úshin kelissózder júrgizýge jańa alań - Astanadaǵy Halyqaralyq forýmdy usynyp otyr»,- delingen Trend.az maqalasynda.

Agenttik forýmnyń shet elderden, halyqaralyq uıymdardan, bıznes pen ǵylymı ortadan kelgen joǵary deńgeıdegi delegattarǵa klımattyń ózgerýi, azyq-túlik tapshylyǵy jáne energetıkalyq qaýipsizdik sııaqty máseleler jaıly pikirtalas júrgizip, jaýap izdeýge múmkindik beretinin jazady.

Blood Horse: Tanys bolyńyz, Kabırhan - Dýbaıdaǵy at jarysynan álem chempıonatyndaǵy Qazaqstannyń basty úmiti

At sporty týraly jazatyn amerıkalyq Blood Horse jýrnaly Dýbaıda ótken Al Maktoum Challenge Presented by Longines báıgesinde Kabırhan atty qazaqstandyq sáıgúlik ońaılyqpen jeńiske jetkenin habarlady. Talaı sheteldikti tańdaı qaqtyrǵan tulpar Qazaqstannyń atyn álemge tanytyp otyr.

Maqalada sáıgúlik 12 qańtarda Meıdandaǵy alǵashqy jarysyndta keremet óner kórsetip, máre syzyǵyn birinshi bolyp keskeni jazylǵan. Ekinshi jarysynda da ol eshkimge des bermedi. Bul jeńisten keıin Kabırhan 30 naýryzda ótetin álem chempıonatyna qatysýǵa joldama aldy.

«Ol - óte jaqsy at. Biz ony eki apta buryn jarysqa shyǵarǵanǵa deıin de myqty ekenin bildik, báıgege tyńǵylyqty daıyndaldy. Alaıda araǵa eki apta salyp, taǵy da jarys jolyna shyǵa ala ma degen kúmán bolǵa. Biraq tulparymyz báıgege qosylyp qana qoımaı, osyndaı ádemi jeńiske jetti», - dedi jeńimpaz attyń jattyqtyrýshysy Dag Ýotson.

Kabırhan 2021 jyldyń qyrkúıek aıynda Kınlendtegi jyl saıynǵy satylymda 12 000 dollarǵa satyp alynǵan.