Álemdik BAQ-taǵy Qazaqstan: Eńbek mıgratsııasy, júrgizýshisiz taksı jáne kómir generatsııasyna ınvestıtsııa
ASTANA. KAZINFORM – Ádettegideı jahandaǵy aqparat taratýshy ınternet-basylymdar eldegi kóp jaıǵa úńildi. Apta ishinde Reseı Federatsııasynyń Úkimet basshysy Mıhaıl Mıshýstınniń Qazaqstanǵa resmı jumys sapary jáne pılotsyz taksı qyzmeti aıtylypty. Eldegi kómir generatsııasyn damytýǵa jumsalatyn qarjy kólemi men eńbek naryǵyndaǵy sheteldikterdiń úlesi týraly taqyryp ta qozǵalǵan. Tolyǵyraq Kazinform tilshisiniń sholýynan oqyńyz.
The Times of Central Asia: Astanada ózdiginen júretin avtokólik synaqtan ótti
Astanada Naýryz meıramyn atap ótý kezinde pılotsyz avtokóliktiń demonstratsııalyq júrisi uıymdastyryldy. Júrgizýshisiz taksı – saladaǵy alǵashqy iri joba. Jańalyqty The Times of Central Asia taratty.
Kólik D.Serikbaev atyndaǵy ShQTÝ-dyń Lý Ban sheberhanasynda jasalǵan. Avtokólikti baǵdarlamalaý jáne marshrýt kartasyn sheberhana qyzmetkerleri ázirledi.
Júrgizýshisiz avtokólik Smart City ınfraqurylymyna jasandy ıntellekt tehnologııalaryn engizý múmkindikterin kórsetti.
Atap aıtqanda, navıgatsııa júıeleri, derekterdi óńdeý jáne qalalyq ortamen ózara is-qımyl sheshimderi tanystyryldy. Aldaǵy ýaqytta mundaı tehnologııalar qalalyq ınfraqurylymǵa kezeń-kezeńimen engizilip, onyń ishinde pılotsyz taksı qyzmetin iske qosý da ıntellektýaldy kólik júıesin damytýdyń mańyzdy baǵyttarynyń biri bolmaq.
Іs-shara jasandy ıntellekt jáne tsıfrlyq damý mınıstrligi Astana qalasynyń ákimdigi jáne Astana Innovations uıymynyń qoldaýymen ótkizildi.
Bılik ózdiginen júretin kólikti qalalyq mobıldilikti damytýdyń negizgi baǵytynyń biri retinde qarastyrýda. Bolashaqta mundaı sheshim joba ınfraqurylymyna tolyq engizilip, avtonomdy taksılerdi iske qosýy múmkin.
TASS: Memleket basshysy Reseıdiń Úkimet basshysy Mıhaıl Mıshýstındi qabyldady
Prezıdent Qasym-Jomart Toqaev elimizge jumys saparymen kelgen Reseı Federatsııasy Úkimetiniń Tóraǵasy Mıhaıl Mıshýstınmen kezdesti. Resmı aqparatty reseılik TASS aqparat agenttigi jarııalaǵan.
Kezdesýde Qazaqstan men Reseı arasyndaǵy strategııalyq seriktestiktiń jáne odaqtastyq qarym-qatynastyń nyǵaıyp kele jatqany atap ótildi. Sondaı-aq ózara tıimdi dıalog pen joǵary deńgeıde qol jetkizilgen ýaǵdalastyqtardy iske asyrý qarqyn alǵanyna nazar aýdaryldy.
Memleket basshysynyń aıtýynsha, Mıhaıl Mıshýstınniń Shymkent qalasynda ótetin Eýrazııalyq úkimetaralyq keńes otyrysyna jáne Tsıfrlyq forýmǵa qatysýy Qazaqstan-Reseı baılanystarynyń aıryqsha sıpatyn jáne ony odan ári óristetýge qos taraptyń umtylysyn rastaıdy.
Aıta keteıik, Mıshýstın Reseı Qazaqstannyń negizgi syrtqy saýda seriktesteriniń biri ári ulttyq ekonomıkaǵa iri ınvestıtsııa salýshylardyń biri ekenin jetkizdi. Sonymen qatar eki el arasyndaǵy taýar aınalymy shamamen 30 mlrd dollarǵa jetkenin aıtqan. Reseı men Qazaqstanda energetıka, ónerkásip, kólik ınfraqurylymy, aýyl sharýashylyǵy jáne tsıfrlyq ekonomıka salalarynda birlesken jobalardy iske asyrýda áleýetke ıe.
Anadolu: Qazaqstan kómir energetıkasyn damytýǵa 15 mlrd dollardan astam ınvestıtsııa salady
Jaqynda Úkimet «Kómir generatsııasyn damytý» jónindegi ulttyq jobany bekitti. Anadolu aqparat agenttiginiń habarlaýynsha, tıisti qaýlyǵa Premer-mınıstr Oljas Bektenov qol qoıǵan.
IT-sektordyń ósýi, derekter ortalyqtaryn qurý jáne jasandy ıntellektini engizý turaqty bazalyq júktemeni qajet etedi, al ony tek jańartylatyn energııa kózderi arqyly qamtamasyz etý múmkin emes. Sondyqtan Ulttyq jobada 7,8 GVt qýat kózin engizý jáne jańartý qarastyrylǵan.
Jospar boıynsha 8 jańa energııa óndirý kózin salý josparlanǵan, onyń ishinde Ekibastuz (2 640 MVt), Kýrchatov (700 MVt) jáne Jezqazǵandaǵy (500 MVt) iri nysandar, sondaı-aq Kókshetaý, Semeı jáne Óskemendegi zamanaýı JEO-lar bar.
Sonymen qatar Aqsý GRES, Ekibastuz GRES-2 jáne Qaraǵandy energııa torabyn qosa alǵanda, jumys istep turǵan 11 stansany tereń jańǵyrtý bastalady. Bul jumystar saladaǵy negizgi jabdyqtardyń tozý deńgeıin 2030 jylǵa deıin 12,6%-ǵa tómendetýge múmkindik beredi.
Jobalardy júzege asyrý bıýdjetten tys qarajatqa, ıaǵnı ınvestıtsııa tartý jolymen oryndalmaq. Investıtsııanyń jalpy kólemi – 7,5 trln teńgeden astam.
Euronews: Sheteldik mamandar Qazaqstanǵa aǵylýda
Búginde Qazaqstan halyqaralyq mamandar úshin tartymdy baǵytqa aınalyp úlgerdi. Ǵylym, bilim berý, tehnologııa jáne óner salalarynda uzaq merzimdi mansap qurýdy kózdeıtin sheteldik mamandar Astanany jıi tańdaı bastady. Euronews taqyrypty zerttep, keıipkerlerdi sóıletti.
Robototehnıka salasynda PhD ǵylymı dárejesin alǵan Hýseın Atakan Varol Kalıfornııadaǵy joǵary tehnologııalyq kompanııalardyń birinde jumys isteýi múmkin edi. Alaıda maman Qazaqstanǵa kóshý týraly sheshim qabyldap, ómiriniń jańa paraǵyn bastady. Alǵashynda bar bolǵany bir jylǵa kelgen ol ýaqyt óte birjola turaqtap qaldy. Búginde Nazarbaev Ýnıversıtetinde qyzmet istep júrgenine 15 jyl toldy
Qazaqstan halyqaralyq mamandarǵa qolaıly ortany damytyp keledi. Elge bilim berý maqsatymen keletin azamattardyń da qatary jyl sanap artty desek bolady. Mysaly, sheteldik Djanfranko Kasarın úsh jyldyq kelisimshart boıynsha International Steppe School of Astana mektebinde aǵylshyn tilinen sabaq berý úshin elordaǵa qonys aýdarǵan. Reseılik IT-maman Vladımır Belıankov, Japonııadan kelgen kordebalet ártisi ıAno Madokanyń da qonys aýdarý oqıǵasy qyzyqty.
