Álemdik BAQ-taǵy Qazaqstan: Djekı Chan fılmi, jańa jerserik pen kóleńkeli ekonomıkany qysqartý
ASTANA. KAZINFORM – Osy aptada jahandyq medıada Qazaqstanǵa qatysty jańalyq údedi. Sonyń ishinde KazSat-3R ǵarysh apparatyn ázirleý jospary, Djekı Channyń Qazaqstandaǵy fılmi kóp aıtyldy. Kóleńkeli ekonomıkaǵa JI kómegimen qarsy turý, Marokkoda ashylǵan konsýldyq týraly da jazylypty. Tolyǵyraq Kazinform tilshisiniń sholýynan oqyńyz.
Euronews: Qazaqstanda Djekı Channyń jańa fılminiń túsirilimi bastaldy
Álemge áıgili akter Djekı Chan Qazaqstanǵa keldi. Ol basty róldi somdaıtyn «Qudaıdyń saýyty: Ýltımatým» fılminiń túsirilimin bastady. Osyǵan oraı Euronews arnasy fılm jaıly kólemdi shyǵarylym ázirlegen bolatyn.
Túsirilim Almaty jáne Mańǵystaý oblystarynda ótip jatyr. Jobany qazaqstandyq Sálem Entertainment pen gonkongtik Billion Target kompanııalary birlesip júzege asyrýda.
Prodıýser Igor Tsaıdyń aıtýynsha, Djekı Chandy Qazaqstannyń erekshe tabıǵaty men túrli lokatsııa qyzyqtyrǵan. Fılmdi alǵash ret qazaqstandyq rejısser Robert Kýn túsiredi, al Djekı Chan barlyq shyǵarmashylyq protsesti qadaǵalaıdy. Kaskaderlik bólikti JC Stunt Team jáne qazaqstandyq Kun-Do stýdııasy ázirlemek.
Fılmniń álemdik premerasy 2027 jyldyń aqpanyna josparlanǵan.
Jiji Press: Marrakeshte Qazaqstannyń Qurmetti konsýldyǵy ashyldy
Qazaqstannyń Marokkodaǵy elshisi Sáýlekúl Saılaýqyzy Marrakesh qalasynda QR Qurmetti konsýldyǵynyń resmı ashylý rásimine qatysty.
Japondyq Jiji Press-tiń jazýynsha, Marrakeshtegi Qurmetti konsýldyq – Qazaqstannyń Marokkodaǵy ekinshi konsýldyq mekemesi. Bul qalanyń tańdalýy beker emes, óıtkeni Marrakesh Marokkonyń iri týrıstik ári iskerlik ortalyqtarynyń biri sanalady. Sondaı-aq ótken jyldan beri qoldanystaǵy vızasyz rejım eki el azamattarynyń ózara saparlarynyń kóbeıýine oń áser etken.
Reuters: Qazaqstan munaı óndirisin qysqartty
Qazir Qara teńizdegi negizgi munaı eksporttaý termınalynyń jumysy toqtap, sonyń saldarynan Qazaqstan munaı óndirý kólemin qysqartqanyn málimdedi. Reuters derekkózinshe, eldegi eń iri munaı ken orny óndiristi 50 paıyzdan astam azaıtqan.
Álemdik táýliktik munaı jetkiziliminiń shamamen 2 paıyzyn qamtamasyz etetin osy eksport baǵytynyń jumysynyń buzylýy munaı naryǵyna qosymsha qysym túsirip otyr.
The Times of Central Asia: Jańa jerserik úshin 22 mln dollardan astam qarjy bólindi
Qazaqstannyń ulttyq spýtnıktik baılanys júıesi KazSat-2 jáne KazSat-3 spýtnıkterinen, sondaı-aq Aqkól men Kókterek jerústi basqarý ortalyqtarynan turady. Endi Úkimet KazSat-3R baılanys apparatyn jasaýǵa 10,4 mlrd teńge bóldi. Aqparatty The Times of Central Asia taratqan.
KazSat-3R Qazaqstan jáne Reseı men Ortalyq Azııa elderiniń keı óńirin teleradıo habarlaryn taratý, derekter almasý, telefon baılanysy men ınternet qyzmetimen qamtamasyz etedi.
Ótken jyly Senat depýtaty Andreı Lýkın KazSat-3R jobasyn júzege asyrýǵa 40,2 mlrd teńge qajet bolýy múmkin ekenin aıtqan. Sondaı-aq ol memlekettik satyp alý talaptary sheteldik kompanııalardyń qatysýyn shekteýi yqtımal ekenin eskertken.
Xinhua: Astyq pen un eksporty 12,5%-ǵa ósti
Qazaqstan ótken jylǵy qyrkúıek men bıyl 17 shildege deıin 13,5 mln tonna astyq pen uneksporttady. Bul ótken jyldyń sáıkes kezeńimen salystyrǵanda 12,5%-ǵa artyq. Jańalyqty qytaılyq Xinhua aqparat agenttigi bólisken.
Eksport ósimine Ortalyq Azııa elderi men Aýǵanstanǵa tasymaldanǵan ónim yqpal etipti. Atap aıtqanda, astyq eksporty Ózbekstanǵa – 37%-ǵa, Aýǵanstanǵa – 59%-ǵa, Túrikmenstanǵa – 34%-ǵa, Qyrǵyzstanǵa – 1,4 esege artqan.
Report: Kóleńkeli ekonomıkany JI kómegimen tejeıdi
Qazaqstanda 2026–2028 jyldarǵa arnalǵan kóleńkeli ekonomıkaǵa qarsy is-qımyl jónindegi keshendi is-sharalar jospary bekitildi. Joba týraly Report jazdy.
Josparda ekonomıkanyń ashyqtyǵyn arttyrý maqsatynda tsıfrlandyrýǵa arnalǵan 53 is-shara qamtylǵan. Olardyń qatarynda saýda, qurylys, kólik, aýyl sharýashylyǵy, densaýlyq saqtaý jáne bilim berý salalary bar. Negizigi qural jasandy ıntellekt tehnologııalaryn paıdalanatyn biryńǵaı tsıfrlyq monıtorıng platformasy bolady.
