Álemdik BAQ-taǵy Qazaqstan: Devıd Kemeronnyń sapary, bıýdjetti únemdeý rejımi
Osy aptada birqatar sheteldik BAQ-ta Qazaqstan týraly kóptegen maqala jarııalandy. Álemdik baspasóz betterinde Ulybrıtanııa Syrtqy ister mınıstri Devıd Kemeronnyń Astanaǵa sapary jáne munaıdy artyq óndirý týraly Energetıka mınıstrliginiń málimdemesi jarııalandy. Halyqaralyq baspasóz Qazaqstan týraly taǵy ne jazdy – Kazinform tilshisiniń sholýynan oqyńyz.
Anadolu agency: Qazaqstan men Ulybrıtanııa strategııalyq áriptestik jáne yntymaqtastyq týraly kelisimge qol qoıdy
Túrkııalyq Anadolu agency aqparat agenttigi Ulybrıtanııanyń bas dıplomaty Devıd Kemeronnyń Astanaǵa resmı sapary barysynda Qazaqstan men Ulybrıtanııa arasynda strategııalyq seriktestik pen yntymaqtastyq týraly kelisimge qol qoıylǵanyn habarlady.
Maqalada kelisimge Qazaqstan Respýblıkasynyń syrtqy ister mınıstri Murat Nurtileý men Ulybrıtanııa syrtqy ister mınıstri Devıd Kemeron arasyndaǵy kelissózder nátıjesinde qol qoıylǵany atap ótilgen.
Bul jan-jaqty kelisim Astana men London arasyndaǵy saıası, saýda jáne ınvestıtsııalyq qatynastardy jańa deńgeıge shyǵarýdaǵy mańyzdy qadam bolmaq, – dep keltirdi basylym Qazaqstannyń syrtqy ister mınıstriniń sózin.
Sonymen qatar, agenttik Devıd Kemeronnyń Qazaqstan Prezıdenti Qasym-Jomart Toqaevpen kelissózder júrgizgenin jazdy. Kelissózder barysynda Qazaqstan basshysy óz eli men Ulybrıtanııa arasyndaǵy ekijaqty yntymaqtastyqtyń qarqyndy damyp kele jatqanyn atap ótken. Al, ulybrıtanııalyq saıasatker birqatar salada áriptestikti nyǵaıtýǵa nıetin málimdegen.
Energetıka, bilim, bıznes jáne mádenıet salalaryndaǵy yntymaqtastyqty nyǵaıtýǵa jáne halyqtar arasyndaǵy baılanystardy órkendetýge nıettimiz, – dep keltiredi Anadolu agenttigi Devıd Kemeronnyń sózin.
The Times of Central Asia: Qazaqstan etnıkalyq qazaqtardy tarıhı otanyna oralýǵa shaqyrady
Halyqaralyq The Times of Central Asia agenttigi elimizge qandastarymyzdyń qonys aýdaryp jatqanyn habarlady. Basylym Eńbek jáne halyqty áleýmettik qorǵaý mınıstrligine súıenip, osy jyldyń qańtar-sáýir aralyǵynda 4351 etnıkalyq qazaq tarıhı otanyna oralyp, «qandas» mártebesin alǵanyn jazdy.
1991 jyldan beri 1 132 700 etnıkalyq qazaq elge oraldy. 2023 jyldan bastap «bir tereze» qaǵıdaty boıynsha «qandas» mártebesin berýdiń pılottyq shema boıynsha Qazaqstannyń sheteldegi elshilikteri arqyly 7518 etnıkalyq qazaqtyń ótinishi qabyldandy. Bıyl oralǵandardyń 51,1% Qytaıdan; 31,9% Ózbekstannan; 6,4% Túrikmenstannan; 5,4% Mońǵolııadan; 3,7% Reseıden, 1,5% basqa elderden kelgen. Eńbekke jaramdy jastaǵylar – 59,1%, kámeletke tolmaǵandar – 31,7%, zeınetkerler – 9,2%, – dep jazdy basylym.
Sondaı-aq, agenttiktiń jazýynsha, el úkimeti etnıkalyq qazaqtardy eldiń soltústigi men shyǵysyndaǵy jumys tapshy óńirlerge, atap aıtqanda, Aqmola, Abaı, Qostanaı jáne Pavlodar oblystaryna kóshirip jatyr.
Eureporter: Qazaqstannyń kómek alýshydan donorǵa deıingi joly: Qazaqstannyń damý úshin bóletin kómegi aımaqtyń qaýipsizdigine qalaı yqpal etedi
Eureporter jańalyqtar portaly KazAid tóraǵasy Arken Arystanovtyń Qazaqstannyń ózi kómekke muqtaj elden donorǵa deıingi joly jáne Respýblıkanyń kómegi aımaqtaǵy qaýipsizdikke qalaı yqpal etip jatqany týraly pikirin jarııalady.
Bir eldegi daǵdarys onyń kórshilerine, tipti búkil jer sharyna áser etýi múmkin. BUU-nyń 2030 jylǵa deıingi turaqty damý jónindegi kún tártibi osy aqıqatqa negizdeledi, onda damý maqsatynda yntymaqtastyqtaǵy áriptestik qajet ekenine basa nazar aýdarylady. Men KazAid tóraǵasy retinde Qazaqstan kómekke muqtaj elden donor elge aınalǵan sátinen beri osy jahandyq qaǵıdatty ustanyp kele jatqanyn maqtanyshpen aıta alamyn, – dep keltirdi basylym Arken Arystanovtyń sózin.
Maqalada ekonomıkalyq ósim damýǵa yqpal etetin basty kúsh ekeni atap ótilgen. Qazaqstan 1991 jyly táýelsizdik alǵannan beri aıtarlyqtaı ekonomıkalyq ósimge qol jetkizdi.
Daryo: Qazaqstan OPEK+ kelisimi aıasynda 2024 jyly artyq óndirgen munaıdy óteýge ýáde berdi
Ózbekstannyń Daryo agenttiginiń habarlaýynsha, QR Energetıka mınıstrligi 2024 jyldyń 1 toqsanynda artyq munaı óndirýdi joıý josparyn jarııalady. Bul mindetteme OPEK+ Birlesken mınıstrlik monıtorıng komıtetiniń (BMMK) 53-shi otyrysynyń dırektıvalaryna sáıkes keledi. Energetıka mınıstrligi el OPEK+ ýaǵdalastyǵy aıasynda kelisilgen óndirý kólemine sáıkes keltirý úshin 2024 jyly ótemaqy tóleýdiń egjeı-tegjeıli josparyn ustanatynyn aıtty.
Biz árbir eldiń óz mindettemelerin saqtaýy jáne munaı naryǵyn turaqtandyrý úshin yntymaqtastyqty saqtaýdyń mańyzdylyǵyn túsinemiz, – dep keltiredi Daryo Energetıka mınıstrliginiń habarlamasyn.
Maqala avtory Qazaqstan Úkimeti artyq óndiristi basqarýdyń strategııalyq tásilin ázirledi, ol kelesi jyly kezeń-kezeńimen júzege asyrylady dep atap ótti. Bul bastama – 2024 jylǵy naýryzda tirkelgen artyq óndirýge jaýap bolyp otyr. Ol kezde munaı óndirý kólemi shekten táýligine 131 000 barrelge asyp ketken jáne ol aýa raıynyń qolaısyzdyǵy men jylytý maýsymynyń uzaqqa sozylýymen baılanysty bolǵan. Mınıstrlik bolashaqta óndiris kólemin túzetip otyryp, osy mindettemeni oryndaıtynyn habarlady.
The Times of Central Asia: Qazaqstanda tasqyn qaýpi áli de bar, biraq keıbir turǵyndar úılerine oralyp jatyr
Halyqaralyq The Times of Central Asia jańalyqtar portaly Qazaqstan alapat sý tasqynymen kúresip jatqanyn habarlady.
Birneshe apta boıy Qazaqstanda turǵyndardy evakýatsııalaý, sý sorý jáne bógetterdi nyǵaıtý jumystary júrgizilip jatyr. Qaýip áli de seıilgen joq, degenmen keıbir aımaqtarda sý deńgeıi tómendedi jáne el úkimeti tabıǵı apattan zardap shekkenderge kómek kórsetý úshin jumys istep jatyr, – dep jazdy The Times of Central Asia maqalasynda.
Maqalada úkimettiń málimetine silteme jasaı otyryp jazylǵandaı, qazirdiń ózinde topan sýǵa baılanysty evakýatsııalanǵan 22 700-ge jýyq adam úılerine oraldy, Aqtóbe sııaqty sý tasqynynan eń kóp zardap shekken óńirlerde jaǵdaı turaqtaldy. Degenmen, evakýatsııalaý ortalyqtarynda myńdaǵan adam qalyp otyr, olardyń kóbi – balalar. 2024 jyldyń naýryzynda bastalǵan sý tasqynynda 100 myńnan asa adam qaýipsiz jerge kóshirildi.
Aqtóbe oblysynda jańa úılerdiń qurylysy bastalyp ta ketti. Qostanaı oblysynyń Arqalyq qalasynda zardap shekken 27 adamǵa páter satyp alyndy. Basqa óńirlerde de jańa turǵyn úıler berildi, – dep tolyqtyrdy basylym.
Trend: Qazaqstan bıýdjetti qatań únemdeý rejımin engizedi – Qasym-Jomart Toqaev
Qazaqstanda memlekettik qarajatty únemdeý rejımi engiziledi. El Prezıdenti Qasym-Jomart Toqaev Qazaqstan halqy Assambleıasynyń XXXIII sessııasynda osyndaı málimdeme jasady. Bul týraly Ázerbaıjannyń Trend jańalyqtar portaly habarlady.
Elimizdegi kompanııalar, jeke kásipkerler túrli kómek qorlaryna qomaqty qarjy aýdardy. Qarajat kún saıyn túsip jatyr, kómek qory ulǵaıady dep senemin. Kásipkerlerge zor alǵys aıtamyn. Bolashaqta da halqymyzdyń ıgiligi úshin birge jumys isteımiz dep senemin.Jınalǵan qarajat eldi mekenderdi qalpyna keltirýge jumsalady. Sondaı-aq apattyń kesirinen qıyn jaǵdaıǵa tap bolǵan azamattarǵa kómek retinde beriledi. Eshkim eleýsiz qalmaıdy. Memleket shyǵyndy túgel óteıdi. Tasqynnyń zardabyn joıý úshin bıýdjet shyǵystary qysqartylatyn boldy. Memleket qarjysyn qatań únemdeý rejımi engiziledi, – dep keltiredi Qasym-Jomart Toqaevtyń sózin Trend.