Álemdik BAQ-taǵy Qazaqstan: Data-ortalyq salý, $64 mlrd ulttyq rezerv jáne janar-jaǵarmaı kontrabandasy
ASTANA. KAZINFORM – Bul aptada álemdik basylymdar Qazaqstan jaıly birshama jańalyq jarııalady. Eldegi jyldyq ınflıatsııanyń tómendeýi, Shyǵys Azııamen bilim berý salasyndaǵy baılanys jáne shekaradan zańsyz janar-jaǵarmaı alyp shyǵý áreketi talqylanǵan. Pavlodar oblysyndaǵy Data Center Valley jobasy men ulttyq rezervterdiń ósimi týraly da jazylypty. Tolyǵyraq Kazinform tilshisiniń sholýynan oqyńyz.
Report: Qazaqstannyń ulttyq rezervteri 64 mıllıard dollarǵa jetti
Qazaqstannyń halyqaralyq rezervteri men Ulttyq qor aktıvteri ósti. Shilde aıynyń qorytyndysy boıynsha eldiń jalpy halyqaralyq rezervteri 3 paıyzdan astam ulǵaıyp, 63,7 mıllıard dollarǵa jetken. Jańalyqty Report agenttigi taratty.
Negizgi ósim erkin aıyrbastalatyn valıýtadaǵy aktıvterdiń ulǵaıýy esebinen bolǵan, olardyń kólemi shamamen 15,5 mıllıard dollar. Sonymen qatar monetarlyq altynnyń quny da statıstıkaǵa oń áser etken, onyń jalpy quny 48 mıllıard dollardan asty.
Osylaısha, shildedegi rezervterdiń ósýine valıýtalyq aktıvterdiń artýy jáne baǵaly metaldar naryǵyndaǵy qolaıly jaǵdaı áser etti.
The Times of Central Asia: 2027 jyly iri data-ortalyq iske qosylady
Keler jyly Pavlodar oblysynda Derekterdi óńdeý ortalyqtary alqaby (Data Center Valley) iske qosylady. Aqparatty The Times of Central Asia jarııalaǵan.
Qazir Data Center Valley jobasyna arnalǵan birinshi nysannyń qurylysy qarqyndy júrip jatyr. Energııa ortalyqtary men AI-fabrıkalardyń ǵımarattyna arnalǵan qazanshuńqyrlardy ázirleý 90% aıaqtalǵan. Jeltoqsan aıynda data-ortalyq pen energobloktar, ákimshilik-turmystyq keshen, baqylaý-ótkizý pýnktteri men syrtqy ınjenerlik jelilerdiń korpýstary turǵyzylady. Birinshi nysandy paıdalanýǵa berý 2027 jylǵy maýsymǵa josparlanǵan.
Data-ortalyqtyń qýaty 50 MVt shamasynda. Ortalyqty energııamen qamtamasyz etý úshin qýaty 215 MVt qosalqy stansa satyp alyndy.
TASS: 400-den astam zańsyz janar-jaǵarmaı tasymalynyń joly kesildi
1-10 tamyz aralyǵynda Qazaqstan shekarashylary 400-den astam zańsyz janar-jaǵarmaı alyp shyǵý áreketine tosqaýyl qoıdy. Ulttyq qaýipsizdik komıtetiniń deregin reseılik TASS agenttigi bólisti.
Tamyz aıynyń alǵashqy on kúninde memlekettik shekara taýarlar men júkterdi zańsyz tasymaldaýdyń 551 deregin anyqtaǵan. Onyń 411-i – janar-jaǵarmaıdy zańsyz áketý áreketi; 140-y – halyq tutynatyn taýarlardy zańsyz tasymaldaýǵa baılanysty quqyqbuzýshylyq.
Eske sala keteıik, maýsym aıynda janar-jaǵarmaıdy shetelge zańsyz tasymaldaıtyn alty arnanyń jabylǵany habarlanǵan edi.
People Daily: Jyldyq ınflıatsııa 10 aı qatarynan tómendedi
Prezıdent Qasym-Jomart Toqaev Ulttyq bank tóraǵasy Tımýr Súleımenovti qabyldady. Júzdesýde 2026 jylǵy qańtar-shilde aılaryndaǵy aqsha-kredıt saıasatyn júzege asyrý qorytyndysy habarlanǵan. Jańalyqty qytaılyq Jenmın jıbao basylymy jazdy.
Tımýr Súleımenovtiń aıtýynsha, jyldyq ınflıatsııa on aı qatarynan tómendep, shildede 10,2 paıyzdy qurady. Buǵan júrgizilip otyrǵan aqsha-kredıt saıasaty, teńge baǵamynyń nyǵaıýy yqpal etip otyr.
Jiji Press: Japonııa men Koreıanyń jetekshi ýnıversıtetterimen seriktestik keńeıýde
Ǵylym jáne joǵary bilim mınıstri Saıasat Nurbek Japonııa men Koreıa Respýblıkasynyń jetekshi ýnıversıtetteri jáne ǵylymı-tehnologııalyq uıymdarynyń basshylarymen kezdesti. Sapar barysyn japondyq Jiji Press agentigi aqparattandyrdy.
Mınıstr Tokıoda Tokyo Metropolitan University jáne Birikken Ulttar Uıymy Ýnıversıtetiniń (UNU) basshylyǵymen kezdesti. Tokyo Metropolitan University rektory Takae Ohashımen ýnıversıtetter arasyndaǵy baılanys, akademııalyq utqyrlyq, tájirıbe almasý jaıy talqylanǵan. Mınıstr qos bilim berý uıymynyń jetekshilerin qarasha aıynda Astanada ótetin Strategııalyq seriktester forýmyna shaqyrdy.
