Álemdik BAQ-taǵy Qazaqstan: BUU-ny reformalaý, ınvestorlardyń jospary jáne ushaq apatynyń esebi
ASTANA. KAZINFORM – Tamyzdyń bas kezeńinde Qazaqstan jaıly jańalyqtar kóptegen aqparat quraldarynda jaryq kórdi. Birinde elimizdiń Birikken Ulttar Uıymyn reformalaý isin qoldaıtyny jazylsa, endigisinde ázerbaıjandyq ınvestorlardyń Qazaqstanda týrıstik nysan salýdy josparlap otyrǵany aıtylǵan. Budan bólek, byltyr Aqtaý mańynda qulaǵan ushaqtyń jaı-kúıi de sóz bolypty. Al Abaıdyń 180 jyldyǵy tusynda qazaqstandyq jáne ózbekstandyq jazýshylardyń yntymaqtastyǵy artýda. Tolyǵyn Kazinform agenttiginiń sholýynan oqı alasyz.
Anadolu: Qazaqstan BUU-ny reformalaý isin qoldaıdy
Prezıdent Qasym-Jomart Toqaev Qazaqstanǵa saparmen kelgen BUU Bas hatshysy Antonıý Gýterrıshpen kelissózder ótkizdi. Júzdesýde Toqaev joǵary deńgeıdegi qonaqtyń kelýi el úshin erekshe mańyzǵa ıe ekenin atap ótip, kezekti sapar BUU-nyń turaqty damý kún tártibine berilgen mindetterin kórsetedi dep málimdedi. Jańalyqty Aqordaǵa silteme jasap túrkııalyq Anadolu agenttigi jazdy.
Qasym-Jomart Toqaevtyń aıtýynsha, Ortalyq Azııada turaqty damý maqsattary boıynsha birinshi Ortalyqtyń ashylýy búkil óńir úshin mańyzdy jetistik bolyp sanalady. Sonymen qatar Memleket basshysy Qazaqstannyń BUU-ny reformalaý jónindegi Bas hatshynyń kúsh-jigerin tolyq qoldaıtynyn jetkizdi.
Óz kezeginde Antonıý Gýterrısh Qazaqstannyń halyqaralyq yntymaqtastyqty nyǵaıtýǵa jáne turaqty damý maqsattaryn ilgeriletýge qosqan úlesin atap ótti.
Kezdesýge qatysýshylar Ortalyq Azııa men Aýǵanstan úshin turaqty damý maqsattary jónindegi BUU Aımaqtyq ortalyǵynyń qyzmetiniń bolashaǵy, BUU-ny reformalaý máseleleri, halyqaralyq jáne aımaqtyq kún tártibi, sondaı-aq basqa da ózekti taqyryptardy talqylady.
Kezdesý sońynda qos tarap Ortalyq Azııa men Aýǵanstan úshin turaqty damý maqsattary jónindegi BUU Aımaqtyq ortalyǵyn qurý týraly Qazaqstan Úkimeti men BUU arasyndaǵy Kelisimge qol qoıdy.
Azertag: Ázerbaıjandyq ınvestorlar Qazaqstanda týrıstik nysan salýdy josparlap otyr
Taıaýda Abaı oblysynyń ákimi Berik Ýálı men Qazaqstannyń Ázerbaıjandaǵy elshisi Álim Baıel kezdeskenin Azertag agenttigi bólisti.
Buǵan qosa kezdesýge Ázerbaıjan men Qazaqstannyń iskerlik keńesiniń orynbasary, Túrik kásipkerler qaýymdastyǵy basqarmasynyń tóraǵasy Aslan Qýnııarov, Ázerbaıjan ınvestıtsııalyq holdıngi men kásipkerlikti damytý qorynyń ókilderi qatysqan.
Ázerbaıjan delegatsııasy Alakól jaǵalaýynda halyqaralyq emdeý-saýyqtyrý keshenin salý boıynsha ınvestıtsııalyq jobasyn tanystyrdy. Investorlar bir ýaqytta 800 adamǵa arnalǵan jyl boıy jumys isteıtin týrıstik nysan salýdy josparlap otyr. Investıtsııa kólemi 20 mıllıon dollardy quraıdy. Keshen iske qosylǵannan keıin shamamen 200 jańa jumys orny ashylady. Sonymen qatar, joba óńirdiń týrıstik tartymdylyǵyn arttyryp, jergilikti bıýdjetke salyq túsimderin kóbeıtedi jáne medıtsına men demalystyń qıylysynda jańa klaster qalyptastyrady.
Elshi Álim Baıeldiń aıtýynsha, qazir Ázerbaıjan men Qazaqstan odaqtyq qatynastardyń jańa deńgeıine kóterildi.
– Qazaqstan Prezıdenti Qasym-Jomart Toqaev ótken jyly úsh ret resmı saparmen Ázerbaıjanǵa bardy. Memleket basshysy bizge naqty mindet qoıyp, ekonomıkalyq baılanystardy nyǵaıtý jáne óndiris pen týrızm salasynda birlesken jobalardy júzege asyrýdy tapsyrdy. 2024 jyly Qazaqstan men Ázerbaıjan birlesken ınvestıtsııalyq qoryn qurdyq. Eger Alakóldegi joba iske assa, ol osy qor sheńberindegi alǵashqy jobalardyń biri bolýy múmkin, – dedi Álim Baıel.
Óz kezeginde oblys ákimi Berik Ýálı de týrıstik jobanyń óńir úshin mańyzdylyǵyn atap ótti.
– Qazaqstan men Ázerbaıjan – baýyrlas halyqtar, bizdi ortaq tarıh pen rýhanı tamyr biriktiredi. Sizdiń saparyńyzǵa jáne oblysymyzda iri týrıstik keshen qurý bastamasyna qýanyshtymyz. Qazir Alakól týrıstik aımaǵynyń bas jospary ázirlenýde. Qurylys úshin jer ýchaskesin bólýge daıynbyz. Ákimdik qoldaý kórsetedi, – dedi Berik Ýálı.
Trend: AZAL ushaǵynyń apaty týraly sońǵy esep birneshe aı ishinde daıyn bolady
Qazaqstannyń vıtse-premeri Qanat Bozymbaevtyń bul sózin ázerbaıjandyq Trend agenttigi habarlady.
2024 jylǵy 25 jeltoqsanda «Ázerbaıjan áýe joldary» AQ-ǵa tıesili «Embraer 190-100 IGW» jolaýshylar ushaǵy Baký qalasynan Reseı Federatsııasynyń Groznyı qalasyna J2-8243 reısimen ushyp bara jatyp, Qazaqstannyń Aqtaý áýejaıy mańynda apatqa ushyrady. Apat saldarynan ekıpajdyń eki múshesi, aǵa bortserik jáne 35 jolaýshy qaza tapty.
Qazaqstannyń Kólik mınıstrligi jarııalaǵan aldyn ala esepte birneshe málimet rastalǵan. Ushaq ushýǵa tolyqtaı jaramdy bolǵan, FDR derekteri júıelerdiń durys jumys istegen; Eki qozǵaltqysh ta tehnıkalyq aqaýsyz jumys istedi; Reseı áýe keńistiginde, sonyń ishinde Groznyı áýejaıy ústinde ushaq GPS sıgnaldaryn joǵaltty; Qolaısyz aýa raıyna baılanysty ushaq ekinshi qonýǵa jete almady, kapıtan Bakýge qaıtýǵa sheshim qabyldady. Osy kezde CVR-de eki syrtqy dybys tirkeldi; Bul dybystardan keıin gıdravlıkalyq júıeler kezekpen isten shyqty; Ushaqtyń quıryq bóligi men sol qanat, sondaı-aq stabılızatorlarda syrtqy zaqymdar anyqtaldy; Bul zaqymdar syrtqy obektilerdiń áserinen bolǵan, biraq ushaq qustyń soqqysyna ushyrady degenge dálel joq.
Keıin zaqymdalǵan jerlerden ushaqqa tıesili emes zattar tabylyp, olardyń fotosýretteri jarııalandy, qosymsha saraptamalar josparlanǵan. Al 05:13:32-de negizgi basqarý júıeleri isten shyqsa, 05:21:42-de dıspetcher «Kover» operatsııasyn habarlaǵan. Ottegi ballonynyń jarylýy týraly málimet bolmaǵan.
Halyqaralyq azamattyq avıatsııa uıymynyń Chıkago konventsııasyna sáıkes, aldyn ala esepten keıin apat sebepteri týraly tolyq esep oqıǵa bolǵan kúnnen bastap bir jyl ishinde daıyn bolýǵa tıis.
Uza: Qazaqstan men Ózbekstan arasyndaǵy ádebı yntymaqtastyqtyń jańa kezeńi bastaldy
Keıingi jyldary Ózbekstan Jazýshylar odaǵy mádenı-aǵartýshylyq jáne ádebı yntymaqtastyqty nyǵaıtýǵa erekshe mán berip keledi. Jýyrda uıymǵa Qazaqstannyń Ózbekstandaǵy Tótenshe jáne Ókiletti Elshisi Beıbit Atamqulov barǵanyn Uza agenttigi jazdy.
Kezdesýge sondaı-aq elshiliktiń mádenıet jónindegi keńesshisi Serjan Sársenbaev, hattamalyq qyzmettiń qyzmetkeri Almas Aýbakırov jáne Qazaqstannyń «Qazaqstan» men «Habar 24» telearnalarynyń jýrnalısteri qatysqan.
Ózbekstan tarapynan kezdesýge Jazýshylar odaǵynyń tóraǵasy Sırojıddın Saııd, tóraǵa orynbasary Ǵaırat Májıd, halyqaralyq baılanystar jáne kórkem aýdarma bóliminiń jetekshi mamany Gúlobodon Týraeva, sondaı-aq odaq janyndaǵy qazaq ádebıeti keńesiniń tóraǵasy Tursynalı Ahmedov kelgen.
Suhbat barysynda elshi túrki ádebıetiniń 100 tomdyq jınaǵy shyqqanyna alǵys aıtyp, onyń ishinde qazaq shyǵarmalary laıyqty oryn alǵanyn atap ótti. Sondaı-aq Ózbekstan Jazýshylar odaǵynyń uly qazaq aqyny Abaıdyń týǵan kúnin atap ótýge belsendi qatysyp jatqanyna rızashylyǵyn jetkizdi.
Óz kezeginde Sırojıddın Saııd «Tańsholpan» qazaq jýrnaly 2023 jyldy «Ózbek ádebıeti jyly» dep jarııalap, osy ýaqytta 30-dan astam ózbek aqyndary men jazýshylarynyń shyǵarmalaryn aýdaryp, jarııalaǵany úshin alǵys bildirdi. Sonymen qatar ol qazir qazaq tilinde balalar ádebıetin qosa alǵanda, 52 ózbek avtorynyń kitaptaryn shyǵarý jumystary júrgizilip jatqanyn aıtty.
Kezdesýdiń sońynda elshige Ózbekstan Jazýshylar odaǵynyń 15 basylymy men «Ózbek poezııasynyń antologııasy» kitabynyń III tomy syıǵa berildi.