Álemdik BAQ-taǵy Qazaqstan: BUU Bas hatshysy Astanaǵa keledi, Sıngapýr, Túrkııa, AQSh-pen seriktestik
Osy aptada álemniń buqaralyq aqparat quraldary elimizge qatysty kóp materıal jazdy. Qazaqstan Prezıdentiniń Sıngapýrǵa sapary, saýdany damytý, BUU Bas hatshysynyń aldaǵy jospary BAQ nazarynda boldy. Sheteldegi basylymdar Qazaqstan týraly basqa qandaı habar taratqanyn Kazinform tilshisiniń sholýynan oqyńyz.
The Straits Times: Sıngapýr fırmalary tehnologııa jáne ınnovatsııa salasynda qazaqstandyq kásiporyndarmen birlese jumys isteıdi
23 mamyrda Qazaqstan-Sıngapýr bıznes forýmy ótti. Qazaqstan Prezıdenti Qasym-Jomart Toqaev pen Sıngapýr Premer-mınıstriniń orynbasary Heng Sýı Keattyń qatysýymen ótken jıynda eki el arasyndaǵy taýar aınalymy 2023 jyly 50 paıyzǵa ósip, 600 mln AQSh dollarynan asqany aıtyldy. Sondyqtan Qazaqstan Sıngapýrdyń Ortalyq Azııadaǵy basty saýda seriktesi sanalady. Bul jaıynda sıngapýrlyq The Straits Times basylymy jazdy.
Sondaı-aq basylym Qazaqstan Prezıdenti Qasym-Jomart Toqaevtyń baıandamasyn aıryqsha atap ótken. Memleket basshysy eki el saıası jáne ekonomıkalyq turǵydan áriptes ekenin, aldaǵy kezeńde bul yntymaqtastyq arta túsetinin jetkizgen.
– Biz sıngapýrlyq kompanııalarmen taza energııa óndirý, sondaı-aq tehnologııalar men tájirıbe almasý salasyndaǵy seriktestikti keńeıtýge múddelimiz. Mysaly, Sıngapýr qoqys jaǵý arqyly qýat óndiretin ozyq qondyrǵylarymen jáne qaldyqtardy basqarý jónindegi ınnovatsııalyq tehnologııalarymen tanymal, – dep keltirdi Toqaevtyń sózin The Straits Times.
Maqala sońynda basylym Qazaqstan men Sıngapýr tarapy saýda múmkindikteri, tsıfrly ekonomıka men bıznestiń órkendeýi baǵytynda jańa bastamalarǵa jol ashqanyn kórsetken.
Anadolu Agency: Qazaqstan Prezıdenti Túrkııa Ulttyq Májilisiniń tóraǵasyn qabyldady
Túrkııa Ulttyq Májilisiniń tóraǵasy Nýman Kýrtýlmýshtyń Astanaǵa sapary jóninde Anadolu agenttigi jazdy.
Agenttiktiń málimetinshe, Qazaqstan Prezıdenti Qasym-Jomart Toqaevpen kezdesýinde qos tarap halyqaralyq uıymdar men eki el arasyndaǵy yntymaqtastyqty nyǵaıtý jaıly sóz qozǵap, Túrki memleketteri uıymyna múshe baýyrlas elderdiń ózara yntymaǵyn nyǵaıtý jóninde pikir almasty. Sonymen qatar Qazaqstan men Túrkııa arasyndaǵy keńeıtilgen strategııalyq seriktestikti odan ári nyǵaıtý máselesi talqylandy.
Kezdesýde Túrkııa Ulttyq Májilisiniń tóraǵasy túrki halyqtaryna ortaq tulǵa Qoja Ahmet ıAssaýı atyndaǵy Qazaq-Túrik halyqaralyq ýnıversıtetinde ótetin konferentsııaǵa qatysatynyn aıtqan. Odan ári ol Qazaqstanda tabysty saıası, ekonomıkalyq jáne áleýmettik reformalar júrip jatqanyn, munyń bári el damýyna oń yqpal tıgizetinine senim bildirdi.
Óz kezeginde basylym Qazaqstan Prezıdenti Qasym-Jomart Toqaevtyń eki el arasyndaǵy parlamenttik dıplomatııanyń áleýetin joǵary baǵalap, Nýman Kýrtýlmýshtyń sapary Túrkııa men Qazaqstan arasyndaǵy dostyq pen yntymaqtastyq týraly kelisimniń 30 jyldyǵy qarsańynda ótip jatqanyna erekshe zer salǵanyn atap ótken. Maqala sońynda Túrkııa – Qazaqstannyń eń iri bes saýda seriktesiniń biri ekeni, sonymen qatar basty 10 ınvestordyń qataryna kiretini, keleshekte ózara saýda aınalymy 10 mıllıard dollarǵa jetetini týraly jazylǵan.
Daryo: Qazaqstan men Sıngapýr ózara saýda kólemin 2 mlrd AQSh dollaryna jetkizýdi josparlap otyr
Qazaqstan Prezıdentiniń Sıngapýrǵa sapary bul aptada álem BAQ-tarynyń nazarynan túsken joq. Daryo basylymy Qasym-Jomart Toqaev pen Sıngapýr Prezıdenti Tarman Shanmýgaratnamnyń kezdesýine toqtalǵan. Eki el basshylary tıimdi ınvestıtsııalyq jobalardy talqylap, sonyń ishinde ekijaqty qarym-qatynastardyń quqyqtyq negizin nyǵaıtýǵa kelisken.
Basylymnyń jazýynsha, Qazaqstanda 140-tan astam sıngapýrlyq kompanııa men birlesken kásiporyn jumys isteıdi. Sıngapýrdyń Qazaqstan ekonomıkasyna salǵan ınvestıtsııasynyń jalpy kólemi 1,7 mıllıard AQSh dollarynan asqan. Sonymen qatar qos tarap bilim berý jáne adamı kapıtaldy damytý salalaryndaǵy yntymaqtastyqty jandandyrý jaıyn sóz etti.
The Times of Central Asia: Qazaqstan men AQSh ókilderi adam quqyqtary jáne demokratııalyq reformalardy talqylady
20 mamyr kúni Astanada Qazaqstan men AQSh arasyndaǵy adam quqyqtary jáne demokratııalyq reformalar boıynsha joǵary deńgeıdegi jyl saıynǵy dıalogtyń úshinshi otyrysy ótti. Qazaqstan delegatsııasyn Qazaqstan Prezıdentiniń Halyqaralyq ister jónindegi kómekshisi, elshi Erjan Qazyhan bacqarsa, AQSh delegatsııasyn Memlekettik hatshynyń azamattyq qaýipsizdik, demokratııa jáne adam quqyqtary máseleleri jónindegi orynbasary Ýzra Zeıa bastap keldi. Bul jóninde The Times of Central Asia basylymy aqparat taratty.
Basylymnyń jazýynsha, eki el, buǵan deıingi dıalogtardaǵydaı, adam quqyqtaryn, zań ústemdigin, sóz bostandyǵyn jáne halyqtyń osal top ókilderin qorǵaýdy ilgeriletý jónindegi ortaq mindetterin talqylady. Sondaı-aq AQSh delegatsııasy Qazaqstan Prezıdenti Qasym-Jomart Toqaevtyń adam quqyqtaryn qorǵaý, azamattyq qoǵam qurýdaǵy reformalary men turmystyq zorlyq-zombylyq jasaǵandarǵa jazany kúsheıtý jónindegi zańǵa qol qoıýy sekildi sharalardy joǵary baǵalady.
Buǵan qosa delegatsııa músheleri zań ústemdigi, sóz jáne BAQ bostandyǵy, din nemese senim bostandyǵy, múgedektigi bar adamdardyń quqyqtary, BUU-nyń bosqyndar isi jónindegi joǵarǵy komıssary men S5+1 platformasy aıasyndaǵy kópjaqty yntymaqtastyq máselelerin sóz etken.
Trend: BUU Bas hatshysy Qazaqstanǵa keledi
Birikken Ulttar Uıymynyń Bas hatshysy Antonıo Gýterrısh Qazaqstannyń Syrtqy ister mınıstriniń birinshi orynbasary Aqan Rahmetýllınmen kezdesýi barysynda shildede Astanada ótetin ShYU-ǵa múshe elderdiń Memleket basshylary keńesiniń otyrysyna qatysatynyn habarlady. Gýterrıshtiń Qazaqstan astanasyna kelýi Azııa elderine sapary aıasynda ótedi. Bul jaıly Trend agenttigi jazdy.
Sondaı-aq Aqan Rahmetýllın Qazaqstannyń BUU janyndaǵy turaqty ókili retindegi mıssııasyn aıaqtap, qazir Syrtqy ister mınıstriniń birinshi orynbasary qyzmetin atqarýda. Uıymnyń Bas hatshysy Rahmetýllındi jańa taǵaıyndalýymen quttyqtap, onyń birlesken jumys pen ortaq maqsattarǵa qol jetkizýge qosqan eleýli úlesin atap ótti.
Basylymnyń jazýynsha, Antonıo Gýterrısh Qazaqstan Prezıdenti Qasym-Jomart Toqaevtyń tıimdi syrtqy saıasat júrgizýdegi róline toqtalyp, álem elderimen únemi baılanysta bolǵanyna rızashylyǵyn jetkizgen. Óz kezeginde Aqan Rahmetýllın de BUU Bas hatshysyna Qazaqstanǵa turaqty qoldaý kórsetkeni úshin alǵys aıtqan.
