Álemdik BAQ-taǵy Qazaqstan: Brıýssel sapary, Aýǵanstandaǵy bıznes-forým, AI Data Center jáne sý tasqynynyń aldyn alý
ASTANA. KAZINFORM – Osy aptada jahandaǵy ınternet-basylymdar Qazaqstannyń syrtqy saıasatyna kóp úńildi. Eýropalyq odaq, AQSh, Qytaı, Taıland, Aýǵanstan taraptarymen jasalǵan aýqymdy kelisimder jańalyq ózegine aınalǵan. Tolyǵyraq Kazinform tilshisiniń sholýynan oqyńyz.
Euronews: Brıýsselde 10 mlrd eýrolyq kelisim jasaldy
Prezıdent Qasym-Jomart Toqaevtyń Brıýsselge sapary aıasynda Eýropalyq odaqpen strategııalyq qujattarǵa qol qoıyldy. Jańalyqty Euronews jarııalaǵan.
Sapardyń negizgi baǵyty kólik baılanysyn damytýǵa arnaldy. Sebebi Qazaqstan Eýropany Qytaımen jáne Shyǵys Azııanyń basqa elderimen jalǵaıtyn Orta dálizdiń boıynda ornalasqan. Astana bul dálizdiń ótkizý qýatyn 10 mıllıon tonnaǵa jetkizýdi maqsat etip otyr.
Eýropalyq komıssııada dáliz arqyly taýar men jolaýshy tasymalyn arttyrýǵa múmkindik beretin bes kelisimge qol qoıyldy. Olardyń qatarynda avıatsııalyq jáne Qazaqstan azamattary úshin Shengen vızasyn jeńildetý týraly kelisimder bar.
Sapar barysynda 10 mıllıard eýrony quraıtyn 30 kommertsııalyq kelisimge qol qoıyldy. Mysaly, Air Astana kompanııasy Airbus kompanııasynan A320 ushaqtar tobyna jatatyn 50 áýe kemesin satyp alýdy josparlap otyr.
The Times of Central Asia: AI Data Center klasteri qurylýy múmkin
Qytaıda ótip jatqan «Jazǵy Davos» ekonomıkalyq forýmy aıasynda Premer-mınıstr Oljas Bektenov SuperX AI Technology Limited dırektorlar keńesiniń tóraǵasy Hýan Chenhýnmen kezdesti. Basqosýda taraptar zamanaýı derekter ortalyǵyn qurý josparyn talqylaǵan. Aqparatty The Times of Central Asia taratty.
SuperX AI Technology Limited JI-ınfraqurylymdarǵa jáne joǵary tyǵyzdyqtaǵy derekterdi óńdeý ortalyqtaryna arnalǵan sheshimderdi damytýmen aınalysady. Kompanııa Qazaqstanda qýaty 1 GVt-qa deıin jetetin AI Data Center klasterin qurýǵa múddeli.
Aldaǵy ýaqytta JI-kampýs salý, energııamen jabdyqtaý, tsıfrlyq ınfraqurylymdy damytý josparlanyp otyr. Sondaı-aq derekterdi óńdeý ortalyqtary úshin serverlik jabdyq pen tehnologııalyq sheshimder ımporttalady.
Anadolu: Qazaqstan-AQSh sý tasqynynyń aldyn alý jónindegi baǵdarlamany qabyldady
Sý resýrstary jáne ırrıgatsııa vıtse-mınıstri Aslan Abdraımov AQSh-tyń Dynamic Aviation jáne Airborne Snow Observatories Inc. kompanııalarynyń ókilderimen kezdesti. Eki jaq kóktemgi sý aǵynyn boljaý jáne sý tasqyny qaýpi týraly erte eskertý salasyndaǵy yntymaqtastyq perspektıvasyn talqylady.
Anadolu aqparat agenttiginiń jazýynsha, Qazaqstan-AQSh sý tasqynynyń aldyn alý jónindegi baǵdarlama qabyldanǵan. Joba kezeń-kezeńimen iske asyrylyp, sý resýrstaryn basqarý salasyndaǵy uzaq merzimdi baǵdarlamaǵa aınalmaq.
Report: Kabýlda bıznes-forým ótti
Kabýlda Qazaqstan-Aýǵanstan bıznes-forýmy ótti. Іs-sharaǵa Qazaqstannyń 50-den astam kompanııasy men Aýǵanstannyń 300-ge jýyq bıznes ókili qatysqan. Mıssııa aıasynda B2B formatyndaǵy kezdesý uıymdastyrylyp, qazaqstandyq taýarlar men qyzmetterdiń kórmesi ázirlendi.
Report-tyń habarlaýynsha, bıznes-forýmda jalpy quny 235 mln dollarlyq kelimsharttarǵa qol qoıylǵan. Nesar Elyas Trading LTD kompanııasy men «Túrkistan maı zaýyty» JShS kúnbaǵys maıyn jetkizý jóninde on jyldyq memorandýmǵa qol qoıdy. Al «Shabyt» JShS Aýǵanstanǵa Speranza saýda belgisimen shyǵarylatyn jarma ónimin jetkizbek.
Budan bólek, Qazaqstannyń astyq óńdeýshiler odaǵy men Aýǵanstannyń Saýda-ınvestıtsııalyq palatasy bıdaı uny men ónimderiniń eksportyn damytý baǵytynda yntymaqtastyq ornatýǵa ýaǵdalasty.
Caspianpost: Qazaqstan men Taıland 2 jyldyq memorandýmǵa qol qoıdy
Qazaqstan men Taıland Koroldiginiń syrtqy ister mınıstrleriniń kezdesýi nátıjesinde 2027-2028 jyldarǵa arnalǵan birlesken is-qımyl baǵdarlamasyna qol qoıyldy. Bul qujat barlyq basym baǵyttar boıynsha eki eldiń seriktestigin tereńdetýdiń jol kartasy bolmaq. Mańyzdy memorandým týraly Caspianpost jazdy.
Qujatta aýyl sharýashylyǵy, tamaq ónerkásibi, kólik jáne logıstıka, jasyl energetıka, strategııalyq paıdaly qazbalar, týrızm jáne gýmanıtarlyq baılanystarǵa basymdyq berilgen. Qazaqstan Taılandty ASEAN naryǵyna shyǵatyn mańyzdy qaqpa retinde qarastyrsa, Taıland Qazaqstandy Ortalyq Azııa men Eýrazııalyq ekonomıkalyq odaqqa aparatyn negizgi kópir retinde baǵalaıdy.
