Álemdik BAQ-taǵy Qazaqstan: Benzın tasymalyna shekteý, lıtıı óńdeýdiń jańa tehnologııasy jáne bosqyn mártebesi
ASTANA. KAZINFORM – Álemdik basylymdar apta boıy Qazaqstanǵa qatysty birshama jańalyq jarııalady. Іshinde Euronews-tiń qazaq tilinde habar taratýy, BAÁ-niń qazaqstandyq kólik júrgizýshi kýáligin moıyndaýy, bosqyn mártebesin alý tártibi aıtylǵan. Janar-jaǵarmaıdy zańsyz tasymaldaýǵa qoıylǵan shekteý men lıtııdi óńdeýdiń jańa tehnologııasy da taldandy. Tolyǵyraq Kazinform tilshisiniń sholýynan oqyńyz.
Euronews: Euronews qazaq tilinde aqparat taratady
Euronews qazaq tilinde jahandyq kontent taratatyn jańa arnany iske qosady. Osylaısha, arna qazaqstandyq aýdıtorııaǵa eýropalyq jýrnalıstıka úlgisi men álemdegi mańyzdy oqıǵalar týraly jan-jaqty aqparat usynbaq.
Bul bastama kompanııanyń Qazaqstandaǵy strategııalyq damý josparynyń bir bóligi sanalady. Jańa arna Qazaqstandaǵy jáne sheteldegi qazaqtildi kórermenge Euronews-tiń jýrnalıstik ustanymyn tanystyryp qana qoımaı, Qazaqstan men Ortalyq Azııa óńirindegi oqıǵalardy halyqaralyq deńgeıde keńinen jarııalaýǵa múmkindik beredi.
Qazaq tilindegi jańa arna Euronews jelisiniń habar taratatyn 20-shy tiline aınalady. Qazirgi tańda medıajeli 14 tilde qyzmet isteıdi. Euronews-tiń Astanada redaktsııalyq haby, al Almatyda redaktsııalyq keńsesi bar.
TASS: Shekara beketteri mańynda 59 polıtsııa beketi jumys istep tur
Qazaqstanda janar-jaǵarmaıdy zańsyz áketýdiń jolyn kesý maqsatynda júrgizýshilerge baqylaý kúsheıtildi, Aqparatty reseılik TASS taratty.
Memlekettik shekaradaǵy avtomobıl ótkizý beketteriniń mańynda 59 polıtsııa beketi jumys istep tur. Onda polıtsııa qyzmetkerleri qosymsha janarmaı baktaryn zańsyz ornatqan kólikterdi tekseredi.
Jyl basynan beri kólik quraldaryn zańsyz qosymsha otyn baktarymen qaıta jabdyqtaý boıynsha 255 derek anyqtalǵan. Barlyq júrgizýshi QR Ákimshilik quqyq buzýshylyq týraly kodeksi aıasynda jaýapkershilikke tartyldy. Zańsyz áreketke barǵandardyń 195-i – shetel azamaty, al 60-y – Qazaqstan azamaty.
Caspianpost: Qazaqstannyń júrgizýshi kýáligi BAÁ-de jaramdy
25 shildeden bastap Qazaqstan men Birikken Arab Ámirlikteri arasyndaǵy júrgizýshi kýálikterin ózara taný jáne almastyrý týraly memorandým kúshine enedi. Jańalyqty Caspianpost jarııalady.
BAÁ-ge baratyn Qazaqstan azamattary qoldanystaǵy ulttyq júrgizýshi kýáligimen kólik basqara alady. Dál osyndaı jeńildikti Qazaqsandaǵy BAÁ azamattary da paıdalana alady.
Budan bólek BAÁ-de turýǵa yqtııarhat alǵan qazaqstandyqtar júrgizýshi kýáligin emtıhan tapsyrmaı-aq almastyra alady. Bul norma tek B jáne B1 sanattaryna (jeńil avtokólikter) ǵana qoldanylady.
The Times of Central Asia: Lıtıı kenderin óńdeýdiń jańa tehnologııasy zertteledi
Ǵalymdar lıtıı quramdy kenderdi óńdeýdiń jańa tehnologııasyn ázirledi. Ónerkásip jáne qurylys mınıstrliginiń málimetin The Times of Central Asia bólisti.
Bul tehnologııa karbotermııalyq balqytý úderisine negizdelgen. Tehnologııa kendi keshendi óńdeýdi jáne lıtıı men alıýmınıı sılıkatynyń tolyq bólinýin qamtamasyz etedi. Sonyń nátıjesinde lıtıı kontsentratynan FS45 markaly ferroqorytpa túziledi. Bul qorytpa metallýrgııa ónerkásibinde suranysqa ıe.
Tehnologııanyń arqasynda kontsentratty óńdeý jeńildep, lıtıı tuzdaryn alýǵa múmkindik týǵan.
Report: Bosqyn mártebesin berý tártibi ózgerdi
Elde bosqyn mártebesin berý tártibine ózgeris engizildi. Endi násiline, ultyna, dinine, azamattyǵyna, belgili bir áleýmettik topqa qatystylyǵyna nemese saıası kózqarasyna baılanysty qýdalaýǵa ushyraý qaýpi bar sheteldik nemese azamattyǵy joq adam bosqyn dep tanylady.
Report dereginshe, bosqyn mártebesin alý úshin halyqty jumyspen qamtý máseleleri jónindegi jergilikti atqarýshy organdarǵa ótinish jazýy kerek. Ótinish Qazaqstanǵa kelgen kúnnen bastap nemese qýdalaý qaýpi týyndaǵanyn bilgen sátten bastap bes kúntizbelik kún ishinde tapsyrylýy qajet.
