Álemdik BAQ-taǵy Qazaqstan: Baký-Tbılısı-Djeıhan, birlesken fılm jáne ońtústiktegi sý tapshylyǵy

ASTANA. KAZINFORM – Qazaqstan tamyz aıynyń sońǵy aptasynda álemdik medıanyń nazarynan túspedi. Elge qatysty saıası-ekonomıkalyq, tarıhı jańalyq kóp aıtylǵanyn baıqadyq. Keler jyly JІÓ kórsetkishi qalaı ózgeretini, munaı tasymaldaý jolyn keńeıtý áreketine qatysty aqpar taraǵan. Arasynda Ázerbaıjan tarapymen birlese túsiriletin kınotýyndy men ońtústik óńirlerdegi sý tapshylyǵy týraly aıtylǵan. Tolyǵyraq Kazinform tilshisiniń sholýynan oqyńyz.

Anadolu: Keler jyly jalpy ishki ónim 5,4 paıyzǵa ósedi

Qazaqstannyń ekonomıkalyq ósimi artyp keledi. Keleshek boljamǵa súıensek, 2026 jyly JІÓ-niń naqty ósýi 5,4%-dy quraıdy, al úsh jyldaǵy ortasha jyldyq qarqyn 5,3%-ǵa jetedi. Mundaı oń ózgeristi Úkimet otyrysynda Ppremer-mınıstrdiń orynbasary – ulttyq ekonomıka mınıstri Serik Jumanǵarın málimdegen. Mınıstr sózin Anadolu aqparat agenttigi taratty.

Jýyrda 2026-2028 jyldarǵa arnalǵan áleýmettik-ekonomıkalyq damý boljamyna qatysty ótken jıynda ekonomıkalyq kórsetkishter tolyq taldanǵan. Makroekonomıkalyq ındıkatorlarǵa sensek, keler jyly nomınaldy JІÓ 183,8 trln teńgege, 2028 jyly 229,8 trln teńgege deıin ulǵaıady. Ósimniń negizgi draıverleri naqty sektor men qyzmet kórsetý salasynda baıqalmaq. 2026 jyly óńdeýshi ónerkásip 6,2%-ǵa, al 2028 jyly 6,6%-ǵa deıin ulǵaıýy múmkin. Qurylystaǵy úsh jyldaǵy ortasha ósim 11,0%, kólik salasynda – 10,1%, saýdada – 6,7% deńgeıinde bolady.

2026 jyly respýblıkalyq bıýdjet kirisi 19,2 trln teńge bolsa, keıinnen 2028 jyly 23,2 trln teńgege deıin ósedi dep boljanyp otyr. Keler jyly bıýdjet tapshylyǵy JІÓ-niń 2,5% deńgeıinde aıqyndaldy, 2028 jyly JІÓ-niń 0,9%-yna deıin tómendeıdi. Bul rette munaı emes tapshylyqtyń JІÓ-ge qatysy 4,9%-dan 2,7%-ǵa deıin qysqarady.

– Nomınaldy JІÓ 2035 jyly 473,2 trln teńgege deıin ulǵaıady dep kútilýde. 2026-2028 jyldarǵa arnalǵan bazalyq kórsetkishter Áleýmettik-ekonomıkalyq damýdyń úsh jylǵa arnalǵan boljamyna sáıkes keledi. 2035 jyly memlekettik bıýdjettiń kirisi 66,8 trln teńgege deıin ulǵaıady. Kepildendirilgen transfert 2029 jyldan bastap 2 trln teńgege deıin azaıady, – deıdi Serik Jumanǵarın.

SentralAsia: Mınıstrlik sýarý maýsymyna baılanysty tekseris júrgizedi

Egin naýqany qyzǵan shaqta sý tapshylyǵynyń aldyn alý máselesi kún tártibine qaıta kóterildi. Sý resýrstary jáne ırrıgatsııa mınıstrligi sýarý maýsymyna baılanysty qyzmettik tekseris bastaýǵa kóshken. Osy oraıda SentralAsia medıa resýrsy saladaǵy jaǵdaı týraly aqparat jarııalap, óńirdegi ózen-kólderdiń sý deńgeıine qatysty statıstıkany jarııalady.

Qazirgi tańda Almaty men Jetisý oblystarynda vegetatsııa kezeńi turaqty ótip jatyr. Almaty oblysynda sý alý kólemi 1,2 mlrd tekshe metrdi qurap, 136 myń gektar egis alqaby sýaryldy. Al Jetisý oblysynda sý alý kólemi 1 mlrd tekshe metrdi qurap, 132 myń gektar jer sýaryldy.

Vegetatsııa kezeńiniń sońyna deıin eki oblysta qosymsha shamamen 150 myń tekshe metr sý alý josparlanǵan. Qazirgi ýaqytta Almaty jáne Jetisý oblystarynda qant qyzylshasy, soıa, júgeri, kópjyldyq shópter men baqshalardy sýarý jalǵasyp jatyr.

Jambyl oblysynda vegetatsııa kezeńi josparǵa sáıkes ótip jatyr. «Qazsýshar» RMK-nyń jergilikti fılıaly 78 925 gektar jerdi sýarý úshin 3 902 kelisimshart jasasqan, onyń 70 000 gektary sýarylǵan. Qalǵan 8 925 gektar qant qyzylshasy, júgeri, kókónister men jońyshqa egilgen jerlerdi sýarý qajet.

«Vegetatsııa kezeńi aıaqtalýǵa jaqyn. Bıyl kúrdeli jaǵdaı týyndap otyr. Aptap ystyq pen jaýyn-shashynnyń bolmaýy sýdy kóbirek tutynýǵa alyp keldi. Keıbir óńirde tıisti baqylaý júrgizilmeı, ylǵaldy kóp qajet etetin daqyldardy jospardan tys egý faktisi tirkeldi. Jaǵdaı elimizdiń ońtústigindegi sý sharýashylyǵyna aıtarlyqtaı áser etti. Sondyqtan olqylyqtyń qaıtalanbaýy úshin vegetatsııa kezeńi qorytyndysy boıynsha qyzmettik tekseris júrgizýdi tapsyramyn», – dedi Sý resýrstary jáne ırrıgatsııa mınıstri Nurjan Nurjigitov.

Qyzylorda oblysynda sý alý kólemi – 3,476 mlrd tekshe metr. Aımaqta kúrishtiń masaqtaný kezeńi kestege saı ótip jatyr. Egistikterdi qosymsha sýmen qamtamasyz etý úshin oblystaǵy «Qazsýshar» fılıaly men sharýa qojalyqtary 357 sorǵy stantsııasyn paıdalanýda.

Túrkistan oblysynda sý alý kólemi – 3,27 mlrd tekshe metr, Shý, Talas ózenderinen jáne Tasótkel sý qoımasynan alynǵan sý kólemi - 897 mln tekshe metr. Búginde Shardara aýdanynda negizgi daqyldardy sýarý jumystary aıaqtalýǵa jaqyn, sýǵa degen suranys azaıǵan. Maqtaaral jáne Jetisaı aýdandarynda 109,7 myń gektar jer sýarylǵan.

TASS: «Baký-Tbılısı-Djeıhan» qubyry arqyly qazaq munaıy qaıta tasymaldanýy múmkin

Qazaqstan bıligi «Baký-Tbılısı-Djeıhan» munaı qubyry arqyly qaıta tasymal uıymdastyrýǵa nıetti. Atalǵan qubyr arqyly munaı jetkizýge baılanysty kelissóz júrgizilip jatyr. Bul týraly energetıka mınıstri Erlan Aqkenjenov aıtqan. Jańalyqty reseılik TASS jazdy.

Mınıstrdiń sózinshe, «QazMunaıGaz» atalǵan baǵyt boıynsha tasymaldy barynsha tezirek qaıta jańǵyrtý jóninde kelissóz júrgizip jatyr.

– Operator tarapynan onda qandaı da bir hlororganıkalyq qosylystar bar ekeni týraly resmı málimdemeni kórmedim. Biraq bul jaıynda jańalyqtardan bildim. Tasymaldy ýaqytsha toqtatý týraly habar boldy. Biraq bilýimshe, QMG osy baǵyt boıynsha tasymaldy qaıta jańǵyrtý jóninde kelissóz júrgizip jatyr. Jalpy, qubyrdyń ótkizý qabileti óte úlken. Qazir ol 25 mln tonna munaı aıdap otyr, biraq qýaty – 50 mln. Sondyqtan jospardy oryndaýǵa múmkindik bar, – dedi mınıstr.

Report: Qazaqstan men Ázerbaıjan kórkem fılm túsiredi

Túrki áleminiń rýhanı baılanysy kıno baǵytyna oıysty. Bolashaqta Qazaqstan men Ázerbaıjannyń kórkem fılmi jaryqqa shyqpaq. Jaǵymdy habardy Qazaqstannyń Ázerbaıjandaǵy elshisi Álim Baıel súıinshilegen bolatyn. Report habarlaǵandaı, ol «Qazaqstan kınosynyń aılyǵy» sharasynda bolashaq jospardy tarqatqan.

Elshi eki memlekettiń tarıhty zertteýge degen qyzyǵýshylyǵyna nazar aýdaryp, qazaq-ázerbaıjan mamandarynyń tarıhı fılm túsirýge degen yntasyn joǵary baǵalady.

«Dıplomat túrki birligi men yntymaǵyn nyǵaıtý úshin bastamalarǵa qoldaý bildirý qajetin aıtyp ótti. Sondaı-aq Qazaqstan men Ázerbaıjan birlesken kórkem fılm túsirýdi josparlap otyrǵanyn habarlady», – delingen Qazaqstannyń Bakýdegi elshiliginiń resmı saıtynda.