Álemdik BAQ-taǵy Qazaqstan: Atomshylar qalashyǵy, medıtsınalyq týrızm platformasy jáne soltústik Araldaǵy jobalar
ASTANA. KAZINFORM - Bul aptada álemdik basylymdar Qazaqstan jaıly birshama jańalyq jarııalady. Onyń ishinde Ulttyq banktiń KASE platformasyna shyǵarǵan alǵashqy tokendelgen notalary, Qazaqstan-Qytaı ǵylymı-zertteý konferentsııasy men AES mańyndaǵy qalashyq týraly aqparattar bar. Eldegi medıtsınalyq týrızmge arnalǵan biryńǵaı onlaın platforma men Soltústik Aral teńizdegi kanaldardy qalpyna keltirý jaıy da jazylypty. Tolyǵyraq Kazinformtilshisiniń sholýynan oqyńyz.
The Times of Central Asia: Ulttyq bank tokendelgen notalar shyǵardy
Ulttyq banki alǵash ret KASE platformasyna 10 mlrd teńgege tokendelgen qysqamerzimdi notalar shyǵardy. Aýktsıon qorytyndysy boıynsha jalpy quny 50 mlrd teńge bolatyn qysqamerzimdi notalar tolyq ornalastyrylǵan, onyń 10 mlrd teńgesi – tokendelgen formatta. Jańalyqty The Times of Central Asia habarlady.
Málim bolǵandaı, Ulttyq bank alǵashqy gıbrıdti aýktsıondy 9 qarasha kúni ótkizedi. Onda dástúrli baǵaly qaǵazdarmen qatar, tsıfrlyq qarjy aktıvteri platformasynda tokendelgen notalar ornalastyrylady. Bir notanyń nomınaldy quny 100 teńge bolyp belgilengen. Al notalardyń aınalym merzimi – 91 kún, al jyldyq ortasha kiristiligi 15,72%. Baǵaly qaǵazdar aınalymy 11 qarashada bastalyp, olardy óteý 2027 jylǵy 10 aqpanǵa josparlanǵan.
Ulttyq bank barlyq oblıgatsııa ıelerine qaryzdy óteýge jaýapty. KASE óziniń tsıfrlyq platformasynda tokendelgen oblıgatsııalardyń menshik quqyǵyn tirkeıdi, al Ortalyq baǵaly qaǵazdar depozıtarııi tıisti jazbany júrgizedi.
Report: 2,2 myń shaqyrym kanal qalpyna keltiriledi
Qazaqstanda 2027–2030 jyldary «Soltústik Aral teńizi jáne ırrıgatsııalyq júıelerdi jańǵyrtý» aýqymdy jobasy josparlanyp otyr. Osy aralyqta 2,2 myń shaqyrym bolatyn sý kanaldary qalpyna keltiriledi. Bul týraly Sý resýrstary jáne ırrıgatsııa vıtse-mınıstri Jandos Salımov habarlaǵan. Vıtse-mınıstr sózin Report aqparat agenttigi taratty.
Onyń aıtýynsha, birinshi kezeńde Túrkistan jáne Qyzylorda oblystarynda júzege asyrylatyn 131 jobanyń tizimi jasalǵan. Jospar aıasynda Kókaral bógetin qaıta jańartý, 2,2 myń shaqyrym kanaldy qalpyna keltirý, 1,4 myń shaqyrym sýarmaly júıeni avtomattandyrý qolǵa alynady. Osy arqyly Aral mańyndaǵy ekologııalyq jaǵdaı jaqsaryp, teńizdegi sý kólemi artýy múmkin.
TASS: AES mańyna qalashyq salynady
Qazaqstanda atom elektr stantsııasyn salý kezinde 33 myń turǵynǵa arnalǵan jańa qalashyq salynady. Atomshylar qalashyǵy AES janyndaǵy Úlken aýylynyń quramyna biriktirilmek.
TASS agenttiginiń habarlaýynsha, atalǵan málimetti Atom energııasy jónindegi agenttik basshysy Almasadam Sátqalıev Túrkııaǵa sapary barysynda aıtty. Ol «Akkýıý» AES-ine baryp, ondaǵy qazaqstandyq mamandarmen kezdesken.
– Úlken aýylynda barlyq qajetti ınfraqurylym men kadr daıarlaý ortalyǵy bar, 33 myń turǵynǵa arnalǵan atomshylar qalashyǵyn salý josparlanyp otyr, – dedi agenttik basshysy.
Ótken jyly Qazaqstan eldegi alǵashqy atom elektr stantsııasyn salý jónindegi konsortsıýmnyń jetekshisi «Rosatom» bolatynyn málimdegen. AES Almaty oblysyndaǵy Úlken aýylynyń mańynda, Balqash kóliniń jaǵalaýynda salynady. Stantsııaǵa osy kóldiń ataýy berildi.
Jiji Press: Medıtsınalyq týrızmniń onlaın platformasy qurylady
Qazaqstanda medıtsınalyq týrızmge arnalǵan biryńǵaı onlaın platforma iske qosylmaq. Ol arqyly sheteldikter aýrýhana tańdap, emdelýge aldyn ala jazyla alady. Bul týraly Premer-mınıstr Oljas Bektenov Quryltaı depýtattarynyń saýalyna bergen jaýabynda aıtqan. Laýyzymdy tulǵa sózin japondyq Jiji Press jazdy.
Premer-Mınıstrdiń aıtýynsha, platformada medıtsınalyq qyzmet týraly usynystar jarııalanyp, medıtsınalyq qyzmetterge aldyn ala jazylýǵa múmkindik beriledi. Medıtsınalyq týrısterge tsıfrlyq qoldaý kórsetý úshin platforma memlekettik tsıfrlyq júıemen ıntegratsııalanady.
– Sheteldik týroperatorlar, saqtandyrý jáne medıtsınalyq kompanııalar úshin aqparattyq týrlardy uıymdastyrý, medıtsınalyq qyzmetter paketterin jarnamalaý, onyń ishinde sheteldik BAQ-ty tartý máselesi pysyqtaldy. Áleýetti sheteldik emdelýshilerdi Qazaqstannyń medıtsınalyq mekemeleri, onyń ishinde JCI halyqaralyq akkredıtatsııasy bar uıymdar men otandyq densaýlyq saqtaý júıesiniń múmkindikteri týraly habardar etýge baǵyttalǵan mamandandyrylǵan jýrnal daıyndalady, – dedi Oljas Bektenov.
Byltyr elge 4 488 sheteldik emdelýge kelgen. Kóbi Astana men Almatydaǵy klınıkalaryn tańdapty.
Xinhua News: Ǵylymı-zertteý konferentsııasy ótti
Sársenbi kúni Almatyda «Qazaqstan men Qytaı: jastar kózqarasyndaǵy dástúr men ınnovatsııalar» atty ekinshi ǵylymı-zertteý konferentsııasy ótti. Aqparatty qytaılyq Xinhua News bólisken.
Konferentsııanyń basty maqsaty – jastardyń boıyndaǵy zertteý daǵdysyn qalyptastyrý, sondaı-aq oqýshy-oqytýshy-sarapshy arasynda kásibı dıalog ornatý.
Іs-sharany «Laoshi» bilim berý ortalyǵy, Narxoz Business School jáne «Bir beldeý – bir jol» ǵylymı-bilim berý ortalyǵy birlesip uıymdastyrdy. Konferentsııaǵa Almaty qalasyndaǵy 30-dan astam mektep pen 10 kolledjdiń oqýshylary qatysqan.
