Álemdik BAQ-taǵy Qazaqstan: Atyraý – Samara munaı qubyryn paıdalaný, $100 mln kelisim jáne Amýr jolbarysy
ASTANA. KAZINFORM – Apta sońynda jahandyq ınternet-basylymdardy bir paraqtadyq. Mundaǵy Qazaqstanǵa qatysty jańalyqtyń kóbi memleket basshylarynyń Astanaǵa sapary aıasynda jarııalanǵan. Sonymen qatar bıyl iske qosylatyn 200 kásiporynnyń jaıy, Qytaımen jasalǵan iskerlik kelisim jáne Atyraý – Samara munaı qubyryn qaıta paıdalaný máselesi keń taldanǵan. Tolyǵyraq Kazinform tilshisiniń sholýynan oqyńyz.
The Jordan Times: Korol Qazaqstan Prezıdentimen kelissóz júrgizýde
Osy aptada Qazaqstanǵa birneshe eldiń memleket basshylary saparlady. Iordanııa koroli II Abdalla ben ál-Hýseın jáne Tájikstan prezıdenti Emomalı Rahmon resmı saparmen kelgen. Al Ózbekstan prezıdenti Shavkat Mırzıeev pen Túrikmenstan prezıdenti Serdar Berdimuhamedov Aqaba protsesi sammıtine qatyspaq.
The Jordan Times-tyń jazýynsha, sapar barysynda Qasym-Jomart Toqaev korolge Al-Farabi ordenin tabystaǵan. Bul marapat Qazaqstan men arab álemi arasyndaǵy ǵylym, ıslamtaný salalaryndaǵy tyǵyz baılanysty bildiredi.
II Abdalla ben ál-Hýseın eki eldiń dostyq qarym-qatynasynyń belgisi retinde Prezıdent Qasym-Jomart Toqaevty al-Hussain ibn Ali ordenimen marapattady.
Reuters: Atyraý – Samara munaı qubyry arqyly tranzıt qaıta jandanady
Qazaqstan Atyraý – Samara qubyry arqyly munaı tasymalyn qaıta iske qosady. Muny seısenbi kúni energetıka mınıstrligi habarlaǵan. Jańalyqty Reuters taratty.
Buǵan deıin, dúısenbige qaraǵan túni, Reseıdegi «Samara» óndiristik-ótkizý ortalyǵyna dronmen shabýyl jasalǵan bolatyn. Sonyń saldarynan qubyr jumysy ýaqytsha toqtap, Qazaqstan munaıdy Reseı aýmaǵy arqyly tasymaldaýdy shektegen.
Energetıka mınıstrligi tehnıkalyq tekserýden keıin munaı jóneltý jumysy qaıta jandanǵanyn jáne qubyr qalypty rejımde jumys istep turǵanyn málimdedi.
Xinhua News: 200-ge jýyq jańa kásipornyn iske qosylady
Qazaqstan 2026 jyldyń sońyna deıin quny 1,7 trln teńgeni (3,75 mlrd dollar) quraıtyn 200-ge jýyq ónerkásiptik jobany iske qospaqshy. Bul týraly Premer-mınıstrdiń birinshi orynbasary Nurlybek Nálibaev habarlaǵan. Laýazymdy tulǵa málimetin Xinhua News agenttigi bólisti.
Vıtse-premerdiń aıtýynsha, Ónerkásip jáne qurylys mınıstrligi óndiristik qýat teńgerimin baǵalaý ádistemesin bekitken. Endi árbir jańa joba naryqtaǵy suranys, jumys istep turǵan kásiporyndardyń júktemesi jáne jer resýrsyn eskerile otyryp qarastyrylady.
Jiji Press: Qazaqstandyq óndirýshiler Qytaıda 100 mln dollarǵa kelisimder jasasty
Qazaqstandyq kompanııalar Shanhaıda ótken Qytaıdyń 9-shy halyqaralyq ımport kórmesiniń (CIIE) alǵashqy kúni jalpy somasy 100 mln dollar bolatyn kelisimge qol jetkizdi. Aqparatty Jiji Press jazǵan.
CIIE – álemdegi eń iri saýda alańdarynyń biri. Oǵan jyl saıyn 160-tan astam el men óńirden myńdaǵan kompanııa keledi. Kórme sheteldik óndirýshilerge Qytaı naryǵyna shyǵýǵa, tikeleı iskerlik baılanys ornatýǵa jáne eksporttyq kelisimsharttar jasasýǵa múmkindik berýde.
Qazaqstan CIIE kórmesinde otandyq kásiporyndardyń ónimderi men eldiń eksporttyq áleýetin tanystyrdy. Bıyl ulttyq pavılonǵa 40-qa jýyq qazaqstandyq óndirýshi jınalǵan.
Kórmede tamaq ónerkásibiniń keń aýqymdy ónimi usynylǵan. Olardyń qatarynda Qazaqstanda óndiriletin maı-tońmaı, un, kondıterlik jáne sút ónimderi, sýsyndar men basqa da taýarlar bar.
TASS: Ekinshi Amýr jolbarysy tabıǵatqa jiberildi
Reseıdiń Qazaqstanǵa bergen ekinshi Amýr jolbarysy «Іle-Balqash» memlekettik tabıǵı rezervaty aýmaǵyna jiberildi. Ekologııa jáne tabıǵı resýrstar mınıstrliginiń aqparatyn reseılik TASS agenttigi jarııalady.
- 2026 jylǵy 31 qazanda «Іle-Balqash» memlekettik tabıǵı rezervaty aýmaǵynda taǵy bir tarıhı oqıǵa boldy. Amýr atty erkek amýr jolbarysy tabıǵı ortaǵa jiberildi. Ol – reıntrodýktsııa baǵdarlamasy aıasynda Qazaqstannyń jabaıy tabıǵatyna qaıta oralǵan ekinshi jolbarys, – delingen vedomstvo habarlamasynda.
Jolbarys tabıǵatqa jiberilmes buryn arnaıy qorshaýda ustalyp, veterınarlyq tekseristen ótken. Mamandar onyń ań aýlaý daǵdysyn, ózdiginen qorek tabý qabiletin tekserý úshin birqatar synaq júrgizdi. Janýardyń qozǵalysyn baqylaý maqsatynda oǵan spýtnıktik qarǵybaý taǵyldy.
