Álemdik BAQ-taǵy Qazaqstan: Ásker reformasy, avtokólik óndirisi jáne Shveıtsarııadaǵy qazaq ortalyǵy
ASTANA. KAZINFORM – Ádettegideı jahandaǵy aqparat taratýshy ınternet-basylymdar eldegi kóp jaıǵa úńildi. Apta ishinde Qazaqstandaǵy ásker reformasy men Shveıtsarııada Qazaqstannyń mádenı-iskerlik ortalyǵynyń ashylýy kóp aıtylǵan. Keıingi aılardaǵy jeńil avtokólik óndirisiniń qarqyny sýretshi Gúlnur Muqajanovanyń kórmesi de kóptiń nazarynda boldy. Tolyǵyraq Kazinform tilshisiniń sholýynan oqyńyz.
Xinhua News: Qazaqstan jańa alıansqa baqylaýshy boldy
Qytaı Halyq Respýblıkasynyń Hanchjoý qalasynda Azııanyń mádenı murasyn qorǵaý alıansy keńesiniń IV otyrysy ótti. Keńes otyrysynyń qorytyndysy boıynsha Qazaqstan uıymǵa baqylaýshy memleket mártebesin aldy. Jańalyqty qytaılyq Xinhua News taratqan.
Mádenıet jáne aqparat vıtse-mınıstri Aıbek Sydyqov óz sózinde Qazaqstannyń ıÝNESKO-men ortaq jumysy týraly aıtyp, Alıanspen yntymaqtastyqty úsh baǵytta damytýdy usyndy. Olar: mamandar daıarlaý jáne tájirıbe almasý, tsıfrlyq tehnologııalar men jasandy ıntellekt kómegimen eskertkishterdi qashyqtan baqylaý, sondaı-aq Uly Jibek joly boıyndaǵy nysandarda birlesken arheologııalyq jáne ǵylymı zertteýler júrgizý.
Qazaqstan delegatsııasy IV Lıanchjý forýmynyń ashylýyna da qatysty. Forýmǵa ıÝNESKO, IKKROM, ALIPH jáne Ibero-Amerıka memleketteriniń bilim, ǵylym jáne mádenıet jónindegi uıymynyń ókilderi jınaldy.
Report: Jeńil avtokólik óndirisi 38%-ǵa artty
2026 jylǵy qańtar-qyrkúıek aılarynda Qazaqstanda 136 548 jeńil avtokólik óndirildi. Bul ótken jyldyń sáıkes kezeńimen salystyrǵanda 38%-ǵa kóp. Aqparatty Report jarııalady.
Qyrkúıek aıynda elde 19 377 jeńil avtokólik shyǵaryldy. Óndiris kólemi 2025 jylǵy qyrkúıekpen salystyrǵanda 66,4%-ǵa, al bıylǵy tamyzben salystyrǵanda 35,5%-ǵa ósti.
Qazaqstanda avtokólik óndirýmen 12 kásiporyn aınalysady. Jeńil avtokólik óndirisiniń negizgi bóligi Almaty qalasy men Qostanaı oblysyna tıesili. Olardyń úlesi tıisinshe 50,5% jáne 49,5%-dy quraıdy.
2026 jyldyń alǵashqy toǵyz aıynda «Avtokólikter, tirkemeler jáne jartylaı tirkemeler» sanatyndaǵy ónerkásip óniminiń kólemi aqshalaı mánde 1,67 trln teńgege jetti. Osy sanat boıynsha ónerkásip óndirisiniń ındeksi ótken jyldyń sáıkes kezeńimen salystyrǵanda 129,9%-dy qurady.
The Times of Central Asia: Áskerı reforma jospary tanystyryldy
Kaspıı teńizindegi áskerı oqý-jattyǵý kezinde oryn alǵan qaıǵyly oqıǵadan keıin Qazaqstan reformaǵa bet burdy. Jaqynda Prezıdent Qasym-Jomart Toqaev Qaýipsizdik Keńesiniń otyrysyna qatysyp, jańa reforma josparynyń jobasymen tanysty. Aqparatty The Times of Central Asia bólisken.
Refoma qysqa merzim ishinde zamanaýı, utqyr jáne tehnologııalyq turǵydan damyǵan armııa qurýǵa baǵyttalyp otyr. Bolashaqta merzimdi áskerı qyzmet eki kezeńnen turmaq. Áskerge shaqyrylǵandar alǵashqy alty aıda oqý ortalyqtarynda daıarlyqtan ótedi. Keıingi alty aıda tikeleı áskerı bólimderde qyzmet etedi. Bul kezeńde jaýyngerlik daıarlyqqa jáne bólimsheler quramynda mindetterdi oryndaýǵa basymdyq beriledi.
Sondaı-aq reforma aıasynda Qarýly Kúshterdiń qurylymy men quramy, basqarý jáne qorǵanysty josparlaý júıesi jetildiriledi. Jaqyn arada Ushqyshsyz kúshterdi qurý josparlanǵan.
Jiji Press: Shveıtsarııada Qazaqstannyń mádenı-iskerlik ortalyǵy ashyldy
21 qazanda Shveıtsarııanyń Shaffhaýzen qalasynda Shveıtsarııa–Qazaqstan mádenı-iskerlik ortalyǵy ashyldy. Ortalyq Eurasia Group kompanııasynyń bastamasymen jáne Qazaqstan Respýblıkasynyń Shveıtsarııadaǵy Elshiliginiń qoldaýymen quryldy.
Jiji Press-tiń jazýynsha, ortalyqtyń negizgi baǵytynyń biri qazaqstandyq ónimderdi Shveıtsarııa jáne basqa da halyqaralyq naryqtarǵa shyǵarý bolmaq. Atap aıtqanda, metallýrgııa, agroónerkásip, tamaq jáne hımııa ónerkásibi ónimderin ilgeriletýge basymdyq beriledi. Qazaqstandyq óndirýshiler men sheteldik ımporttaýshylar jáne saýda jelileri arasynda tikeleı iskerlik baılanystar ornatylady.
Investıtsııalyq yntymaqtastyqpen qatar Qazaqstannyń tarıhı-mádenı ereksheligin nasıhattaý da nazarda bolady.
Euronews: Sýretshi Gúlnur Muqajanova Londondaǵy «Bosaǵany» tanystyrdy
Qazaqstandyq sýretshi Gúlnur Muqajanova Frieze London 2026 kórmesinde «Bosaǵa» atty toqyma serııasyn usyndy. Avtor mata arqyly ulttyq tanymdy, bolashaq mejeni dál sýretteı bilgen. Osy oraıda Euronews telearnasy óner ıesi týraly arnaıy baǵdarlama ázirledi.
Frieze London álemdegi eń yqpaldy jármeńke sanalady. Bıyl sharaǵa Qazaqstannyń týmasy, Berlınde turatyn sýretshi Gúlnur Muqajanova qatysty. Sýretshi 2021 jyly «Bosaǵa: mádenıet pen ýaqyt sheńberindegi saıahat» atty jobasyn bastaǵan. Bul joly «Bosaǵa» atty úzdik trıptıhin kórermenge usynýǵa múmkindik alǵan.
