Álemdik BAQ-taǵy Qazaqstan: Almatydaǵy jer silkinisi, robot operatsııasy jáne Starlink mobile
ASTANA. KAZINFORM – Apta ishinde jahandaǵy aqparat taratýshy ınternet-basylymdar Qazaqstandaǵy oqıǵalardy qapy jibermedi. Sonyń ishinde Prezıdenttiń Germanııaǵa sapary jáne qazaqstandyq hırýrgtardyń robottyń kómegimen jasaǵan kúrdeli otasy jaıly aıtylǵan. Spýtnıktik mobıldi baılanystyń iske qosylýy men Almaty oblysyna tirkelgen jer silkinisi de qyzý qaýzalypty. Tolyǵyraq Kazinform tilshisiniń sholýynan oqyńyz.
Reuters: Qazaqstan Qashaǵan ken ornyn ıgerýshi operatordan 5,2 mlrd dollar aıyppul óndirmekshi
Qazaqstan NCOC konsortsıýmynan 2,3 trıllıon teńge (5,2 mıllıard dollar) kólemindegi aıyppuldy májbúrlep óndirip alý rásimin qaıta bastady. Daýly sot isine qatysty aqparatty Reuters taratqan.
NCOC quramyna Shell, TotalEnergies, ExxonMobil jáne qytaılyq CNPC kompanııasy kiredi. Qazaqstan bıligi konsortsıýmdy kúkirtti saqtaý talaptaryn buzdy dep aıyptap, burynnan aıyppul óndirý boıynsha daýlasyp keledi. Al konsortsıým taǵylǵan aıypty moıyndamaıdy jáne aıyppulǵa barlyq qoljetimdi tásilmen shaǵymdanyp jatqanyn málimdegen.
Qashaǵan – keıingi onjyldyqta ashylǵan álemdegi eń iri munaı ken oryndarynyń biri. Onyń boljamdy qory 13 mıllıard barreldi quraıdy.
Deutsche Welle: Aımaqtaǵy basty seriktes
Nemistiń Deutsche Welle basylymy Qasym-Jomart Toqaevtyń Germanııaǵa saparyna oraı eki eldiń ekonomıkalyq baılanysyna arnalǵan materıal jarııalady.
2026 jyldyń ekinshi toqsanynda Qazaqstan Eýropalyq odaqtaǵy munaı ımporttaıtynyń shamamen 13,4%-yn, kómirdiń 9%-dan astamyn qamtamasyz etken. Al ótken jyly Germanııaǵa 10,3 mln tonna munaı jetkizildi.
Eki el saýda-sattyqty ártaraptandyrýǵa, ınvestıtsııa tartýǵa jáne óndiristi lokalızatsııalaýǵa umtylyp otyr. Birlesken deklaratsııada metallýrgııa, munaı-hımııa, tamaq ónerkásibi, temirjol, mashına jasaý baǵyttaryna basymdyq berildi.
TASS: Starlink mobile iske qosyldy
Starlink Mobile kompanııasy Qazaqstanda spýtnıktik mobıldi baılanysty iske qosty. Ol jerústi mobıldi jelisiniń qamtý aımaǵynan tys jerlerde smartfon arqyly baılanys ornatýǵa múmkindik beredi. Jańalyqty reseılik TASS aqparat agenttigi habarlaǵan.
Starlink Mobile jerústi mobıldi ınfraqurylymyn tolyqtyryp, shalǵaı aýdandarda, qala syrtyndaǵy joldarda jáne taýly jerlerde baılanysty arttyrmaq.
– Qazaqstan – Direct to Cell tehnologııasyn synaqtan ótkizip, ony paıdalanýshylarǵa arnalǵan servıs deńgeıine shyǵarǵan Ortalyq Azııadaǵy alǵashqy el. Biz úshin ozyq tehnologııalar halyqaralyq kelisimniń bir bóligi bolyp qana qoımaı, Qazaqstanda naqty jumys istep, adamdarǵa paıda ákelýi mańyzdy, – dedi jasandy ıntellekt jáne tsıfrlyq damý mınıstri Jaslan Mádıev.
Report: Bir kúnde úsh jer silkinisi boldy
Qazaqstanda bir kúnde úsh jer silkinisi oryn aldy. Jer asty dúmpýleri Almaty oblysynda sezilgen.
Report agenttiginiń jazýynsha, jer silkinisiniń oshaǵy Almaty qalasynan ońtústik-shyǵysqa qaraı 254 shaqyrym jerde ornalasqan. Bir kúnde Narynqol aýylynda – 2-3 ball, Kegen aýylynda – 2 ball deńgeıindegi jer silkinisi tirkeldi.
Tótenshe jaǵdaılar mınıstrliginiń mamandary jer silkinisinen keıin ózen arnalaryn, gıdrotehnıkalyq nysandary, kóshkin men sel qaýpi bar ýchaskelerdi teksergen. Biraq eshbirine zaqym kelmegen, qazirgi ýaqytta atalǵan nysandar shtattyq rejımde jumys istep tur.
Jiji Press: Robottyń kómegimen kúrdeli operatsııa jasaldy
Almaty onkologııa ortalyǵynda dárigerler alǵash ret asqazannyń bóligin hırýrgııalyq tiliksiz aldy. Mamandar muny robottyń kómegimen jasaǵan. Aqparatty Jiji Press bólisti.
Operatsııa barysynda ICG-navıgatsııasy – aǵzany anyq kórýge múmkindik beretin tehnologııa qoldanylǵan. Sondaı-aq lımfa túıinin alýǵa arnalǵan D2 lımfodıssektsııasy jasalypty.
– Robottandyrylǵan júıe joǵary dáldikpen jumys isteýge jol ashty. Robottyń kómegimen aǵzany úlkeıtilgen úsh ólshemdi keskin arqyly egjeı-tegjeıli kóremiz ári kúrdeli manıpýlıatsııa jasaı alamyz. Júıe hırýrg qolynyń tabıǵı mıkrodirilin de sezedi, – dedi PhD doktory Nurlan Baltaev.
