Álemdik BAQ-taǵy Qazaqstan: Almatydaǵy kelissóz, Eýropaǵa eksport, halyq birligi
Osy aptada álemniń buqaralyq aqparat quraldary Qazaqstan týraly kóptegen materıal jarııalady. Ásirese, Almatydaǵy Ázerbaıjan men Armenııanyń kelissózi kóptegen BAQ-tyń nazarynda boldy. Sondaı-aq, qazaqstandyqtardyń sý tasqynynan keıingi aýyzbirligi, kúnbaǵys kúnjarasynyń Eýropaǵa eksporty jáne Prezıdent Qasym-Jomart Toqaevtyń Joǵary Eýrazııalyq ekonomıkalyq keńestiń otyrysyndaǵy usynystaryn jazdy. Sheteldegi basylymdar elimiz týraly basqa qandaı habar taratqanyn Kazinform tilshisiniń sholýynan oqyńyz.
Trend: Almatyda Ázerbaıjan men Armenııa syrtqy ister mınıstrleriniń kezdesýi bastaldy
Almatyda Ázerbaıjan men Armenııa syrtqy ister mınıstrleriniń kezdesýi bastalǵany týraly Trend agenttigi jazdy.
Sonymen qatar, basylym Qazaqstanǵa jumys sapary aıasynda Ázerbaıjan syrtqy ister mınıstri Djeıhýn Baıramov QR premer-mınıstriniń orynbasary – syrtqy ister mınıstri Murat Nurtileýmen kezdeskenin de habarlady.
Aıta keteıik, juma kúni Trend agenttigi kezdesý barysynda Ázerbaıjan men Qazaqstan arasyndaǵy strategııalyq qarym-qatynastar aıasyndaǵy máseleler, shıelenis sheshimin tapqannan keıingi óńirdegi ahýal, beıbitshilik protsesiniń qazirgi jaǵdaıy talqylandy dep habarlaǵan.
Report.az: Armenııa beıbitshilikke, beıbit kelisimge qol qoıýǵa nıetti
Budan bólek ázerbaıjandyq Report.az basylymy Sputnik Qazaqstanǵa silteme jasap Armenııa syrtqy ister mınıstri Ararat Mırzoıannyń málimdemesin habarlady.
Biz kelissózder úderisine syndarly túrde qatysyp jatyrmyz, – dep keltirdi Ararat Mırzoıannyń sózin agenttik.
Mırzoıannyń aıtýynsha, taraptar beıbitshilik ornatý týraly kelisimge qol qoıýmen shektelip qalmaı, óńirde kólik ınfraqurylymyn jandandyrý qajet.
The Times of Central Asia: Qazaqstan, Qyrǵyzstan jáne Ózbekstan EAEO-nyń ekonomıkalyq ıntegratsııasyn qoldaıdy
8 mamyrda Máskeýde Reseı prezıdenti Vladımır Pýtın, Belarýs prezıdenti Aleksandr Lýkashenko, Qazaqstan prezıdenti Qasym-Jomart Toqaev, Qyrǵyzstan prezıdenti Sadyr Japarov jáne Armenııa premer-mınıstri Nıkol Pashınıan Eýrazııalyq ekonomıkalyq odaqtyń (EAEO) basqarýshy organy – Joǵary Eýrazııalyq ekonomıkalyq keńestiń otyrysyna jınaldy. Bul týraly The Times of Central Asia habarlady.
Basylym Qazaqstan Prezıdenti Toqaevtyń baıandamasyna toqtaldy. Memleket basshysy qysqa merzimde taraptar arasyndaǵy yntymaqtastyq Qazaqstan ekonomıkasynyń damýyna úlken úles qosqanyn atap ótken.
Onjyldyqtyń makroekonomıkalyq qorytyndysy birlestigimizdiń tańdaǵan damý baǵyty durys ekenin kórsetti. Qazaqstannyń odaqqa múshe eldermen saýda aınalymy 1,7 ese artyp, 28,5 mıllıard dollarǵa jetti, – dep keltirdi Toqaevtyń sózin The Times of Central Asia.
Sondaı-aq, basylymnyń málimetinshe, Qazaqstan Prezıdenti EAEO-nyń Azııa, Afrıka jáne Taıaý Shyǵystyń qarqyndy damyp kele jatqan elderimen yntymaqtastyǵynyń zor áleýetine toqtala otyryp, EAEO-ǵa múshe memleketterdi Parsy shyǵanaǵy naryǵyna shyǵý úshin halyqaralyq kólik dálizin qurý týraly Ashhabad kelisimine qosylýǵa shaqyrǵan.
Daryo: Qazaqstan EO-ǵa kúnbaǵys kúnjarasynyń eksportyn 2 eseden astam ulǵaıtty
2023 jylǵy shilde men 2024 jylǵy aqpan aralyǵynda Qazaqstannan Eýropalyq Odaqqa kúnbaǵys kúnjarasynyń eksporty 2,3 ese ósip, shamamen 54,4 myń tonnany qurady. Qazaqstan kúnbaǵys kúnjarasyn jetkizýshiler arasynda Ýkraına, Argentına, Reseı jáne Moldovadan keıin besinshi orynda tur. Bul týraly ózbekstandyq Daryo basylymy Kazinform agenttigine silteme jasap habarlady.
Danııa 29 350 tonna satyp aldy jáne Qazaqstannan kúnbaǵys kúnjarasyn negizgi ımporttaýshy el bolyp otyr. Odan keıingi orynda 15600 tonnamen Shvetsııa tur, al Fınlıandııa, Latvııa, Estonııa, Germanııa jáne Lıtva – tıisinshe 2500 tonna, 2410 tonna, 1950 tonna, 1570 tonna jáne 1000 tonna ımporttaǵan, – dep jazdy Daryo.
TASS: Qazaqstanda sý tasqynynan keıin munaı óndirý qalpyna keldi
Qazaqstanda iri sý tasqynynan keıin munaı óndirý qalypty jaǵdaıǵa keldi. Bul týraly jýrnalısterge Qazaqstannyń energetıka mınıstri Almasadam Sátqalıev aıtty, dep habarlady TASS agenttigi.
Munaı óndirý azdap tómendedi, 500-ge jýyq uńǵyma sý astynda qaldy, biraq qazir sý tartylyp jatyr, aldyn ala qabyldanǵan sharalardyń barlyǵy derlik tıimdiligin kórsetti, – dedi Sátqalıev «Qazaqstandaǵy sý tasqyny munaı óndirýge qalaı áser etti degen TASSi-tyń suraǵyna jaýap berip.
Sonymen qatar, basylymnyń málimetinshe, mınıstr elde qazir sý basqan munaı uńǵymalary joq ekenin aıtqan.
Eureporter: Qazaqstandyqtar sý tasqynymen kúreste birikti
Naýryzdyń sońynda Qazaqstan alapat sý tasqynynan zardap shekti. Eldiń on jeti aımaǵynyń onyn sý basty. Sodan beri 119 myńnan astam adam úılerinen kóshirildi jáne bul sońǵy seksen jyldaǵy Qazaqstandaǵy eń aýyr apattardyń biri boldy. Prezıdent Qasym-Jomart Toqaev tasqynnyń zardaby aýyr bolǵanyna qaramastan, qıyn kúnde Qazaqstan halqy birligin kórsetti dep atap ótti. Bul týraly Eureporter habarlady. Basylym kúrdeli sátte qazaqstandyqtar apatqa qarsy jumyla atsalysqanyn materıalǵa arqaý etken.
Tasqyn bastalǵannan beri Qazaqstan halqy Assambleıasy belsendi ári úılesimdi jumys istep jatyr. Oǵan búkil el kýá. Jurtqa jan-jaqty kómek berý úshin dereý Assambleıanyń respýblıkalyq jáne aımaqtyq shtabtary quryldy, – dep keltirdi basylym Prezıdenttiń Qazaqstan halqy Assambleıasynyń (QHA) 33-sessııasyndaǵy sózin.
Sondaı-aq, basylymnyń málimetinshe. «Júrekten júrekke» degen aýqymdy aktsııa júrgizilip jatyr. Apat aımaqtaryna 1500 tonnadan astam azyq-túlik jáne eń qajetti taýarlar joldandy. Onyń jalpy somasy shamamen 770 mıllıon teńge boldy. Sý tasqynymen kúreske etnomádenı birlestikterdiń 12 myńǵa jýyq ókili qosyldy.
Eriktiler zardap shekken aýdandarǵa kómek kórsetýde jáne osy qıyn ýaqytta qoǵamǵa qoldaý kórsetýde mańyzdy ról atqardy. Olardyń janqııarlyq is-áreketteri men muqtaj jandarǵa kómektesýdegi adaldyǵy sý tasqynynan zardap shekkender tarapynan joǵary baǵalandy, – dep basylym Astana Times-qa silteme jasap Ulttyq eriktiler jelisiniń atqarýshy dırektory Tatıana Mıronıýktiń sózin keltirdi.
